℗ Audio 2018 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

以下係上主通過 瑪拉基 啟示給 以色列 人个話。

上主講：「𠊎一直痛惜你等。」
總係你等應講：「你識樣般痛惜𠊎等呢？」
上主講：「 以掃 敢毋係 雅各 个兄弟？總係，𠊎惜 雅各 ， 惱 以掃 ，使 以掃 个山荒涼，將佢个土地交給曠野个野狗。」
若係 以掃 个後代 以東 人講：「𠊎等个城市受破壞，總係𠊎等愛將它重建起來」；上主 — 萬軍个元帥愛恁樣講：「由在佢等重建；總係，𠊎一定會將它拆掉。別人會喊佢等安到『罪惡个國』也係『上主永遠所惱个人民。』
「你等 以色列 人定著會親眼看到這事，也會講：『上主在 以色列 國外乜受尊重！』」

上主 — 萬軍个元帥對祭司講：「孻仔尊敬阿爸，僕人敬畏主人。𠊎係你等个阿爸，你等樣般毋尊敬𠊎？𠊎係你等个主人，你等樣毋敬畏𠊎？你等祭司藐視𠊎个名，還應講：『𠊎等㖠有藐視你个名？』 你等將無淨浰个食物獻在𠊎个祭壇頂，還問：『𠊎等㖠有褻瀆你呢？』係因為你等想：『上主个桌仔係做得藐視个。』 你等將瞙目个、跛腳个㧯有病个頭牲帶來獻給𠊎；這敢毋係可惡嗎？你等將恁樣个動物送給你个省長試看，看佢會歡喜麼？會看做係你个好意麼？」這係上主 — 萬軍个元帥講个。
你這兜祭司啊，去懇求上帝施恩給𠊎等！你等既然將恁樣个祭物獻給佢，佢一定毋會聽你等个祈禱！
上主 — 萬軍个元帥講：「𠊎當希望你等有人將聖殿个門關起來，你等就毋會在𠊎个祭壇頂點無用个火。𠊎無歡喜你等，也無愛接受你等个手所獻个祭物。 對日出到日落之地，萬國攏總尊敬𠊎。佢等在各地方向𠊎燒香，獻淨浰个祭物，因為𠊎 — 上主、萬軍元帥个聖名在萬國中受尊敬。 你等反轉褻瀆𠊎，講：『主个桌仔係垃圾个；桌頂个食物係𠊎等看毋上眼个。』 你等又講：『唉！還費氣噢！』就鼻孔翹翹毋插𠊎 — 上主、萬軍个元帥。你等將搶來个、跛腳个、有病个動物獻給𠊎。𠊎 — 上主敢會對你等个手接受恁樣个東西嗎？ 人許願愛將羊群中个好公羊獻給𠊎，反轉獻發病無正常个，恁樣欺騙个人應當受咒詛。因為𠊎係大君王！世上萬國攏總敬畏𠊎。𠊎 — 上主、萬軍个元帥恁樣宣佈了。」

Listen to 瑪拉基書 1