The Maale Bible

ቢያ ባኮ ዎይሣ ጎዳሢ ሂዚ ጋዓኔ፦ «ዬኖ ዎዶና ዳውቴ ናኣቶንታ ዬሩሳላሜይዳ ናንጋዞንሢንታም ጎማፓ ዔያቶ ጌኤሻንዳ ዓልቃ ዋኣሢ ዑርታንዳኔ። ዓሳ ካኣሽካ ሜሌ ፆኦዞ ሳዖይዳፓ ዒማና ታኣኒ ባይዛንዳኔ፤ ላሚ ዔያቶ ጶቂሣንዳ ዓሲያኣ ባኣሴ፤ ሜሌ ፆኦዞ ማሊፆ ኬኤዛ ዓሶንታ ፑርቶ ዓያኖንታ ታኣኒ ባይዛንዳኔ። ዓይጎ ዓሲያኣ ማዖም ታኣኒ ፆኦሲ ማሊሢ ኬኤዛያኬ ጌይ ዔቄቴ፥ ዬያ ዓሢ ሾዔ ዓዶንታ ዒንዶንታ ‹ናንጊና ናንጋ ጎዳ ሱንፆና ሉኡዚ ባኣዚ ኔ ኬኤዜሢሮ ኔኤም ሃይቢ ኮይሳኔ› ጋዓንዳኔ፤ ዒዚ ፆኦሲ ማሊፆ ኬኤዛኔ ጋዓኣና ሾዔ ዓሳ ዒዛ ጫርጊ ዎዻንዳኔ። ዬኖ ዎዶና ዓይጎ ዓሲያኣ ማዖም ታኣኒ ፆኦሲ ማሊሢ ኬኤዛኔ ጋዓ ዓሲ ቢያ ዒዛም ፔጋዺ ጴዻ ባኮ ዴንቃዖ ቦርሲንታንዳኔ፤ ዓሶ ጌሻኒ ፆኦሲ ማሊፆ ኬኤዛ ዓሳ ማኣዓ፥ ጋፓኖ ማኣዓሢ ማይንቲ ኬስኪ ዒ ጴዻዓኬ። ዒዚ ዒማና፦ ‹ታኣኒ ጎሺ ጎሽካ ዓሲኬ፥ ፆኦሲ ማሊሢ ኬኤዛያቱዋሴ፤ ታኣኮ ዼጋቶ ዎዳፓ ዓርቃዖ ታኣኒ ጎሺ ጎሽኪ ናንጋ ዓሲኬ› ጋዓንዳኔ። ፔቴ ዓሲ፦ ‹ሃይ ኔኤኮ ዑፆይዳ ዓኣ ኪፃ ዓይጌ ኪፃሴ ኪሢዳዖ?› ጌይ ዖኦጬቴ፥ ዒዚ፦ ‹ታ ዒጊኒስኬያ ማኣራ ታ ማዻዖ ኪፃዼ ኪሢኬ› ጌይ ማሃንዳኔ።»

ቢያ ባኮ ዎይሣ ጎዳሢ ሂዚ ጋዓኔ፦ «ታኣኮ ጬንቾ ዓፓራሢዮ! ታና ማኣዲ ታ ቆልሞ ሄንቃ ዓሢ ዑፃ ፑርቱሞና ዔቄ! ማራታ ዣኣሊ ዴንዲ ባይቃንዳጉዲ ሄንቃሢ ጫርጊ ዎዼ! ታኣኒያ ዻኮ ዻኮ ቆልሞ ዎዺ ኩርሳንዳኔ። ዓጮይዳ ዓኣ ዴሮኮ ሃይሦፓ ላምዖ ማዓ ዛላ ጉቤ ሃይቂ ኩዳንዳኔ፤ ያዺ ማዔቴያ ሃይሦፓ ፔቴ ዛላ ማዓይ ሃይቁዋዖ ዓታንዳኔ። ዬያቶ ታኣኒ ዓንጊ ታሚዳ ዓጊ ሼኤሺ ኬሶሢጉዲ ታሚዳ ታ ዔያቶ ጌልዚ ዛጋንዳኔ፤ ዎርቄያ ጎኔ ዎርቄ ማዒፃ ዛጊንታሢጉዲ ጎኑሞ ታ ዔያቶኮ ዛጋንዳኔ፤ ዬካፓ ዔያታ ታና ሺኢቃንዳኔ፤ ታኣኒያ ዔያታ ሺኢቃ ባኮ ዔያቶም ዋይዛንዳኔ። ታኣኒ ዔያቶ፦ ‹ታ ዴሬዮ› ጋዓንዳኔ፤ ዔያታኣ ታና፦ ‹ናንጊና ናንጋ ጎዳ ማዔ ኑ ፆኦዛሢዮ› ጋዓንዳኔ።»

Listen to ዛካሪያሴ ማፃኣፖ 13