Tibetan, Central:དམ་པའི་གསུང་རབ་བོད་འགྱུར་གསར་མ། (Bible)

དབུས། Central

ཨ་མདོ། Amdo

ཁམས། Kham

དམ་པའི་གསུང་རབ། བོད་འགྱུར་གསར་མ།

(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན། (cc) 2016-2023 New Tibetan Bible translation committee. The Holy Bible in Modern Literary Tibetan, New Tibetan Bible translation. This translation is made available under the terms of the Creative Commons Attribution-NonCommercial-NoDerivatives 4.0 International license. * Attribution: When using the New Tibetan Bible text, you must credit the New Tibetan Bible (new-tibetan-bible.com) as the source. * NonCommercial: You may not sell the New Tibetan Bible text or use it for commercial purposes. * NoDerivatives: You may share the New Tibetan Bible text, but you may not change it.

དེ་ཡང་ཕོལ་ལོལ་ང་རང་ནི་མཱ་ཤི་ཀ་ཡེ་ཤུའི་ཞབས་ཕྱི་པ་ཞིག་ཡིན༌ཞིང༌། སྐུ་ཚབ་པར་ཞལ་འབོད་གནང་སྟེ་དཀོན་མཆོག་གི་འཕྲིན་བཟང་བསྒྲག་པར་ཆེད་དུ་བསྐོས་པ་ལགས། འཕྲིན་བཟང་འདི་ནི་དཀོན་མཆོག་གིས་སྔོན་ཆད་རང་ཉིད་ཀྱི་ལུང་སྟོན་པ་རྣམས་བརྒྱུད་ནས་དམ་པའི་གསུང་རབ་ཏུ་ཞལ་བཞེས་གནང༌ཞིང་། ཁོང་གི་སྲས་ཀྱི་སྐོར་ཡང་ཡིན་ལ། ལུས་ཕུང་ལྟར་སྨྲས་ན། ཁོང་ནི་དཱ་བིད་ཀྱི་གདུང་རྒྱུད་ནས་སྐུ་འཁྲུངས་ཤིང་། དམ་པའི་ཐུགས་ཉིད་ལྟར་སྨྲས་ན། གྲོངས་པ་ནས་སླར་གསོན་པར་གྱུར་པའི་རྐྱེན་གྱིས། མཐུ་སྟོབས་ཆེན་པོའི་ངང་ནས་དཀོན་མཆོག་གི་སྲས་ཡིན་པར་བསྟན༌ཅིང་། ཁོང་ཉིད་ནི་བདག་ཅག་གི་གཙོ་བོ་ཡེ་ཤུ་མཱ་ཤི་ཀ་ལགས་སོ༎ ངེད་ཅག་ལ་ཁོང་ཉིད་བརྒྱུད་ནས་ཐུགས་རྗེ་དང་སྐུ་ཚབ་པའི་འགན་འཁྲི་ཐོབ༌ཅིང་། དེ་ནི་ཁོང་གི་མཚན་གྱི༌ཕྱིར་ཕྱི་ཕྱོགས་ཀྱི་མི་རིགས་ཐམས་ཅད་ཀྱི་ཁྲོད་དུ། ཁོ་རྣམས་དད་པའི་བཀའ་ལ་མཉན་དུ་འཇུག་པའི་ཆེད་ཡིན། དེ་ལས་ཡེ་ཤུ་མཱ་ཤི་ཀར་གཏོགས་པར་ཞལ་འབོད་ཐོབ་མཁན་ཁྱོད་རྣམས་ཀྱང་མཆིས། བདག་གིས་འཕྲིན་ཡིག་འདི་ནི་དཀོན་མཆོག་གིས་གཅེས་ཤིང་དད་ལྡན་དམ་པར་ཞལ་འབོད་གནང་བའི་རོ་མཱའི་མི་རྣམས་ལ་འདི་ལྟར་སྤྲིངས་པ༌སྟེ། བདག་ཅག་གི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཁྱོད་རྣམས་ལ་ཐུགས་རྗེ་དང་ཞི་བདེ་འཐོབ་པར༌སྨོན།

དེ་ཡང་ཐོག་མར་ཁྱོད་ཅག་གི་དད་པ་ནི་འཇིག་རྟེན་ཡོངས་ལ་ཁྱབ་ཡོད༌པས། བདག་གིས་ཡེ་ཤུ་མཱ་ཤི་ཀར་བརྟེན་ནས་ཁྱོད་ཅག་ཐམས་ཅད་ཀྱི་ཆེད་དུ་རང་གི་དཀོན་མཆོག་ལ་བཀའ་དྲིན་ཞུའོ།། ངས་ཁོང་གི་སྲས་ཀྱི་འཕྲིན་བཟང་སྒྲོག་ཅིང་དེ་ལ་བརྟེན་ནས། སེམས་གཏིང་ནས་བསྙེན་བཀུར་བྱེད་པའི་དཀོན་མཆོག་ནི་བདག་གིས་གསོལ་བ་འདེབས་པའི་དུས༌སུ་རྒྱུན་ཆད་མེད་པར་ཁྱོད་ཅག་གླེང་བའི་དོན་དེར་བདེན་དཔང་མཛད་མཁན་ཡིན་ལ། ངས་རྟག་ཏུ་ཞུ་བ་བྱེད་པ་དེ་དཀོན་མཆོག་གི་དགོངས་པ་ལྟར་ཡིན༌ན། ང་རང་མཐའ་མར་ཁྱོད་ཅག་གི་གམ་དུ་འགྲོ་བར་ལམ་བདེ་མོ་ཞིག་ཡོད་པར་འགྱུར། ང་ལ་ཁྱོད་རྣམས་མཐོང་འདོད་ཆེན་པོ་ཡོད་དེ། དམ་པའི་ཐུགས་ཉིད་ཀྱི་གནང་སྦྱིན་གང་ཞིག་ཁྱོད་ཅག་ལ་སྦྱིན་པ༌དང༌། ཁྱོད་ཅག་གི་དད་པ་ཇེ་བརྟན་དུ་གཏོང༌བའི་ཕྱིར་ཡིན། དེ་ལྟར་བྱས༌ན། ང་ནི་ཁྱོད་ཅག་གི་ཁྲོད་དུ་གནས༌ཤིང༌། བདག་ཅག་ཕན་ཚུན་བར་གྱི་དད་སེམས་ཀྱི་རྐྱེན༌གྱིས། བདག་ཅག་ལ་མཉམ་དུ་སེམས་གསོ་འཐོབ་པར་འགྱུར་རོ།། སྤུན་ཟླ༌རྣམས། ངས་ཁྱོད་རྣམས་ལ་གང་ཞིག་ཤེས་སུ་འཇུག་འདོད་པ༌ནི། ང་རང་ཁྱོད་ཅག་གི་གམ་དུ་ཡང་ཡང་འགྲོ་བར་རྩོམ༌ཞིང༌། ཁྱོད་རྣམས་ཀྱི་ཁྲོད་ནས་འབྲས་བུ་འགའ་རེ་འཐོབ་འདོད་ཅིང་། དེ་ནི་ཕྱི་ཕྱོགས་པ་གཞན་དག་ལས་འཐོབ་འདོད་པ་དང་མཚུངས་ནའང་ད་ལྟའི་བར་དུ་བཀག་རྒྱ༌ཡོད་པ་ཡིན། གྷི་རིག་པ་དང་མཐའ་འཁོབ༌པ། རིག་པ་ཅན་དང་རིག་རྟུལ་ཅན་བཅས་གང་ཡིན༌ཡང༌། བདག་གིས་དེ་དག་ལ་འགན་འཁུར་དགོས༌པས། ངས་རང་ནུས་ཅི་ལྕོགས་ཀྱིས་རོ་མཱ་རུ་ཡོད་པ་ཁྱོད་རྣམས་ལའང་དཀོན་མཆོག་གི་འཕྲིན་བཟང་བསྒྲག་འདོད་དོ༎
རྒྱུ་མཚན་ནི་བདག་གིས་འཕྲིན་བཟང་ངོ་ཚ་ཞིག་ཏུ་མི་བརྩིའོ།། འཕྲིན་བཟང་ནི་ཐོག་མར་ཡ་ཧུ་དཱ་པ་དང་ཕྱིས་སུ་གྷི་རིག་པ་སྟེ། དད་པ་ཅན་ཐམས་ཅད་སྐྱོབ་པར་བྱེད་པའི་དཀོན་མཆོག་གི་ནུས་མཐུ་ཆེན་པོ་ཡིན༌པའི་ཕྱིར་རོ།། དེ་ནི་དཀོན་མཆོག་གི་རྣམ་པར་དག་པ་ནི་འཕྲིན་བཟང་ལ་བརྟེན་ནས་མངོན་པ་ཡིན༌ཞིང་། དད་པ་ལས་བྱུང་ཞིང་སླར་ཡང་དད་པ་ལ་བརྟེན་པའི་ཕྱིར་ཡིན། དེ་ལ་གསུང་རབ་ཀྱི་མདོ་ལས་ཇི་སྐད༌དུ། མི་རྣམ་དག་ནི་དད་པའི་སྒོ་ནས་འཚོ་བར་འགྱུར་ཞེས་བཀོད་ཡོད་པ་བཞིན༌ནོ།།

དེ་ཡང་དཀོན་མཆོག་གི་ཐུགས་ཁྲོ་ནི་ནམ་མཁའི་ཞིང་ཁམས་ནས་དད་གུས་མེད་པ་དང་རང་གཤིས་མི་དྲང་བ་ཐམས་ཅད་ཀྱི་སྟེང་དུ་མངོན་པར་བྱེད་པ་ཡིན་ནོ།། དེ་དག་ནི་ལས་ངན་པ་བྱས་ནས་དཀོན་མཆོག་གི་བདེན་པ་ཉིད་མར་གནོན་མཁན་ཡིན། རྒྱུ་མཚན་ནི་དཀོན་མཆོག་གི་སྐོར་ཤེས་ཐུབ་པ་ནི་མི་དེ་དག་གི་སེམས་ཁོང་དུ་མངོན་ཡོད་པ་ཡིན༌ལ། དེ་ནི་དཀོན་མཆོག་གིས་མི་དེ་དག་ལ་མངོན་པར་མཛད་ཡོད་པའི་ཕྱིར་ཡིན་ཞིང་། འཇིག་རྟེན་ཁམས་བསྐྲུན་པའི་ཚུན༌ལ། དཀོན་མཆོག་གི་ཐོག་མཐའ་མེད་པའི་མཐུ་སྟོབས་དང་ཁྱད་དུ་འཕགས་པའི་རང་གཤིས་ནི་མཐོང་དུ་མེད་ནའང་། དངོས་གནས་གསལ་པོར་ཤེས་ཐུབ༌སྟེ། དངོས་པོ་བསྐྲུན་ཡོད་པ་དེ་དག་ལ་བལྟས་ནས་ཤེས་ཐུབ་པས་མི་དེ་ཐམས་ཅད་ལ་ཁག་དཀྲི་ས་མེད་དོ།། ཅིའི་ཕྱིར་ཞེ་ན། མི་དེ་དག་གིས་དཀོན་མཆོག་ངོ་ཤེས་ནའང་། ཁོང་ནི་དཀོན་མཆོག་ཏུ་མ་བརྩིས་ཤིང་ཁོང་ལ་འབུལ་འོས་པའི་བསྟོད་པ་མ་ཕུལ་བ་དང་བཀའ་དྲིན་ཡང་མ་ཞུས་པ་རེད། ཁོ་རྣམས་ཀྱི་དྲན་ཚུལ་ནི་སྟོང་བར་གྱུར་པ་དང་བླུན་པོའི་སེམས་ལའང་མུན་པས་ཁེངས་ཡོད་པའི་ཕྱིར༌རོ།། རང་ཉིད་རིག་པ་ཅན་དུ་རློམ་ནའང་དོན་དུ་བླུན་པོ་རུ་གྱུར་པ༌དང༌། རྟག་པའི་དཀོན་མཆོག་གི་གཟི་བརྗིད་རིང་དུ་སྤངས་ཏེ། དེའི་ཚབ་ཏུ་མི་རྟག་པའི་མི༌དང༌། འདབ༌ཆགས། སུག་བཞི་ཅན་གྱི་སྲོག་ཆགས། ལྟོ་འགྲོ་སོགས་ཀྱི་གཟུགས་བརྙན་ལ་བརྟེན་པའོ།།
དེའི༌ཕྱིར། མི་དེ་དག་གིས་སེམས་ནང་གི་འདོད་ཆགས་ལྟར་མི་གཙང་བ་བྱེད་པ་དང༌། ཐ་ན་ཁོ་རྣམས་ཀྱིས་ཕན་ཚུན་གྱི་ལུས་པོ་བཙོག་པར་བཟོས་པའང་དཀོན་མཆོག་གིས་སྣང་མེད་དུ་བསྐྱུར་ཏོ།། དེ་ནི་ཁོ་རྣམས་ཀྱིས་དཀོན་མཆོག་གི་བདེན་པ་ཉིད་སྤངས༌ཏེ། དེའི་ཚབ་ཏུ་རྫུན་ལ་བརྟེན་ནས་དཀོན་མཆོག་གིས་བསྐྲུན་པའི་དངོས་པོ་ལ་བསྙེན་བཀུར་བྱེད་པ༌ལས། འཇིག་རྟེན་ཁམས་འགོད་མཁན་དཀོན་མཆོག་ལ་དད་པ་མི་བྱེད་པའི་ཕྱིར༌ཡིན། དཀོན་མཆོག་ལ་ནམ་ཡང་བསྔགས་བརྗོད་བྱ་འོས༌སོ།། ཨ༌མེན།
དེ་བས་ན་མི་དེ་རྣམས་ཀྱིས་ངོ་གནོང་བའི་འདོད་ཆགས་བག་མེད་དུ་སྤྱོད་པའང་དཀོན་མཆོག་གིས་སྣང་མེད་དུ་བསྐྱུར་ཏོ།། མི་དེ་དག་གི་བུད་མེད་རྣམས་ཀྱིས་ལས་སུ་རུང་བ་སྤངས་ཏེ། དེའི་ཚབ་ཏུ་ལས་མི་རུང་བ་སྤྱོད༌པ་རེད། སྐྱེས་པ་རྣམས་ཀྱང་དེ་བཞིན༌ཏེ། བུད་མེད་སྤྱོད་འོས་པ་རིང་དུ་སྤངས་ནས། འདོད་ཆགས་ཀྱི་མེ་ལྕེ་སེམས་སུ་འབར་ཞིང་། སྐྱེས་པ་ཕན་ཚུན་ལ་ཞེན་ཆགས་པ༌དང༌། སྐྱེས་པས་སྐྱེས་པ་ལ་ངོ་གནོང་དགོས་པའི་ལས་བྱས་པས། རང་གི་ལུས་སྟེང་དུ་ལོག་སྤྱོད་དེ་ལྟ་བུ་བྱེད་པ་ལ་ཉེས་ཆད་བྱུང༌ངོ༌།།
མི་དེ་དག་གིས་བསམ་བཞིན་དཀོན་མཆོག་ཤེས་མི་འདོད༌པས། ཁོང་གིས་དེ་དག་གི་སེམས་སུ་ལོག་སེམས་བཅངས་པ་དང་ལུགས་དང་འགལ་བའི་ལས་བྱེད་པའང་སྣང་མེད་དུ་བསྐྱུར་ཏོ།། མི་དེ་དག་གི་སེམས་སུ་དྲང་བདེན་མ་ཡིན་པ༌དང༌། སྡིག༌པ། བརྣབ༌སེམས། ངན༌སེམས། ཕྲག༌དོག མི་གསོད་པ། འགྲན༌རྩོད། གཡོ༌སྒྱུ། གདུག་རྩུབ་བཅས་སྣ་ཚོགས་ཀྱིས་བཀང་བ༌དང༌། ཡང་མི་དེ་དག་ནི་ཕྲ་མ་བྱེད་མཁན༌དང༌། ལྐོག་ནས་གཏམ་ངན་སྨྲ༌མཁན། དཀོན་མཆོག་ལ་སྡང༌མཁན། བརྙས་བཅོས་བྱེད༌མཁན། ང་རྒྱལ༌ཅན། རང་བསྟོད༌མཁན། ལས་ངན་པ་བཟོ༌མཁན། ཕ་མའི་ངག་ལ་མི་ཉན་པ། ཤེས་པས་རྨོངས་ཤིང་ཡིད་རྟོན་མེད་པ། བརྩེ་སེམས་དང་སྙིང་རྗེ་མེད་པ་བཅས་ཡིན་ནོ།། དེ་རྣམས་ཀྱིས་སྡིག་པའི་ལས་དེ་ལྟ་བུ་བྱེད་མཁན་ནི་འཆི་འོས་པ་ཡིན་ཞེས་དཀོན་མཆོག་གི་བཀའ་ལས་གསུངས་ཡོད་པ་ཤེས༌ནའང༌། རང་རང་གིས་སྡིག་པའི་ལས་བྱེད་པར་མ༌ཟད། མི་གཞན་གྱིས་དེ་བཞིན་བྱེད་པ་ལའང༌དགའོ།།

Listen to རོ་མཱ་པ། 1