Tibetan, Central:དམ་པའི་གསུང་རབ་བོད་འགྱུར་གསར་མ། (Bible)

དབུས། Central

ཨ་མདོ། Amdo

ཁམས། Kham

དམ་པའི་གསུང་རབ། བོད་འགྱུར་གསར་མ།

(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན། (cc) 2016-2023 New Tibetan Bible translation committee. The Holy Bible in Modern Literary Tibetan, New Tibetan Bible translation. This translation is made available under the terms of the Creative Commons Attribution-NonCommercial-NoDerivatives 4.0 International license. * Attribution: When using the New Tibetan Bible text, you must credit the New Tibetan Bible (new-tibetan-bible.com) as the source. * NonCommercial: You may not sell the New Tibetan Bible text or use it for commercial purposes. * NoDerivatives: You may share the New Tibetan Bible text, but you may not change it.

དོན་དེ་དག་བྱུང་བའི་རྗེས༌སུ། སྐྱབས་མགོན་ཡེ་ཤུས་ཐེ་པེར་ཡཱ་མཚོ་འགྲམ་དུ་སླར་ཡང་ཐུགས་སྲས་རྣམས་ལ་རང་ཉིད་ཀྱི་སྐུ་གཟུགས་མངོན་པར་མཛད། ཇི་ལྟར་མངོན་པ་ནི་འདི་ལྟ༌སྟེ། སི་མོན་པེ་ཏྲོ༌དང༌། མཚེ་མ་ཞེས་ཀྱང་འབོད་པའི་ཐོ་མཱ༌དང༌། ག་ལིལ་ཡུལ་གྱི་ཀ་ནཱ་ཡི་ནཱ་ཐན་ཨེལ༌དང༌། ཟེ་བད་ཡའི་བུ་གཉིས་དང༌། ཁོང་གི་ཐུགས་སྲས་གཞན་གཉིས་བཅས་མཉམ་དུ་ཡོད༌པ་རེད། དེ་ནས་སི་མོན་པེ་ཏྲོ་ན༌རེ། ང་རང་ཉ་འཛིན་དུ་འགྲོའོ་ཞེས་སྨྲས་པ༌ལ། དེ་རྣམས་ཀྱིས་ངེད་ཅག་ཀྱང་ཁྱོད་དང་ལྷན་དུ་འགྲོ་དགོས་ཞེས་སྨྲས་སོ།། དེ་ནས་ཁོ་རྣམས་གྲུར་བསྡད་ནས་སོང༌ཡང༌མཚན་མོ་དེར་ཉ་ཅི་ཡང་མ་ཟིན་ཏོ།།
ནམ་ལངས་པའི་དུས༌སུ། སྐྱབས་མགོན་ཡེ་ཤུ་མཚོ་འགྲམ་དུ་བཞུགས༌ཤིང༌། དེ་རྣམས་ཀྱིས་ཁོང་ནི་སྐྱབས་མགོན་ཡེ་ཤུ་ཡིན་པ་ཤེས་མ་བྱུང་། སྐྱབས་མགོན་ཡེ་ཤུས་དེ་རྣམས་ལ་འདི་སྐད༌དུ། ཀྱེ། བུ་ཕྲུག༌རྣམས། ཁྱོད་ཅག་ལ་ཉ་ཡོད་དམ་ཞེས་གསུངས་པ༌ན། དེ་དག་གིས་མེད་ཅེས་སྨྲས་སོ།། ཡང་ཁོང་གིས་འདི་སྐད༌དུ། ཁྱོད་རྣམས་ཀྱིས་གྲུའི་གཡས་ཕྱོགས་སུ་དྲ་རྒྱ་གཏོར་དང་ཉ་ཟིན་པར་འགྱུར་ཞེས་གསུངས་སོ།། དེ་ནས་ཁོ་རྣམས་ཀྱིས་དྲ་རྒྱ་འཕངས༌ཏེ་ཉ་མང་པོ་བཟུང་བས་དྲ་རྒྱ་ཕྱིར་མཚོ་གྲུའི་ནང་དུ་འཐེན་མ་ཐུབ༌བོ།། དེ་ནས་སྐྱབས་མགོན་ཡེ་ཤུའི་གཅེས་པའི་ཐུགས་སྲས་དེས་པེ་ཏྲོ༌ལ། ཁོང་ནི་གཙོ་བོ་ལགས་ཞེས་སྨྲས་སོ།། སི་མོན་པེ་ཏྲོས་ནང་གོས་གྱོན་ནས་སྡོད་པ༌ལ། ཁོང་ནི་གཙོ་བོ་ལགས་ཞེས་པ་ཐོས་མ༌ཐག ཕྱི་གོས་རྐེད་པར་བཅིངས་ཏེ་མཚོ་ནང་དུ་མཆོངས་སོ།། ཐུགས་སྲས་གཞན་རྣམས་གྲུར་བསྡད་ནས། མཚོ་འགྲམ་དང་ཧ་ལམ་བར་ཐག་གཞུ་འདོམ་ལྔ་བཅུ་ཙམ་མ་གཏོགས་མེད་པའི་མཚོ་སྟེང་ནས་ཉ་ཡིས་གང་བའི་དྲ་རྒྱ་དྲུད་ཡོང༌ངོ་།།
དེ་ནས་ཁོ་རྣམས་མཚོ་འགྲམ་དུ་སླེབས་པ༌ན། གནས་དེར་སོལ་བའི་མེ་སྦར་བ་དང་མེའི་སྟེང་དུ་ཉ་ཤ་བཞག་འདུག་ལ་བག་ལེབ་ཀྱང་ཡོད་པ་མཐོང༌། དེ་ནས་སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་ཀྱིས་བཟུང་བའི་ཉ་ཁ་ཤས་འདིར་ཁྱེར་ཤོག་ཅེས་གསུངས་པ༌དང༌། སི་མོན་པེ་ཏྲོ་གྲུའི་ནང་དུ་སོང་ནས་མཚོ་འགྲམ་དུ་དྲ་རྒྱ་འཐེན་པ༌ན། དྲ་རྒྱའི་ནང་དུ་ཉ་ཆེན་པོ་བསྡོམས་པས་བརྒྱ་དང་ང་གསུམ་གྱིས་ཁེངས་ཡོད༌ལ། ཉ་དེ་འདྲ་མང་ཡང་དྲ་རྒྱ་མ་ཆད༌པ་རེད། དེ་ནས་སྐྱབས་མགོན་ཡེ་ཤུས་འདི་སྐད༌དུ། ཚུར་ཤོག་ལ་ནངས་ཇ་བཞེས་ཤིག་ཅེས་གསུངས་པ༌དང༌། དེ་རྣམས་ཀྱིས་གཙོ་བོ་ཡིན་པ་ཤེས༌ཏེ། སུས་ཀྱང་ཁོང་ལ་ཁྱེད་རང་སུ་ཡིན་ནམ་ཞེས་ཞུ་མ་ཕོད་དོ།། དེ་ནས་སྐྱབས་མགོན་ཡེ་ཤུ་ཕེབས་ཡོང་ཞིང་ཕྱག་ཏུ་བག་ལེབ་བསྣམས་ཏེ་ཁོ་རྣམས་ལ་གནང༌ཞིང་། ཉ་ཡང་དེ་བཞིན་དུ་གནང་བ་རེད། འདི་ནི་སྐྱབས་མགོན་ཡེ་ཤུ་སྐུ་གཤེགས་པ་ནས་སླར་གསོན་རྗེས་ཐེངས་གསུམ་པར་ཐུགས་སྲས་རྣམས་ལ་རང་ཉིད་ཀྱི་སྐུ་གཟུགས་མངོན་པར་མཛད་པ་ཡིན༌ནོ།།

དེ་ནས་ཁོང་རྣམས་ཀྱིས་ནངས་ཇ་བཞེས་ཚར་བ༌དང༌། སྐྱབས་མགོན་ཡེ་ཤུས་སི་མོན་པེ་ཏྲོ་ལ་འདི་སྐད༌དུ། ཀྱེ། ཡོ་ཧ་ནན་གྱི་བུ་སི༌མོན། ཁྱོད་ཀྱིས་ང་རང་ལ་འདི་རྣམས་ལས་ཀྱང་ལྷག་པར་གཅེས་སམ་ཞེས་གསུངས་པ༌ལ། པེ་ཏྲོ་ན༌རེ། གཙོ་བོ༌ལགས། གཅེས༌པ་ཡིན། བདག་གིས་ཁྱེད་ལ་གཅེས་པ་ཁྱེད་ཀྱིས་མཁྱེན་པ་ཡིན་ཞེས་ཞུས་པ༌དང༌། ཡང་ཁོང་གིས་འདི་སྐད༌དུ། ཁྱོད་ཀྱིས་བདག་གི་ལུ་གུ་རྣམས་སྐྱོངས་ཤིག་ཅེས་གསུངས་སོ།། དེ་ནས་སྐྱབས་མགོན་ཡེ་ཤུས་ཁོ་ལ་ཐེངས་གཉིས་པར་འདི་སྐད༌དུ། ཀྱེ། ཡོ་ཧ་ནན་གྱི་བུ་སི༌མོན། ཁྱོད་ཀྱིས་ང་རང་ལ་གཅེས་སམ་ཞེས་གསུངས་པ༌ན། པེ་ཏྲོ་ན༌རེ། གཙོ་བོ༌ལགས། གཅེས༌པ་ཡིན། བདག་གིས་ཁྱེད་ལ་གཅེས་པ་ཁྱེད་ཀྱིས་མཁྱེན་པ་ཡིན་ཞེས་ཞུས་པ༌དང༌། ཡང་ཁོང་གིས་འདི་སྐད༌དུ། ཁྱོད་ཀྱིས་བདག་གི་ལུག་རྣམས་སྐྱོངས་ཤིག་ཅེས་གསུངས་སོ།། དེ་ནས་སྐྱབས་མགོན་ཡེ་ཤུས་ཐེངས་གསུམ་པར་ཡང་ཁོ་ལ་འདི་སྐད༌དུ། ཀྱེ། ཡོ་ཧ་ནན་གྱི་བུ་སི༌མོན། ཁྱོད་ཀྱིས་ང་རང་ལ་གཅེས་སམ་ཞེས་ཐེངས་གསུམ་ལ་གསུངས་པས་པེ་ཏྲོའི་སེམས་སྐྱོ་བར་གྱུར་ཏེ་ན༌རེ། གཙོ་བོ༌ལགས། ཁྱེད་ནི་དོན་ཀུན་མཁྱེན་པ་ཡིན༌པས། ངས་ཁྱེད་ལ་གཅེས་པ་ཁྱེད་ཀྱིས་མཁྱེན་ནོ་ཞེས་ཞུས་པ༌ལ། ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་བདག་གི་ལུག་རྣམས་སྐྱོངས༌ཤིག ངས་ཁྱོད་ལ་ཡང་དག་པར་བདེན་པར་སྨྲ༌སྟེ། ཁྱོད་རང་ལོ་ན་གཞོན་དུས་རང་གི་སྐ་རགས་རང་གིས་བཅིངས་ཏེ་གང་དགར་བསྐྱོད༌པ་ཡིན། འོན་ཀྱང་ལོ་ན་རྒས་དུས་ཁྱོད་ཀྱིས་ལག་པ་བརྐྱངས་ཤིང་མི་གཞན་གྱིས་ཁྱོད་རང་བསྡམས་ཏེ་འགྲོ་འདོད་མེད་པའི་གནས་སུ་འཁྲིད་པར་འགྱུར་ཞེས་གསུངས་སོ།། སྐྱབས་མགོན་ཡེ་ཤུའི་གསུང་འདིས་པེ་ཏྲོ་ཇི་ལྟར་འཆི་བའི་སྒོ་ནས་དཀོན་མཆོག་གི་གཟི་བརྗིད་མངོན་པར་འགྱུར་བའི་སྐོར་ལུང་བསྟན་གནང༌བ་རེད། དེ་ནས་ཡང་སྐྱབས་མགོན་ཡེ་ཤུས་པེ་ཏྲོ་ལ་འདི་སྐད༌དུ། ཁྱོད་རང་བདག་གི་རྗེས་སུ་ཤོག་ཅེས་གསུངས་སོ།། དེ་ནས་པེ་ཏྲོས་ཁ་ཕྱིར་འཁོར་ནས་བལྟས་པ༌ན། སྐྱབས་མགོན་ཡེ་ཤུའི་གཅེས་པའི་ཐུགས་སྲས་དེའང་རྗེས་སུ་འབྲངས་ཡོད་པ་མཐོང༌། ཐུགས་སྲས་དེ་ནི་སྔར་དགོང་ཟས་བཞེས་དུས་རང་གི་མགོ་བོ་སྐྱབས་མགོན་ཡེ་ཤུའི་སྐུ་བྲང་ལ་བསྔས༌ཏེ། གཙོ་བོ༌ལགས། ཁྱེད་རང་ལ་ངོ་ལོག་བྱེད་མཁན་དེ་སུ་ཡིན་ནམ་ཞེས་འདྲི་མཁན་དེ་ཡིན་ནོ།། དེ་ནས་པེ་ཏྲོས་ཁོ་རང་མཐོང་སྟེ་ན༌རེ། གཙོ་བོ༌ལགས། མི་འདི་ལ་དོན་ཅི་ཞིག་འབྱུང་ངམ་ཞེས་ཞུས་པ༌དང༌། སྐྱབས་མགོན་ཡེ་ཤུས་འདི་སྐད༌དུ། གལ་ཏེ་མ་འོངས་པར་ང་རང་ཕྱིར་ཡོང་བའི་བར༌དུ། ཁོ་རང་ད་དུང་གསོན་པོར་གནས་ཤིང་ང་རང་ཡང་དོན་དེར་དགའ་བ་ཡིན༌ན། ཁྱོད་ལ་འབྲེལ་བ་ཅི་ཡོད༌དམ། ཁྱོད་རང་བདག་གི་རྗེས་སུ་འབྲང་བར་གྱིས་ཞེས་གསུངས་སོ།། དེའི༌ཕྱིར། སྐྱབས་མགོན་ཡེ་ཤུའི་གསུང་དེ་སྤུན་ཟླའི་ཁྲོད་དུ་གྲགས་ཤིང་ཐུགས་སྲས་དེ་མི་འཆི་བ་ཡིན་ཞེས་སྨྲས་སོ།། འོན༌ཀྱང༌། དེ་ནི་སྐྱབས་མགོན་ཡེ་ཤུས་ཐུགས་སྲས་དེ་མི་འཆི་བ་ཡིན་ཞེས་གསུངས་པ་མ་ཡིན༌པར། གལ་ཏེ་མ་འོངས་པར་ང་རང་ཕྱིར་ཡོང་བའི་བར༌དུ། ཁོ་རང་ད་དུང་གསོན་པོར་གནས་ཤིང་ང་རང་ཡང་དོན་དེར་དགའ་བ་ཡིན༌ན། ཁྱོད་དང་འབྲེལ་བ་ཅི་ཡོད་དམ་ཞེས་གསུངས༌པའོ།།

དོན་འདི་རྣམས་ལ་བདེན་དཔང་བྱེད་པ་དང་དོན་འདི་རྣམས་ཡི་གེར་འགོད་མཁན་ནི་ཐུགས་སྲས་ཁོ་རང་ཡིན། ངེད་རྣམས་ཀྱིས་ཀྱང་ཁོང་གི་བདེན་དཔང་དེ་བདེན་པ་ཡིན་པའང་ཤེས་སོ།། སྐྱབས་མགོན་ཡེ་ཤུས་མཛད་པའི་འཕྲིན་ལས་ཤིན་ཏུ་མང་ཡང་བདག་གི་བསམ་ཚུལ༌ལ། གལ་སྲིད་མཛད་འཕྲིན་ཐམས་ཅད་རེ་རེ་བཞིན་ཡི་གེར་བཀོད༌ན། བྲིས་པའི་དཔེ་ཆ་རྣམས་འཇིག་རྟེན་འདིར་ཡང་མི་ཤོང་ངོ་།། །།

Listen to ཡོ་ཧ་ནན། 21