Vagla - 1977 Edition (Drama - NT)

Ba Heezaa Hɔpizii bɛl, Yeesu ni u hiŋra ga mia biini di ra la. Banna la la, u hiŋra jaa ra kuugi mia la aŋhina nyuuni fɔŋ di ra hee. Farisizi baŋhina pɛɛzi baa, “Ɛrɛɛ ii ra chɔgi yaa Heezaa Hɔpizii gbɔg gunnɛi?”
Yeesu bir pɛɛzi baa, “Amɔ, ii haa waa Deevid wia karmɛɛ Kɔraawiizi Hɔŋ biiniaa? Lɔzi faa ra kpu u ni u hiŋraa. U faa zuu Kɔraawiizi Dia kpa paanuuzi la baŋ ɔɔ chiŋŋi Kɔraawiizi, nɛr maa ra kiia la, di Kɔraawiizi kizeehina bɛŋ lɛi la, di hee ka kpa aŋhina tɛɛ banla n du u be la, ba ge hee.” U kaa ŋɔ ba be, “Mìŋ́ Newee Biibaallɛ dɔɔ a Heezaa Hɔpizii gba.”


Ba Heezaa Hɔpizii bɛl, u zuu ba jaamaa dia ra bagli baa. Baal bɛl ge faa du de, u nodig faa siu. Kɔraawiizi Hɔnzunna ni Farisizi ra binni Yeesu, di u daŋ chaau ba Heezaa Hɔpizii hiŋ gɛɛ wàá chaauwɛi? Ba faa ra nyiŋŋuu bá na u cholli bɔr bɛl, ka wer ŋɔ u wia. Yeesu zum gunla banna fɛ ba bampiree biine, ka ŋɔ baal la nonii n siuwɛ la be, “Izi ba wa chi yaa baambaaŋ.” U izi ga chi de.
Awia, Yeesu ŋɔ ba be, “N dɔɔ wii bɛl ń pɛɛzi ia. A Heezaa Hɔpizii biini, nɛra winanaa ɛɛirɛ ii ra kii gɛɛ wichɔgaa ɛɛirɛ ii ra kiiyei? Hiŋ lɛɛ nɛr miibɔɔ ani hiŋ kpu nɛr, u bɛliirɛ ii ra kiiyei?”
U binni ba maa siwee wa kaali, ka jaa ŋɔ baal la be, “Tɛr i nonii.” U tɛruu, u nonii hiŋ nyaagi. Ka nɛra la baana fuuh werge maa. Ba ra ŋɔ dɔŋa be gunla ban niŋ ɛɛu.


A saŋa, Yeesu izi la giŋgimii bɛl nyuu gaa suŋŋi wiizi de, di du de guŋŋ hɔɔ wa pizi. Hɔɔŋ wa pizɛɛ, u yir u hiŋra, di lizi fidibanɛɛ ba biini, di ra yir baa u huŋhunna. Bɛl sɔnnɛ Saimɔn. U kaa dau u sɔŋ Pitta, di kpa u niwee Andru, Jems ni Jɔɔn, Filip, Batolomiu, Matiu, Tɔmas, Alfiɔs biibaal Jems, Saimɔn la banna yir Zɛlɔt la, Jems biibaal Judas ani Judas Iskariɔt la n ɛɛu sɔsɔgɔ la.


U ni baa lii giŋgimii la nyuu tuu wa hel bɔkpantalaŋ bɛl chi. U hiŋra kpilakpila maa du de di kpa nɛkpila n lii Juda hɛri, bolzeŋ Jɛrusalɛm, Taaya ani Saidɔn la n dugli muuzeŋ la jaa. Ba maa lii ba u be, bá wa nuu u wiŋɔzi, di kaa ra nyiŋŋi ú chaa baa. Denii u chaa tinnanchɔgaa hina gba. Nɛkpila la maa ra nyiŋŋi bá vii wer gbɔgzuu, dikuubɛɛwiai, fɔŋŋa ɔɔ lii u ninɛɛ chaa ba maa.


Denii Yeesu binni u hiŋra ka ŋɔ,
“Ii banla n ɛɛ nyaara,
ii nuu sumaa,
dikuubɛɛwiai, ii daŋ zuu
Kɔraawiizi Kora biini.
Ii banla n na wii lɔzi filaŋkennaa,
ii nuu sumaa,
dikuubɛɛwiai, ii daŋ wa na
á kukki ia nɛnnɛ.
Ii banla n na wii filaŋkennaa,
ii nuu sumaa,
dikuubɛɛwiai, ii daŋ waa mam.
Di nɛra hah ia, di ra duŋŋi ia ba biini,
di ra gbɛlli ia,
di ra chɔg ii sɔna,
dikuu Mìŋ́ Newee Biibaal wia,
ii nuu sumaa.
Ií gil ii bɔra sɔɔni ia werge maa a hɔl hiŋ, ii zaahzi ra chiiri, dikuubɛɛwiai, tɔna la iin niŋ na Kɔraawiizi be la kannɔ werge. Gunnɛ ba naabaala faa ɛɛ u dɔgtɛɛzi la.
Ama, ii banla n ɛɛ dɔɔna,
wia daŋ wa huuzi ia,
dikuubɛɛwiai,
ii teŋ na bɔkpega dui la
maa iin niŋ nau.
Ii banla n nawɛɛ piŋ filaŋkennaa,
wia daŋ wa huuzi ia,
dikuubɛɛwiai,
lɔzi daŋ waa kpu ia.
Ii banla n na mam filaŋkeŋ ge,
wiarɛ huuzi ia,
dikuubɛɛwiai,
ii biine daŋ wa chɔgi,
ii ra wii.
Di nɛra maa ra chɔli ia,
wia daŋ wa huuzi ia.
Gunnɛ ba naabaala faa
ra chɔli dɔgtɛɛkara hina la.


Ka miŋwaa ra ŋɔ ii banla n na nuu n benii, ‘Ií nɔŋŋi ii dɔma di ra ɛɛ banla n hah ia ge winanaa. Ií suŋŋi wiizi ra tɛɛ banla n na see ia nuuzi ni banla n na gbɛlli ia. Di nɛr chɛ i lia, kaa bir unla hiŋ ge tɛu ú chɛ. Di nɛr lɛɛ i wɛjɛ, kpa i tagta ge jaau. Gilɛɛ kpolluu. Di nɛr maa suŋŋii kuŋ, tɛu. Di u kpa i kuna kaali, gilɛɛ kaa pɛɛzi a wia. Gunla maa iinna nyiŋŋi nɛra ra ɛɛ ia, ií ge ra ɛɛ baa guŋ.
Di ii nɔŋŋi banla n nɔŋŋi ia, bɛɛ tɔnaa ii nai? Wichɔgɛɛra gba nɔŋŋi banla n nɔŋŋi baabuu. Di ii ra ɛɛ banla n na ɛɛ ia winanaa la winanaa, bɛɛ sɔnnɛ ii dɔɔ naanɛi? Wichɔgɛɛra gba ra ɛɛ gunnɛ. Di banla n di ii kima ɛɛ banla iinna ɛɛ ba tamii lugɔ ii daŋ bir naa ba be la, bɛɛ tɔnaa ii na naanɛi? Wichɔgɛɛra gba gillɔɔ wichɔgɛɛra ra kim ba kebee ka bá kaa wer naa. Ií nɔŋŋi ii dɔma di ra ɛɛ winanaa. Di nɛra ra nyiŋŋi ba kim kebee ii be, ií ra tɛɛ baa ka gilɛɛ ra fɔŋ a kebee wia. Di ii wetto ɛɛ guŋ, ii daŋ na tɔna werge, di ɛɛ Kɔraawiizi La N Kaali Kummaa la biizi, dikuubɛɛwiai, waabuu ɔɔ ra hiini banla n ɛɛ nɛchɔgaa, di ra binnuu pɛɛ, ba wɔɔ ra jaami ani u huma la. Awia, ií dɔɔ sisɔna nɛra ni, gunla ii Mɛɛ Kɔraawiizi n dɔɔ sisɔna nɛra ni la.


Ií gilɛɛ waa tɛɛ ii dɔŋahina chɔgri, Kɔ́raawiizi ge gilɛɛ waa tɛɛ ia chɔgri. Ií gilɛɛ waa ŋɔ ba hora waa deŋlee, Kɔ́raawiizi ge gilɛɛ waa ŋɔ ii hora waa deŋlee. Ií gil ra tɛɛ nɛra, Kɔ́raawiizi ge gil ra tɛɛ ia. Ií ra sunzi nɛra kuna. Kɔraawiizi ge daŋ sunzi ia kuna á du kaŋ alugɔ baŋ viili tassa u su purututu la. Gunnɛ ú ɛɛ tɛɛ ia. Gunla maga iin niŋ ɛɛ tɛɛ ii dɔŋahina, guŋ magaa bá ge bir ɛɛ tɛɛ ia.’ ”
U kaa ta sɛɛlii bɛl, di pɛɛzi, “Nyuŋŋi daŋ wer bagli nyuŋŋi ŋmɛnɛɛa? Ba maa banɛɛ wàá chol bɔɔ biiniaa? Bagli hiŋri wɔɔ kaalɛɛ. Ka di u wa bagluu u wia maa wa tuŋ, u ni u bagli la daŋ ɛɛ kpaŋ.
Daazeŋ himmaa n du i siwii biini, a guŋ wɛɛ titte, ka i ra ŋɔ daapussi la n du i dɔŋhiŋ siwii biini wiaa? Hiŋ ɔɔ ra tɛɛ i dɔŋhiŋ chɔgri la, a ɛɛwɔɔ lugɔ i ŋɔ u benii, ‘N baal, gil n lizi daapussi i siwii, ka daazeŋ du i hor.’ Nau! Nɛfugzii hiŋ! Lizi daazeŋ la n du i hor la mɔɔ, ka jaa wer na nɛnnɛ di wer lizi daapussi la i dɔŋhiŋ siwii la.


Daananii wàá wer nɔŋ nɔnchɔgaa. Daachɔgii ge wàá wer nɔŋ nɔnnanaa. Daazi nɔnaa ra bagli a wessi ni a chumaa. Ba waa fig nɔna ra na sɔɔh ni ra tɔrgi. Ba waa kaa ra na grepu nɔna choŋgollii ni ra tɔrgi. Nɛnanii daamaa winanaa. U ɛɛ winanaarɛ ra tɛɛ nɛra lii u daama la biini. Nɛchɔgii ge daamaa wichɔgaa. U ge ɛɛ wichɔgaarɛ ra tɛɛ nɛra di lii u daama la biini. Wia la n du nɛra bampiree biini, di winanaarɛ gɛɛ wichɔgaarɛ, aabuu ɔɔ ra lii ba nuuzi.


Ɛrɛɛ wiarɛ ii ɔɔ ra yiriŋ, ‘N Dɔɔri, n Dɔɔri,’ ka ii waa n nua ra hiŋɛi? Di nɛr maa wa ba n be di ra nuu n wiŋɔzi di ra ɛɛ gunla miŋ ŋɔwɛɛ, n daŋ bagli ia gunla un duwɛɛ. U ɛɛwɔɔ lugɔ baal bɛl n ma dia. Uŋ faa ŋɔ ú ma dia la, u kiubuu mɔɔ di gil a dia zɛɛ hɔŋ bii ni. Uŋ wa ma dia la tuŋ, dooŋ ba, nii su pal ba waa yag dia la. Ka waa wette ɛɛu wiimaa dikuu um mau nɛnnɛ la wia. Ama, nɛr la maa ge n niŋ nuu n wiŋɔzi naa ka wàá ra hiŋ, u ge ɛɛwɔɔ lugɔ baal bɛl n ma dia. Waa u zɛɛ chiŋŋɛɛ nɛnnɛ ka mau guŋ hɛri ni. Denii dooŋ ba, nii su pal ra ba wa yag dia la, u chol birim! U maa chɔgi.”

Listen to Luuk 6