Tibetan, Central:དམ་པའི་གསུང་རབ་བོད་འགྱུར་གསར་མ། (Bible)

དབུས། Central

ཨ་མདོ། Amdo

ཁམས། Kham

དམ་པའི་གསུང་རབ། བོད་འགྱུར་གསར་མ།

(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན། (cc) 2016-2023 New Tibetan Bible translation committee. The Holy Bible in Modern Literary Tibetan, New Tibetan Bible translation. This translation is made available under the terms of the Creative Commons Attribution-NonCommercial-NoDerivatives 4.0 International license. * Attribution: When using the New Tibetan Bible text, you must credit the New Tibetan Bible (new-tibetan-bible.com) as the source. * NonCommercial: You may not sell the New Tibetan Bible text or use it for commercial purposes. * NoDerivatives: You may share the New Tibetan Bible text, but you may not change it.

དེས་ན་ངེད་ཅག་གིས་ཅི་ཞིག་སྨྲའམ། ལུས་པོའི་ཆ་ནས་བདག་ཅག་གི་མེས་པོ་ཡིན་པའི་ཨབ་ར་ཧམ་ལ་ཅི་ཞིག་ཐོབ་བམ། གལ༌ཏེ། ཨབ་ར་ཧམ་ནི་བྱ་སྤྱོད་ལ་བརྟེན་ནས་མི་རྣམ་དག་ཏུ་བརྩིས་པ་ཡིན༌ན། ཁོང་ལ་བསྟོད་འོས་པ་ཡིན། འོན༌ཀྱང༌། དཀོན་མཆོག་གི་སྤྱན་སྔར་བསྟོད་འོས་པ་ཅི་ཡང་མེད་དོ།། གསུང་རབ་ཀྱི་མདོ་ལས་ཇི་ལྟར་གསུངས་སམ་ཞེ༌ན། འདི་སྐད༌དུ། ཨབ་ར་ཧམ་གྱིས་དཀོན་མཆོག་ལ་དད་པ་བྱས་པ༌དང༌། དཀོན་མཆོག་གིས་ཀྱང་ཁོང་ནི་མི་རྣམ་དག་ཏུ་བརྩིས་པ་ཡིན་ཞེས་གསུངས་སོ།། སྤྱིར་ལས་ཀ་བྱེད་མཁན་ལ་གླ་ཆ་འཐོབ་འོས་པ༌དང༌། དེ་ནི་བཀའ་དྲིན་མ་ཡིན་པར་ལས་ཀ་ལྟར་གླ་ཆ་འཐོབ་འོས་པ་ཡིན། འོན༌ཀྱང༌། ངལ་དུབ་མི་བྱེད་ཅིང་དད་གུས་མེད་པ་ཞིག་མི་རྣམ་དག་ཏུ་བརྩི་བའི་དཀོན་མཆོག་ལ་དད་པ་བྱས༌ན། དད་པའི་དབང་གིས་ཁོ་ནི་མི་རྣམ་དག་ཏུ་བརྩིས་པ་ཡིན་ནོ།། དེ་ཡང་དཀོན་མཆོག་གིས་བྱ་སྤྱོད་ལ་མ་གཟིགས༌པར། རྣམ་དག་ཏུ་བརྩིས་ཤིང་བྱིན་གྱིས་བརླབས་པའི་མི་ཡི་སྐོར་ལ་དཱ་བིད་ཀྱིས་ཀྱང་འདི་སྐད༌དུ།
གང་གི་ཉེས་པ་བསལ་བས་བྱིན་རླབས༌ཆེ།།
གང་གི་སྡིག་པ་བཀབ་པས་མི་དེ༌བདེ།།
དཀོན་མཆོག་ཉིད་ཀྱིས་སྡིག་པར་མི་བརྩི༌བའི།།
མི་དེ་རྣམས་ནི་བྱིན་རླབས༌ཆེ་བ་ཡིན།།
ཞེས་པའོ།། དེས༌ན། བྱིན་རླབས་དེ་ནི་མཚན་སྐྱི་བཅད་པའི་མི་རྣམས་ཁོ་ནར་གནང༌ངམ། མཚན་སྐྱི་མ་བཅད་པའི་མི་རྣམས་ལའང་གནང་བ་མ་ཡིན༌ནམ། ངེད་ཅག་གིས། ཨབ་ར་ཧམ་གྱི་དད་པས་ཁོང་ནི་མི་རྣམ་དག་ཏུ་བརྩིས་པ་ཡིན་ཞེས་སྨྲ་བས་སོ།། དེ་ནི་ཅི་ལྟར་བརྩིས༌སམ། ཁོང་ལ་མཚན་སྐྱི་གཅོད་པའི་དུས་ཡིན༌ནམ། ཡང་ན་ཁོང་ལ་མཚན་སྐྱི་མ་བཅད་པའི་དུས་ཡིན་ནམ་ཞེ༌ན། མཚན་སྐྱི་གཅོད་པའི་དུས་མ་ཡིན་པར་མཚན་སྐྱི་མ་བཅད་པའི་དུས་ཡིན་ལ། ཁོང་ལ་མཚན་སྐྱི་བཅད་པའི་དཔང་རྟགས་ཐོབ་པ་ཡིན། དེ་ནི་མཚན་སྐྱི་མ་བཅད་པའི་དུས་སུ་དད་པ་ལ་བརྟེན་ནས་མི་རྣམ་དག་ཏུ་བརྩིས་པའི་རྟགས་མཚན་ཞིག་ཡིན་ཏེ། ཁོང་ནི་མཚན་སྐྱི་མ་བཅད་ཅིང་དད་པ་ཡོད་པའི་མི་ཐམས་ཅད་ཀྱི་མེས་པོར་གྱུར་པ༌དང༌། མི་དེ་རྣམས་ཀྱང་མི་རྣམ་དག་ཏུ་བརྩི་བར་མཛད་པའི་ཕྱིར༌ཡིན། ཡང་ཁོང་ནི་མཚན་སྐྱི་བཅད་པ་རྣམས་ཀྱི་མེས་པོར་གྱུར་ཏེ། མཚན་སྐྱི་བཅད་ཟིན་པར་མ༌ཟད། ཁོང་གི་དད་པའི་རྗེས་སུ་འབྲངས་པའི་མི་རྣམས་ཀྱི་མེས་པོ་ཡང་ཡིན་ལ། བདག་ཅག་གི་མེས་པོ་ཨབ་ར་ཧམ་ལ་མཚན་སྐྱི་མ་བཅད་པའི་དུས་སུ་དད་པ་དེ་ཡོད་པའོ།།
རྒྱུ་མཚན་ནི་དཀོན་མཆོག་གིས་ཨབ་ར་ཧམ་དང་ཁོང་གི་རིགས་རྒྱུད་ཕྱི་མ་རྣམས་ལ་འཇིག་རྟེན་གྱི་རྒྱུན་འཛིན་མཁན་དུ་འགྱུར་བའི་ཞལ་བཞེས་གནང༌ཞིང༌། དེ་ནི་བཀའ་ཁྲིམས་ལ་བརྟེན་པ་མ་ཡིན་པར། དད་པའི་དབང་གིས་མི་རྣམ་དག་ཏུ་བརྩིས་པ་དེ་ལ་བརྟེན་པའི་ཕྱིར༌རོ།། གལ༌ཏེ། བཀའ་ཁྲིམས་ལ་གཏོགས་པའི་མི་དེ་ད་བཟོད་རྒྱུན་འཛིན་མཁན་ཡིན༌ན། དད་པ་ནི་སྟོང་བར་འགྱུར་ཞིང་ཞལ་བཞེས་ཀྱང་མེད་པར་འགྱུར། ཅིའི་ཕྱིར་ཞེ་ན། བཀའ་ཁྲིམས་ནི་ཁྲོ་བའི་རྒྱུ་ཡིན༌ཏེ། བཀའ་ཁྲིམས་མེད་ན་དེ་དང་འགལ་བའི་ལས་ཀྱང་མེད་པའི་ཕྱིར༌རོ།།
དེ་བས་རྒྱུན་འཛིན་མཁན་དུ་གྱུར་པ་ནི་དད་པའི་དབང་གིས་ཡིན༌ཏེ། ཐུགས་རྗེ་ལ་གཏོགས་པའི་ཕྱིར༌རོ།། དེ་ནི་རིགས་རྒྱུད་ཕྱི་མ་ཐམས་ཅད་ལས་བཀའ་ཁྲིམས་ལ་གཏོགས་པའི་མི་རྣམས་ལ་ཞལ་བཞེས་གནང་ངེས་པར་མ༌ཟད། ཨབ་ར་ཧམ་གྱི་དད་པ་ལྟར་དད་པ་བྱེད་མཁན་ལའང་ཞལ་བཞེས་གནང༌བ་ཡིན། ཨབ་ར་ཧམ་ནི་བདག་ཅག་ཐམས་ཅད་ཀྱི་མེས་པོ་ཡིན་ནོ།། དེ་ལ་གསུང་རབ་ཀྱི་མདོ་ལས་ཇི་སྐད༌དུ། བདག་གིས་ཁྱོད་ནི་མི་རིགས་མང་པོའི་མེས་པོར་བྱེད་ཅེས་བཀོད་པ་བཞིན། ཁོང་ཉིད་ནི་དཀོན་མཆོག་གི་སྤྱན་སྔ་ནས་བདག་ཅག་གི་མེས་པོར་མཛད༌པ་དང་། ཁོང་གི་དད་ཡུལ་ནི་འཆི་བ་ལ་ཚེ་སྲོག་གནང་བ་དང་། མེད་པ་ནི་ཡོད་པར་མཛད་པའི་དཀོན་མཆོག་ཡིན། ཁོང་ལ་རེ་སྒུག་མེད་པའི་དུས༌སུ། དད་པའི་དབང་གིས་རེ་སྒུག་བྱེད༌ཅིང༌། དེ་སྔར་ཁྱོད་ཀྱི་རིགས་རྒྱུད་ཀྱང་དེ་བཞིན་དུ་འབྱུང་བར་འགྱུར་ཞེས་གསུངས་པ་ལྟར་མི་རིགས་མང་པོའི་མེས་པོར་གྱུར་ཏོ།། ཁོང་ཉིད་དགུང་ལོ་བརྒྱ་ཙམ་དུ་སོན་པའི་དུས༌སུ། རང་གི་ལུས་པོ་ནི་འཆི་བ་དང་མཚུངས་པར་བསམས༌ཏེ། སཱ་ར་ལ་མངལ་སྦྲུམ་མཚམས་ཆད་འདུག༌ནའང༌། ཁོང་གི་དད་པ་ནི་ད་དུང་བརྟན་པོ་ཡིན༌ལ། དཀོན་མཆོག་གི་ཞལ་བཞེས་ལ་རེ་སྒུག་བྱེད་ཅིང་དད་པ་མེད་པའི་དབང་གིས་དེ་ལ་ཐེ་ཚོམ་སྐྱེས་པ༌མིན། དད་སེམས་བརྟན་པོར་གྱུར་ནས་དཀོན་མཆོག་ལ་བསྟོད་བསྔགས་བརྗོད༌ཅིང་། སེམས་གཏིང་ནས་དཀོན་མཆོག་གིས་ཞལ་བཞེས་གནང་བ་ལྟར་མཛད་ནུས་པར་ཡིད་ཆེས༌པ་ཡིན་ནོ།། དེའི༌ཕྱིར། དད་པའི་རྐྱེན་གྱིས་དཀོན་མཆོག་གིས་ཁོང་ནི་མི་རྣམ་དག་ཏུ་བརྩིས་པ་ཡིན། དེ་ལྟར་བརྩིས་པ་ཡིན་ཞེས་པའི་ཚིག་ནི་ཁོང་ཉིད་ཁོ་ནའི་ཕྱིར་ཡི་གེར་བཀོད་པ་མིན༌པར། བདག་ཅག་གི་ཆེད་དུའང་ཡི་གེར་བཀོད་པ་ཡིན༌ཏེ། རང་རེའི་གཙོ་བོ་ཡེ་ཤུ་གྲོངས་པ་ནས་སླར་གསོན་པར་མཛད་མཁན་དཀོན་མཆོག་ལ་དད་པ་བྱེད་པ་དང་། ཕྱིས་སུ་མི་རྣམ་དག་ཏུ་བརྩི་བར་འགྱུར་བ་ནི་བདག་ཅག་ཡིན། གཙོ་བོ་ཡེ་ཤུ་ནི་བདག་ཅག་གི་སྡིག་པའི་ཕྱིར་མི་གཞན་ལ་སྤྲད༌ཅིང༌། ཁོང་ཉིད་སླར་གསོན་པའང་བདག་ཅག་མི་རྣམ་དག་ཏུ་བརྩི་བའི་ཕྱིར་ཡིན༌ནོ།།

Listen to རོ་མཱ་པ། 4