℗ Audio 2019 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

Hakka - (Han) Today's Taiwanese Hakka Bible (Drama NT)

關係救濟 耶路撒冷 聖徒个事，𠊎毋使寫信仔給你等。 𠊎知你等盡熱心想愛進行，就對 馬其頓 人誇獎你等。𠊎講：「 亞該亞 个信徒舊年就準備囉。」你等个熱心感動盡多人。 這下𠊎派幾個兄弟去，希望你等像𠊎所講个，早兜將捐款準備好勢，使𠊎等在這件事上對你等个稱讚毋會落空。 萬一有 馬其頓 人同𠊎共下去，發現你等還吂準備好，𠊎等會盡見笑，因為𠊎等忒信用你等；毋使𠊎等講，你等當然也會盡見笑！ 所以，𠊎認為需要鼓勵這幾個兄弟先去你等該位。你等所答應个捐款愛先收齊，在𠊎去到以前準備好勢；恁樣，做得表示你等係甘心樂意拿出來个，毋係出於勉強。
愛記得噢！少種个少收；多種个多收。 逐儕愛照自家个心意樂捐，毋好毋拌得，也毋使勉強，因為上帝惜甘心樂意奉獻个人。 上帝能將各樣个恩惠豐豐富富賜給你等，使你等毋單淨凡事充足，還有能力去行各樣个善事。 像聖經所講：
佢慷慨救濟窮苦人；
佢个仁義永遠長存。
賜種子給委種个，又賜食物給人食个上帝，一定會將你等所需要个種子賜給你等，又使它長大，使你等結還較多仁義个果子。 佢會使你等樣樣富足，隨時有能力大方幫助人，使多多人因為對𠊎等个手接受到你等个禮物來感謝上帝。 因為你等个供給毋單淨補足該兜信徒个需要，也使多多人越發感謝上帝。 這件慈善个工作證明你等順服基督，對所告白个福音忠心，也對佢等㧯眾人大大方方來分享；因為恁樣，盡多人會歸榮光給上帝。 佢等也會因為上帝將這極大个恩典賜給你等，更加想念你等，常常為你等祈禱。 𠊎等愛感謝上帝，因為佢个恩典講毋盡！

Listen to 哥林多後書 9