Akha - 2001 Edition (NT) Drama

Akha Bible Revision (Latin Script) © Thailand Bible Society, 2011.

Kʼoeˇ naˇ, Nehꞈ sahˬ paˬ neh Yeˬsuˇ-ahˇ muˇ juˇ bi juˇ-eu gʼaˇ duˬ, Yaw sahˇ Miˬyehˇ neh Yeˬsuˇ-ahˇ bawˇ tsahˬ bawˇ dahˇ-ahˇ sheuˬ gʼeh-euˬ meh. Maˬ dzaˬ maˬ dawˇ ni oeˬ tseˇ nah oeˬ tseˇ miˇ jawˇ keuˆ laꞈ ngeh, Yeˬsuˇ hawˬ mehꞈ mehꞈ dui dui laˇ-euˬ meh. Kʼoeˇ ngeh, Nehꞈ sahˬ paˬ aˬ yawꞈ jawˇ gaˇ oe-awˇ ehˇ-eu, “Nawˇ Miˬyehˇ-euˬ Zaˬ maˇ pyeuꞈ-eu ngeuˇ naˇ, kʼaˬ lo heu deuˬ-ahˇ kaˬ muˇ pyeuꞈ laˇ-awˬ lehˇ dawˬ biꞈ-awˬ tawˇ.” Yeˬsuˇ ehˇ-eu,
“‘Dzaˬ-eu jeˬ baˬ da neh tehꞈ-ehˇ tsawˇ haˬ zaˬ yaw dehꞈ dehꞈ nya-eu maˬ ngeuˇ-a. Miˬyehˇ-euˬ kʼaˬ meh-ahˇ neh kʼaˇ doˆ le-euˬ dawˬ yawˬ dawˬ na luꞈ baˬ da neh dehꞈ nya-eu meh’ lehˇ, Jaˇ liꞈ laꞈ kʼoeˇ boꞈ taˬ-euˬ meh.” Kʼoeˇ naˇ, Nehꞈ sahˬ paˬ kʼoeˇ gʼaˬ Yeˬsuˇ-ahˇ Muiˬ-eu shawˇ-eu Meuˬ pyeuꞈ-eu Yeˬluˇsaˬlehˬ meuˬ-ahˇ sheuˬ gʼeh-awˇ, Uˬ duˬ tahˬ nymˇ nymˇ ma-euˬ kʼaˬ boeˬ goˇ dui dui-eu tsahˇ-ahˇ sheuˬ taˬ-euˬ meh. Aˬ yawꞈ ehˇ-eu, “Nawˇ Miˬyehˇ-euˬ Zaˬ maˇ pyeuꞈ-eu ngeuˇ naˇ, heu gaˇ neh tsawˬ ka haw sheˇ.
‘Miˬyehˇ neh aˬ yawꞈ-euˬ mˬ taˆ gʼaˬ kʼehˇ deuˬ-ahˇ kʼehˇ-awˇ, nawˬ-euˬ aˬ kuiˇ kʼaˬ lo-ahˇ maˬ bi ga zaw ni nawˬ-ahˇ bi ciˬ le tehꞈ-a’ lehˇ Jaˇ liꞈ laꞈ kʼoeˇ boꞈ taˬ-euˬ jaˆ meh.”
Yeˬsuˇ ehˇ-eu, “‘Nawˬ-euˬ Miˬyehˇ pyeuꞈ-eu SahˬpaˬMiˬyehˇ-ahˇ nawˇ maˬ ya lawˬ haw-a’ lehˇ, Jaˇ liꞈ laꞈ kʼoeˇ ehˇ taˬ-euˬ meh.”
Kʼoeˇ naˇ, Nehꞈ sahˬ paˬ neh Yeˬsuˇ-ahˇ goˇ dui dui-eu gawˬ jawˬ kʼoeˇ taˆ sheuˬ daˆ gʼeh-awˇ, miˇ tsaˬ kʼoeˇ taˆ kʼaˇ jaˆ-eu miˇ kʼahˬ dawˬ tawˆ luꞈ hawˇ-eu, miˇ kʼahˬ kʼoeˇ deuˬ-euˬ yaw shehꞈ kʼahˬ sehˇ dawˬ tawˆ luꞈ, aˬ yawꞈ-ahˇ mehˬ nehˬ-euˬ meh. Nehꞈ sahˬ paˬ ehˇ-eu, “Nawˇ pawˬ tsuiꞈ pawˬ dmˬ dmˬ-awˇ ngaˬ-ahˇ uˬ duˬ tahˬ naˇ, miˇ kʼahˬ heu deuˬ dawˬ tawˆ luꞈ nawˬ-ahˇ biꞈ ma.”
Kʼoeˇ ngeh jawˇ, Yeˬsuˇ ehˇ-eu, “Saˬdaˬ-oˇ, doˆ-iˇ-awˬ.
‘Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ tehꞈ-ehˇ nawˇ uˬ duˬ ya tahˬ-awˇ, aˬ yawꞈ-euˬ nui kʼahˇ tehꞈ-ehˇ ya mˇ meh’ lehˇ, Jaˇ liꞈ laꞈ kʼoeˇ boꞈ taˬ-euˬ meh.”
Kʼoeˇ ngeh, Nehꞈ sahˬ paˬ kʼoeˇ gʼaˬ aˬ yawꞈ jawˇ gaˇ neh doˆ-iˇ-euˬ meh. Kʼoeˇ naˇ, mˬ taˆ gʼaˬ kʼehˇ deuˬ oe-awˇ, Yeˬsuˇ-ahˇ ngehˬ gʼeh le-euˬ meh.


Yoˇhaˬ-ahˇ paꞈ kuˆ laꞈ kʼoeˇ bi nyehꞈ uˇ-euˬ gaˇ kawˆ Yeˬsuˇ ya gaˬ ngeh, Gaˬliˬlehˇ miˇ kʼahˬ-ahˇ gʼoꞈ leˇ-euˬ meh. Naˬzaˬlehˇ meuˬ-ahˇ maˬ paˇ jawˇ ni, Gaˬliˬlehˇ lah lah dzeˇ jaˆ-eu Gaˬbeˬneˬoˬ meuˬ-ahˇ aˬ yawꞈ jawˇ-iˇ-euˬ meh. Gaˬliˬlehˇ lah-aˬ, Zeˬbuˬloˬ hawˇ-eu Naˬtaˬliˇ miˇ kʼahˬ laꞈ kʼoeˇ jaˆ-eu meh. Miˬyehˇ gʼaˇ duˬ ngehˬ dah-eu Iˇsaˬyaˇ neh heu loꞈ-ehˇ ehˇ taˬ-euˬ dawˬ byah laˇ ni, a yawꞈ kʼoeˇ gaˇ jawˇ-iˇ-euˬ jeˬ pyeuꞈ-eu meh.
“Yawˇdaˬ lawˇ baˬ-euˬ nui baˬ paw,
Gaˬliˬlehˇ lah-ahˇ jaˆ tawꞈ-eu,
Zeˬbuˬloˬ-euˬ miˇ kʼahˬ hawˇ-eu,
Naˬtaˬliˇ-euˬ miˇ kʼahˬ pyeuꞈ-eu,
aˬ cawˬ tsawˇ jeuˬ jawˇ-eu jawˇ duˬ,
Gaˬliˬlehˇ miˇ kʼahˬ kʼoeˇ tsahˇ-ahˇ,
Yaw zahˇ laꞈ kʼoeˇ jawˇ luꞈ-eu deuˬ,
yaw shehꞈ ya mawˇ-euˬ meh.
Shiˇ-eu miˇ kʼahˬ yaw zahˇ laꞈ kʼoeˇ,
kʼaˇ jawˇ-eu tsawˇ haˬ deuˬ kʼoeˇ taˆ,
yaw shehꞈ bya keuˆ le gʼaˬ-euˬ meh.”
Aˇ yamˬ kʼoeˇ yamˬ-ahˇ neh aˇ dahˬ beh-awˇ, Yeˬsuˇ dawˬ mehˬ mehˬ-euˬ meh. “Mˬ taˆ Miˇ kʼahˬ peh le luꞈ meh. Iˬ baˇ noeˬ poˆ-awˬ” lehˇ ehˇ-eu gaˇ kawˆ mehˬ-euˬ meh.


Yeˬsuˇ Gaˬliˬlehˇ lah lah dzeˇ iˇ luꞈ ngeh, ngaˬ shaˬ poˆ-eu tsawˇ haˬ pyeuꞈ-eu Beˬtuˆluˆ lehˇ kuˇ-eu Siˇmoˬ hawˇ-eu Aˬdehˬlehˬ aˬ nyaꞈ nmˇ lah laꞈ kʼoeˇ za dzeh luꞈ gaˇ ya mawˇ-euˬ meh. “Ngaˬ-euˬ mehˬ nah caw teh laˇ-awˬ. Ngaˇ naw nyaꞈ nmˇ-ahˇ tsawˇ haˬ poˆ-eu tsawˇ haˬ bi geuꞈ ma” lehˇ ehˇ nehˬ-euˬ meh. Aˬ nyaꞈ nmˇ ja tawˆ ni za byehˇ dzeh yaꞈ-awˇ, aˬ yawꞈ-euˬ mehˬ nah caw teh gʼeh-euˬ meh.
Aˬ yawꞈ mehˬ hu paw paˇ iˇ gʼeh ngeh, Zeˬbeˬdehˇ-euˬ aˬ li Yaˬkoˆ hawˇ-eu Yoˇhaˬ aˬ nyaꞈ nmˇ-ahˇ paˇ tahˬ puˬ-euˬ meh. Aˬ nyaꞈ nmˇ-aˬ, aˬ da Zeˬbeˬdehˇ nehˬ-ehˇ lawˬ laꞈ kʼoeˇ uˇ-awˇ za doꞈ luꞈ-eu meh. Yeˬsuˇ aˬ yawꞈ nyaꞈ-ahˇ kuˇ ngeh, lawˬ hawˇ-eu aˬ da-ahˇ byehˇ dzeh yaꞈ-awˇ, tiˬ poˆ tehꞈ-ehˇ Yeˬsuˇ mehˬ nah caw teh gʼehˬ-euˬ meh.


Gaˬliˬlehˇ miˇ kʼahˬ doe ni Yeˬsuˇ cah-awˇ, aˬ yawꞈ maꞈ-euˬ uˬ duˬ tahˬ nymˇ laꞈ kʼoeˇ mehˬ-eu tsoˆ-eu jeˬ mˇ-awˇ, Miˬyehˇ Miˇ kʼahˬ-ahˇ taꞈ leˇ-eu laˬ kʼaˬ cehˇ-eu guiˬ lahˬ dawˬ mehˬ-eu uˬ taꞈ, naˇ gawˇ gʼawˬ mya jeˬ pi luꞈ-eu tsawˇ haˬ deuˬ-ahˇ kʼawꞈ, laˆ taˬ nehˬ-euˬ meh. Yeˬsuˇ-euˬ gaˇ kawˆ Suˇliˆ miˇ kʼahˬ kʼahˬ lah ni gaˬ doe-iˇ-awˇ, pyaˬ-eu tsawˇ haˬ deuˬ, naˇ gawˇ gʼawˬ mya jeˬ pi luꞈ-eu tsawˇ haˬ deuˬ, nehꞈ uˇ-eu tsawˇ haˬ deuˬ, mawˇ bawˬ seu-eu tsawˇ haˬ deuˬ hawˇ-eu, kuiˇ shiˇ laꞈ shiˇ shiˇ-eu tsawˇ haˬ deuˬ-ahˇ aˬ yawꞈ jawˇ gaˇ sheuˬ uiˬ laꞈ-awˇ, aˬ yawꞈ laˆ taˬ-euˬ meh. Gaˬliˬlehˇ miˇ kʼahˬ, Meuˬ tseˇ meuˬ-euˬ miˇ kʼahˬ, Yeˬluˇsaˬlehˬ meuˬ, Yuˇdaˆ miˇ kʼahˬ, Yawˇdaˬ lawˇ baˬ nui baˬ paw jaˆ-eu miˇ kʼahˬ, heu deuˬ laꞈ kʼoeˇ jawˇ-eu tsawˇ haˬ deuˬ aˬ yawꞈ mehˬ nah caw teh-euˬ meh. Aˬ yawꞈ mehˬ nah caw teh-eu tsawˇ haˬ aˇ maꞈ kʼoeˇ maꞈ myaˬ dui dui-eu meh.

Listen to Maꞈtehˬ 4