℗ Audio 2019 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

Hakka - (Han) Today's Taiwanese Hakka Bible (Drama NT)

議會全體䟘起來，將耶穌解送到 彼拉多 个面前去， 告佢講：「𠊎等發現這個人煽動𠊎等个同胞，喊𠊎等毋好納稅給皇帝，又自稱係基督，係王。」
彼拉多 問耶穌講：「你係 猶太 人个王麼？」
耶穌應講：「這係你講个。」
因為恁樣， 彼拉多 就對祭司長㧯眾人講：「𠊎查毋出這個人有麼介罪。」
總係，佢等越發堅持講：「佢借傳教个名，在 猶太 全地煽動民眾，對 加利利 開始，這下來到這位。」

彼拉多 一聽到這個話，就問講：「這個人係 加利利 人嗎？」 佢一知耶穌係對 希律 管轄个地區來个，就將佢送到 希律 該位去。 (該時， 希律 也在 耶路撒冷 。) 希律 看到耶穌，非常歡喜；因為佢聽過關係耶穌个事情，早就想愛見佢，希望看耶穌行神蹟。 所以，佢問耶穌好多問題，總係耶穌一句話也毋應佢。 該兜祭司長㧯經學教師進前來，盡力告佢。 希律 㧯佢个兵仔就㩢耍佢，並侮辱佢。然後，佢等拿一領盡靚个長袍著在佢身上，送佢倒轉 彼拉多 該位去。 在該日， 希律 㧯 彼拉多 成做朋友；佢兩儕本來係冤家。


彼拉多 召集祭司長、民間个領袖，㧯眾人來， 對佢等講：「你等將這個人解送到𠊎這位來，告佢煽動民眾；𠊎在你等个面前審問佢，總係查毋出佢有犯你等所告佢个任何罪名。 連 希律 也查毋出佢有麼介罪，所以將佢送倒轉這位來。恁樣看來，佢並無做麼介該死个事情。 𠊎愛喊人鞭打佢，然後放佢走。」
無想到，眾人卻齊聲喊講：「除掉佢！放 巴拉巴 給𠊎等！」 ( 巴拉巴 識在城肚作亂，也㓾過人，所以被人關在監獄肚。)
彼拉多 想愛放耶穌，就再一擺勸眾人。 總係佢等還較大聲喊講：「將佢釘十字架！將佢釘十字架！」
彼拉多 第三擺又問佢等講：「佢到底做麼介壞事？𠊎查毋出佢有麼介該死个罪。𠊎愛喊人鞭打佢，然後放佢走。」
眾人繼續大聲喊，堅持愛將耶穌釘十字架；最尾，佢等个大聲就得到勝利。 因為恁樣， 彼拉多 照佢等个要求宣判， 將佢等所求个，該作亂㓾人、關在監獄个兇手，放出來，將耶穌交給佢等，由在佢等處理。


兵仔將耶穌帶走，在路上堵到一個對鄉下入城个 古利奈 人，名安到 西門 个；佢等捉到佢，勉強佢擎十字架，跈等耶穌行。
有一大群个人跈等耶穌，其中有兜婦女為佢傷心大噭。 耶穌轉身，對姖等講：「 耶路撒冷 个婦女啊，毋使為𠊎噭，愛為你等自家㧯你等个子女噭！ 因為日仔會到，人會講：『無𫱔、無懷胎、無給孲𤘅仔食乳个，真有福氣噢！』 該時，人會對大山講：『磧在𠊎等身上啊！』又對細山講：『將𠊎等揜等！』 樹仔青青个時節，佢等還恁樣蹧踏它，樹仔枯燥个時，佢等个結局會樣般呢？」
佢等也帶兩個囚犯來，愛同耶穌共下處死刑。 佢等到一個地方，安到「頭那殼个山頭」，在該位，佢等將耶穌釘在十字架頂，同時也釘該兩個囚犯，一個在佢个右片，一個在佢个左片。 耶穌講：「阿爸啊，赦免佢等，因為佢等毋知自家做麼介。」
佢等抽籤仔來分耶穌个衫。 眾人企在該位看。 猶太 人个領袖也恥笑佢，講：「佢救了別人！佢若正經係上帝所揀選个基督，救佢自家嘛！」
該兜兵仔也㩢耍佢。佢等進前拿酸葡萄酒給佢啉， 講：「你若係 猶太 人个王，救你自家嘛！」
在佢頭那个頂高有牌仔寫講：「這係 猶太 人个王。」
兩個同佢共下釘十字架个囚犯，有一個也開嘴侮辱佢，講：「你毋係基督嗎？救你自家，也救𠊎等嘛！」
另外一個就責備該囚犯，講：「你既然係共下受刑罰个，敢毋驚上帝嗎？ 𠊎等受刑罰係應該个，因為𠊎等所受个係𠊎等个報應；總係這個人毋識行一件壞事。」 然後佢就對耶穌講：「耶穌啊，你做王降臨个時，求你毋好毋記得𠊎！」
耶穌對佢講：「𠊎實在㧯你講，今晡日你會同𠊎共下在樂園！」


大約係當晝个時，天烏地暗，直到下晝頭三點鐘。掛在聖殿肚个布簾裂做兩析。 耶穌大聲喊講：「阿爸啊，𠊎个靈魂交在你个手中！」講了這個話，佢就斷氣死掉。
該軍官看到這事个經過，就頌讚上帝講：「這個人實在係義人！」
圍等看个眾人看到這一切，全部捶等心肝轉去。 所有同耶穌熟事个人，㧯對 加利利 跈等佢來个婦人家，全部遠遠企等看這兜事个經過。


有一個名安到 約瑟 个人，係議會个議員，做人良善又正直； 議會个計謀㧯所做个，佢並無贊成。佢本來係 猶太 地方 亞利馬太 城个人，一直盼望上帝國个實現。 佢去見 彼拉多 ，要求收殮耶穌个遺體， 然後去將遺體取下來，用麻紗包好，放在石壁鑿成个墳墓底背；這墳墓吂識葬過人。 該日係預備日，安息日就會開始了。
該兜對 加利利 跈耶穌來个婦人家同 約瑟 共下去，有看到該墳墓，也清楚耶穌个遺體係樣般安葬个。 姖等就轉去，為佢个遺體準備香料㧯香油。
照法律个規定，姖等在安息日該日就休息。

Listen to 路加 23