Bayịburu Ezaa

E megelewho, Jisọsu tsoru Gálili ejewhe. Ọ tọ dụdu iya l'obu tẹ ya jewheje lẹ Judíya. O noo nkele ndu Ju, nọ l'ẹka ono l'achọ ụzo gẹ whẹ l'e-shi gbua ya. Nteke ono bẹ oge ndu Ju tẹwaru l'ụkfu, mbụ Oge-ime-mkpu. Ọo ya bụ, unwune Jisọsu sụ iya: “Shikwawho l'ẹka-a lụfu, tụgbua jeshia Judíya nke ọwhu ndu l'etso ụzo ghu l'a-whụ ẹgube eze iwhe dụ biribiri, l'ime. Ọ tọ dụkwa onye l'anọje edomi iwhe l'oome edomi mẹ onye ọbu l'emewho t'ọha marụ iya. Eshi-ọwhu ị tụkoru ẹgube eze iwhe ono eme, menua tẹ ndu mgboko-o makọtaru ghu.” O noo l'unwune iya l'onwowhe te ekwetazhidaanu nkiya.
Ọo ya bụ Jisọsu sụ whẹ: “Ọ tọko gbabedua mbẹdua l'ejeje ntaa, ọle unubẹdua ta adụdu nteke unu gbashiru, unu ta atụgburu jeshia. Ndu mgboko-o ta afụdu kpọ unu ashị, ọle mbẹdua bẹ whẹ kpọru ashị. Iwhe meru whẹ kpọ mu ashị bụ lẹ mu l'anọjelewho ekfuru whẹ l'ọolewho ejo iwhe bẹ whẹ l'eyeje ẹka. Unubẹdua tụgbua jeshia l'oge ono lẹ mbẹdua teke ejedekwaa. O noo lẹ nteke ọwhu mu l'e-me iwhe ono, ẹnya dụ unu teke erwurwedua.” O kfua nno nọ-kirishia lẹ Gálili.

O rwua nteke unwune iya jeshigeleruwho oori Oge-ime-mkpu ono, Jisọsu pyota onwiya epyota jeshia, o to jedu l'ọkpa-jaajaa. Ndu Ju tsoru elewhe ẹnya iya l'ẹka ono, l'eeri oge ono asụje: “?Ndẹhunu ẹka ọ nọ? ?Ndẹhunu ẹka ọ nọ?”
Whẹ l'adzụ-whelewho whatawhata ekfu okfu ẹhu iya l'ẹka ono, e jiru ejiji ono. Ndu harụ sụ: “Ọ kwa ọkpobe madzụ.” Ndu sụ: “Ọo ejire, o chia ndiwhe b'o tsoru eduwhushi.” Ọ bụru egvu, whẹ l'atsụ ndu Ju bẹ kpatarụ tọ dụhunu onye dụ ike kfufua iwhe ono nke ọwhu l'aa-nụ iya.
O rwudelewho l'echilabọ oge ono, Jisọsu bahụ l'eze-ụlo Chileke je ezhilahaa iwhe. Ọ dụ ndu Ju biribiri. Whẹ sụ: “?Ndẹ-zhia gẹ nwoke-e meru maberu ẹkwo ẹgube-ẹ lẹbe abụ l'ọ gbajẹru ọkpa l'ẹka l'aanwụ ẹkwo ilile?”
Ọo ya bụ, Jisọsu sụ whẹ: “Iwhe mu l'ezhi ta abụkwa mu b'o shi l'ẹka. Onye o shi l'ẹka iya bẹ bụ Chileke ono, bụ iya zhiru mu. Onye ono, l'ọogu ẹgu t'o mee obu Chileke l'a-makwaa iwhe-e mu l'ezhi ?o shi l'ẹka Chileke, tọo ike nke onwomu bẹ mu gude ezhi iya. Onye ono, gude ike nke onwiya ekfu bẹ bụ ọja-ama onwiya bẹ l'ọocho, ọle onye ono, l'eme t'onye zhiru iya nụ jaa ya bụwaro onye l'egoshi lẹ ya gbarụ t'e gude ire iya ẹka, ọ tọ dụkwa ẹka ntụpo dụ iya l'ẹhu. ?Tọ dụ Mósisu doberu unu iwu? Ọle, lenu l'ọ tọ dụdu g'unu ha onye ọwhu l'emeje iwhe iwu ono kfuru. ?Unu kwoberu gụnu eme t'unu gbua mu ntaa?”
Ndu ono sụ: “Ọo gụ l'ọgvu l'eme. ?O zhia onye l'eme tẹ ya gbua ghu ọbu?”
Jisọsu sụ whẹ: “Mbẹ ọ kwadụa iwhe lanụ bẹ mu meru lẹ mbọku ọtuta-ume, ọ tụfu unu ẹhu. Ọo l'ọo lẹ Mósisu sụru, a -nwụjee nwata-nwoke, ọ -nọlewho abalị ẹsato, t'unu bujee ya ugvu meru g'o gude unu l'ebugejee whẹ iya m'e behuduru ọ -daba m'ọo lẹ mbọku ọtuta-ume. T'a gbahakwaarọ l'ọ tọ bụdu Mósisu watarụ nke obu ugvu ono. Ọo rọo ochee-oroke unu whẹ watarụ iya. Ọ -bụru l'iwhe unu l'ekwobeje bua nwata ugvu lẹ mbọku ọtuta-ume bụ nggẹ t'e doswe iwu Mósisu ?ọ bụhunuru gụnu meru iwhe ẹhu l'eghu unu eghu nkele ọo lẹ mu meru onye ẹhu l'ẹte adụa mma, o mehu lẹ mbọku ọtuta-ume? Ọwhu t'unu be elejekwawho madzụ ẹnya l'iwhu ekpe ikpe, unu kfụbeje ikpe nhamụnha kpee.”

Ọo ya bụ, ndu Jerúsalẹmu harụ sụ: “?Tọ bụnu-a nwoke-e, l'aachọkashi t'e gude gbua bẹ dụ ẹgube-ẹ? Ọ gbẹenu bya akfụru l'edzudzu-ọha l'ẹka-a asa kaa kaa, tọ dụ onye l'eyeru iya ọnu ẹgube-ẹ. ?Tẹ l'ọ bụnu lẹ ndu l'agbajẹ ẹja nụ Chileke mawarụ l'ọo ya bụ Kuráyisutu ọbu, Chileke kweru ụkwa iya? Ọle mẹ nteke Kuráyisutu ọbu l'a-bya ta adụkwa onye l'ama ẹka, o shi. Ọwhube onye ọwa bẹ anyi kabẹkwa marụ ẹka, o shi.”
Ọo ya bụ, Jisọsu zhinyaa iwhe l'eze-ụlo Chileke ono, ọ ryaarụ whẹ iya aryarya sụ whẹ: “?Unu madụrunu onye mu bụ ilile? ?Unu marụ-a ẹka mu shi? Ọ tọ kwa ike ẹka mu bẹ mu gude bya. Onye ono, zhiru mu nụ tẹ mu bya ono bụkwa ire-lanụ, ọle unu ta amadụ iya. Ọo mbẹdua marụ iya. Iwhe meru mu marụ iya bụ l'ọo ẹka, ọ nọ bẹ mu shi, tẹmenu ọ bụru iya zhiru mu tẹ mu bya.”
Whẹ chọde gẹ whẹ l'e-shi t'ẹka whẹ kpaa ya, ọle ọ tọ dụdu onye ọwhu ẹka iya rwuru iya l'ẹhu nkele oge nkiya teke edzudua. Ndu kweru nkiya l'igwe-ọha ono halẹe mebyi shii. Whẹ l'ekfuje sụ: “Kuráyisutu ọbu -byalẹwho ?l'oo-mebaa iwhe dụ biribiri, l'a-ka ọwaa, nwoke-e shi eshi-a meta-a?”

Ndu Fárisii bya anụa whatawhata ono, ndu madzụ l'adzụ lẹ nke Jisọsu. Ọo ya bụ, ndu ishi ndu l'agbajẹ ẹja nụ Chileke mẹe ndu Fárisii yefu ndu nche tẹ whẹ je egude Jisọsu. Ọo ya bụ, Jisọsu sụ: “Ọ kwa tẹ mu l'unu nọfua nwanshị, mu a-lakfushiakwaro onye ono, bụ iya zhiru mu tẹ mu bya. Mbụ unu l'a-chọ mu nta, chọo mu imo, ọle unu ta abyadụ l'a-whụ mu; ẹka mu nọ bẹ unu l'ẹte afụkwaa bya.”
Ndu Ju ono tụko kfulahaa l'ime onwowhe sụ: “O zhia ẹgube awee bẹ nwoke-e l'abya alala, anyi l'ẹte adụ ike jebe? ?Ọo onye marụ l'ọokwakonu nke ojeshi obodo ndu Girísu bụ iya bụ ẹka ndu Ju gbakashịhuru laa je eburu, jeshia ẹka ono je ezhia ndu Girísu iwhe, tọo gụnu? Bụkwanu iya meru g'o gude o kfude sụ l'anyi l'a-chọ iya nta, chọo ya imo, ọle anyi ta abyadụ l'awhụ iya. Sụkwawho ọdo l'ẹka iya nọ bẹ anyi l'ẹte afụkwa bya. ?O zhia gụnu bẹ iwhe ono bu?”

O belewho lẹ mbọku l'eerifuta oge ono bụ iya bụkwanu ụboku, kakọta mkpa l'oge ono; Jisọsu gbalihu kfụru akfụru ryaa ya aryarya sụ: “Onye mini l'agụ t'onye ọbu byakfuta mu bya angụta ọkpobe mini. L'onye woru onwiya ye mụbe Jisọsu l'ẹka bẹ iwhe ono, e deru l'ẹkwo Okfu Chileke l'a-vụkota l'ẹhu onye ọbu, mbụ ọwhu, sụru: ‘L'ọo l'ime ẹhu onye ono bẹ ngele ono, l'asọshi mini, l'anụje ndzụ l'a-dụ.’ ” Ọo Ume-Dụ-Nsọ bẹ Jisọsu kwoberu kfua iwhe ono, o kfuru, mbụ Ume-Dụ-Nsọ, ndu woru onwowhe ye iya l'ẹka l'a-nata. Lẹ nteke ono bẹ l'ẹteka anụdua whẹ iya, o noo lẹ Jisọsu bẹ l'eteke ewolidua dobe l'ọdu-biribiri Chileke l'imigwe.

Igwe-ọha ono nụlewho iwhe ono, o kfuru, whẹ harụ sụ: “Ha! Nwoke-e bụkwa onye nkfuchiru Chileke ọbu, anyi l'ele ẹnya iya ọbu l'ezhi.”
Ọle ndu harụ sụ: “Ọo ya bụ Kuráyisutu ọbu, Chileke kweru ụkwa lẹ ya l'e-ye t'ọ bya.”
Ndu harụ sụ: “?Ọo nụa lẹ Gálili bẹ Kuráyisutu ọbu l'e-shi bya? Mẹ ẹkwo-okfu Chileke sụkwaru lẹ Kuráyisutu ọbu l'e-shi l'eri Dévidi. L'ọo lẹ Bẹ́tulehemu bẹ l'aa-nwụ iya bụ iya bụ mkpụkpu ẹka, a nwụru Dévidi.” Tọ dụ iya bụ lẹ ndu ono ekwobe okfu ẹhu Jisọsu bọkahu ẹbo. Whẹ harụ chọo ụzo, whẹ l'e-shi t'ẹka whẹ kpaa ya, ọle ọ tọ dụdu onye ọwhu ẹka iya rwuru iya l'ẹhu.

Ndu nche ono, whẹ zhiru ozhi dawhu azụ lakfushia ndu ishi ndu ono, l'agbajẹ ẹja nụ Chileke mẹe ndu Fárisii ono, bu whẹ zhiru whẹ ozhi. Whẹ rwua, ndu ono, zhiru whẹ nụ jị whẹ: “Ọo gụnu meru unu ta akpụtahe iya?”
Ndu nche ono sụ whẹ: “Ha-a! Anyi tẹke awhụbudua onye l'ekfu g'ọo ya!”
Ndu Fárisii ono sụ whẹ: “?O duswefuwaru unubẹdua? ?Akọ kọjeru unu l'onweru onye ishi anyi, ọdua l'ọo onye Fárisii, wojeru onwiya ye iya l'ẹka? A bya abyakwanụ l'ọwhube igweligwe ọha ono, bụ iwu Mósisu bẹ whẹ l'ẹte amadụa bẹ Chileke tụakwaru ọnu.”
Ọo ya bụ, Nikodímọsu bụ onye lanụ lẹ ndu Fárisii ono, kwa iya whọ bẹ kpakfujeru Jisọsu sụ whẹ: “E -tsode iwhe iwu anyi kfuru bẹ anyi l'ẹte anmakwa madzụ ikpe mẹ anyi tẹke anụa ọnu okfu iya, marweta iwhe ọbu, o meru.”
Whẹ sụ iya: “?Gụbedua bụfua onye Gálili? Lerwenua ẹnya l'ẹkwo Okfu Chileke, gụ awhụ l'ọ tọ dụdu onye nkfuchiru Chileke, l'e-shi lẹ Gálili.”

Whẹ wụkahu, onyenọnu lashia ibe iya.

Listen to Jọnu 7