℗ Audio 2019 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

Hakka - (Han) Today's Taiwanese Hakka Bible (Drama NT)

𠊎係 保羅 ；𠊎奉上帝个旨意做基督耶穌个使徒。𠊎寫信仔給 以弗所 地方 該兜在基督耶穌底背忠心个聖徒：
願𠊎等个阿爸上帝㧯主耶穌基督賜恩典、平安給你等！

頌讚歸給𠊎等主耶穌基督个阿爸上帝！因為佢通過基督將天頂各樣屬靈个福氣賜給𠊎等。 創造世界以前，佢已經通過基督揀選𠊎等，使𠊎等在佢面前成做聖潔、無好嫌个人。
因為上帝痛惜𠊎等，佢預定𠊎等通過耶穌基督來歸屬佢，做佢个子女；這係佢所歡喜个，係佢个旨意。 𠊎等來頌讚上帝這榮耀个恩典，因為佢將佢所惜个孻仔白白賜給𠊎等！ 因為基督為𠊎等流血來死，𠊎等得到自由，罪得到赦免。上帝个恩典係樣般豐富啊！ 佢係充充足足將這恩典賜給𠊎等！
上帝用聰明智慧 完成佢个旨意，又使𠊎等知佢已經決定愛通過基督來完成个奧秘。 上帝在時機成熟个時，所愛完成這奧秘个計劃就係：使天頂㧯地上一切受造个攏總歸屬基督，基督做佢等个頭。
宇宙萬物全部係照上帝个計劃㧯決定來完成。上帝照佢早就決定个旨意，通過基督揀選𠊎等做佢个子民。 佢个旨意係愛俾𠊎這兜先仰望基督个人頌讚佢个榮耀！
共樣，你等也有成做上帝个子民。你等聽到真理个道，就係聽到該使你等得救个福音个時，你等相信基督，上帝就將佢所應許个聖靈賜給你等，做你等歸屬佢个印記。 聖靈保證𠊎等會承受上帝所應許个產業，直到上帝將完全个自由賜給屬佢个人。𠊎等應當頌讚佢个榮耀！

因為恁樣，自從𠊎聽到你等對主耶穌盡有信心，對眾聖徒盡有愛心， 𠊎就一直為你等感謝上帝。𠊎祈禱个時常常思念你等， 求𠊎等主耶穌基督个上帝，榮耀个阿爸，將聖靈賜給你等。聖靈會使你等有智慧，並啟示你等，使你等認識上帝。 𠊎也求上帝開你等个心眼，好使你等知：佢呼召你等來得个盼望係麼介；佢所應許愛給眾聖徒个產業係樣般豐富㧯榮光； 佢在𠊎等相信个人當中所顯出个能力係樣般偉大。這能力㧯佢使基督對死復活、使基督在天頂坐在自家正片个能力係共樣个。 在該位，基督个統治超過一切天界个執政者、掌權者、統治者，㧯邪惡个勢力；佢超過現世㧯來世一切个名。 上帝又使宇宙萬物降服在基督个腳下，俾佢做教會个頭，統治一切。 教會係基督个身體，係充滿宇宙萬物个基督所充滿个 。

Listen to 以弗所書 1