℗ Audio 2019 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

Hakka - (Han) Today's Taiwanese Hakka Bible (Drama NT)

為到愛使𠊎等得到自由，基督已經釋放𠊎等了。所以，你等愛企在，毋好俾奴隸个軛再控制你等！
𠊎 — 保羅 正經㧯你等講，若係你等接受割禮，基督對你等就無麼介幫助。 𠊎再一擺警告逐個接受割禮个人，佢一定愛遵行全部个法律！ 你等想愛靠遵行法律來同上帝有正確關係个人，就係切斷同基督个關係，失落上帝个恩典。 論到𠊎等，𠊎等靠聖靈个力量，通過𠊎等个信心，迫切盼望上帝會使𠊎等同佢有正確个關係。 因為，同基督耶穌結連个時節，有受割禮抑係無受割禮攏總無麼介關係；重要个只有一項，就係用愛心个行動表現出來个信心。
你等一旦走到盡好！麼人攔等你等，害你等毋順從真理呢？ 這種勸話當然毋係對該呼召你等个上帝來个。 俗語講：「一些仔發酵就使歸團麵發起來。」 𠊎還係相信你等；因為𠊎等攏總係同主結連个人，𠊎確信你等个看法應當毋會同𠊎个有麼介爭差。總係，該擾亂你等个人，無論佢係麼人，定著會被上帝責罰！
兄弟姊妹啊，𠊎若係繼續傳割禮，做麼介還被人迫害呢？𠊎若正經傳割禮，𠊎所宣揚基督个十字架就毋會礙到佢等了！ 𠊎真希望該兜攪亂你等个人自家去閹掉！
兄弟姊妹啊，上帝選召你等，係愛你等成做自由人。總係做毋得用這自由做放縱情慾个藉口，反轉愛用愛心互相服事。 因為全部法律攏總包含在「惜鄰舍像惜自家」這條命令底背。 愛細膩噢！你等若係像禽獸恁樣咬來咬去，你等大家一定會互相消滅！

𠊎愛強調：你等愛順從聖靈个帶領，就毋會滿足自家肉體个情慾。 因為肉體个情慾同聖靈彼此對立，互相攻擊，使你等無法度做你等想愛做个。 總係，若係你等被聖靈帶領，你等就毋使受法律个約束了。
情慾个事係盡明顯个，表現在淫亂、垃圾、下流、 拜偶像、行邪術、結冤仇、相爭、怨恨、發譴、自私、分派、結黨、 嫉妒、酒醉、癲狂宴樂，㧯其他這類个事。𠊎以前識警告你等，這下再警告你等：做這種事个人，一定毋會成做上帝國个子民！
總係聖靈所結个果子就係：仁愛、喜樂、和平、忍耐、恩慈、良善、信實、 溫柔，㧯節制。這兜事法律毋會禁止。 所有屬基督耶穌个人，已經將佢等个肉體，連肉體个一切邪情㧯私慾，攏總釘死在十字架頂了。 既然聖靈賜𠊎等新生命，𠊎等就應該順從佢个帶領來行事。 𠊎等毋好驕傲，毋好惹對方發譴，抑係互相嫉妒。

Listen to 加拉太書 5