Akeu - WBT Version (NT,Genesis) Non-Drama

Akeu - WBT Version (NT) Non-Drama

Laqbhanq nail yaqyov juq neq, "Ngadao nail aqbhu nail yalkav juq neq, Yaqkov-i mail, tsai kha gil-aoq nail nee ovqtavq, yalkav al juq-i mail aivq nail ganl dav dee dee lal-aoq nail ngaol" dai, ge tsaoq pheel jaq nail bhai Yaqkov ya gaiq-a nail ngaol.
Al ovqtavq, Laqbhanq neq, gaq-u khe-ai, aivq bhai maq hel daiq nul-ai bhiq nail bhai, aivq ya moel-a nail ngaol.
Aq-u phao, Heeqphaq Miqyail neq, Yaqkov bhai, "Naoq nail aqbhal, aqbhu dai khi naoq nail aqivq jaqbheq jaol nail miltsaq bha kovq lai yaoq. Ngal naoq-ai nee mail teevq gaq khe-ai jaol nail ngaol" dai, ge bhiq-a nail ngaol.
Al heel ngel-i mail, Yaqkov neq, Laqkheiqlal dai khi Leiqaq bhai, aivq nail yaol dai khi civqmeiv jaol nail daiyal bha khul-aivq-a nail nee ovqtavq,
niail hai ge bhiq-a nail ngaol: "Naoq nail aqbhu neq, gaq-u khe-ai, ngaq bhai mao-ail maq hel daiq nul-ai bhiq nail bhai, ngaq-ai moel lal nail ngaol. Thail hai ngaol-aoq, ngaq nail aqbhu nail Miqyail neq, ngaq-ai nee mail teevq gaq khe-ai jaol nail ngaol.
Ngal neq, naoq nail aqbhu nail galduq, khal khi kivq nail khe-ai, lai jai khi mail nl-a nail bhai, nul nvq gaq heeq nia nail ngaol.
Thail hai ngaol-aoq, aivq neq, ngaq bhai goiqbhaoq bhaoq lavq khi, ngaq-i mail ya heeq phaq-ail tsaq nail ganl nl phoiq bhai, tsel pov bhee dai, lav phal lavq-a nail ngaol. Al hai lav phal lavq khi ngaol-aoq, aivq ngaq bhai aqdoil phaq bhi kev lee dai, Miqyail neq, aivq bhai maq bhi nl pevq-al.
Nul nvq gaq nail aqbhu neq, 'Civqmeiv aqgevq juq naoq nail ganl nl phoiq ngaol' dai, ge lavq-u phao, civqmeiv civq yaq iqsanl mail aqgevq juq phaoq lee-a nail ngaol. Al ovqtavq, 'Bhailgevq gevq kha-ai thaq nail civqmeiv juq neq, naoq nail ganl nl phoiq ngaol' dai, gaoq ge-u phao, civqmeiv juq iqsanl mail bhailgevq juq gaoq phaoq lee-a nail ngaol.
Thail hai nl nail lavqkhoel nee, Miqyail neq, nul nvq gaq nail aqbhu nail jaiqyaq juq nee mail tsel dov khi, ngaq bhai bivq lavq-a nail ngaol.
Civqmeiv civq bhuq juq, niaoq yaq tsao nail aqyanq bhai ngal nvmav mav nail lavqkhoel bhai, niaoq yaq tsao nail juq neq, aqgevq aqyaov dai khi bhail gevq gevq kha-ai thaq nail juq bhai, ya moel-a nail ngaol.
Nvmav nail lavqkhoel bhai Miqyail nail nqtavq gaqkhoel ngaq bhai, 'Yaqkov-ol' dai, khul-u phao, 'Ngal niai jaol naol' dai, ge kovq bhiq-a nail ngaol.
Nqtavq gaqkhoel al gaq gaoq ge nail: 'Naoq bhai Laqbhanq-i mail khal nl lavq-a nail ganl, ngal moel-aoq nail ngel-i mail, niaoq yaq tsao thail thaiq nail civqmeiv civq bhuq juq iqsanl mail, aqgevq aqyaov dai khi bhailgevq juq aol lal dai, ngal nl-aoq nail ngaol.
Ngal neq, Bheiqtaqlav nail aqduq khe, naoq-i mail lovmav nail ilkhel lav sav khi saqloq aqtseel hoel dav nail nee ovqtavq, ngaq bhai saljial jaq-u phao khe, naoq bhai bhi moel lavq-a nail Miqyail ngaol. Naol jaolduq niil duq nee mail dov-ail khi, naol doevq lee-a nail milkhaoq bha kovq lai nail galduq, niil aq-il lainq yaoq' dai, ngaq bhai ge lavq-a nail ngaol" dai, aivq nail khaqma bhai ge bhiq-a nail ngaol.
Laqkheiqlal dai khi Leiqaq ge nail: "Nv nvq gaq neq, aqbhu nail jaiqbhoil ya nail maq jiav yaoq-aol.
Aivq neq, nv nvq gaq bhai yu nail tsaol-aq khe-ai, saol-nvq lavq-a nail ngaol. Nv nvq gaq bhai gaoq jaq lavq khi khal ya lal thaq nail phul iqsanl, aivq-i mail yuq gil-aoq nail ngaol.
Nv nvq gaq nail aqbhu khe Miqyail-i mail naoq bhai bivq-ai lavq thaq nail yalkav juq neq, mal dil ngadao dai khi ngadao nail yaq juq nail pevq nail ngaol. Al heel ngel-i mail, Miqyail-i khal ge lavq-a nail khe-ai nl yaoq" dai, Yaqkov bhai ge kovq bhiq-a nail ngaol.
A bhai nee ngal-aq, Yaqkov neq, aivq nail yaqmiq yaqyov juq dai khi khaqma juq bhai neq, laolthao bhai bhi jeeq-a nail ngaol.
Aivq neq, Paqdanq Aqlanq miltsaq bhai jaol-u khe khal ya thaq nail ildaoq maoqgaiq iqsanl mail, deiv-a nail nee ovqtavq, yaol mavq mav juq maqkhaiq, civqmeiv juq maqkhaiq, the khi, aivq nail aqbhu Ilcav jaol nail Khaqnanq milkhaoq bha kovq lai nail haqbhoil, dov lai-a nail ngaol.
Aq-u phao, Laqbhanq neq, yaol nail aqmevq thaiq nail galduq dov lai nail aqyanq tsaq nail ngel-i mail, ilkhaol bhai aivq maq jaol-u phao, Laqkheiqlal neq, aivq nail aqbhu nail thaoq phaoq aqma maolkhoel juq khoil lavq-a nail ngaol.
Yaqkov iqsanl, Laqbhanq bhai maq bhi heeq nia dai, dov lal-a nail ngaol.
Aivq neq, aivq-i mail ya heeq phaq-ail tsaq nail yalkav juq bhai oil khi thaiq thaiq poiv poiv-ail dov lal-a nail nee ovqtavq, Pheqlaqtaq nail laoljaol ceiv gaq khi, Gillav nail gaoqjaoq jiav nail phao lai-a nail ngaol.

Hail n bhee lal-u phao, Laqbhanq bhai Yaqkov tsaoq dov thaq nail ganl, yu ge bhiq lai-a nail ngaol.
Aq-u phao, aivq neq, aivq nail aqivq jaqbheq juq khul khi, sivq n bhee dai, Yaqkov nail haoqnao thel laivq khi, Gillav nail gaoqjaoq aqjail bhai the kheel lai-a nail ngaol.
Aq-u nqkiv, nvmav lavqkhoel nee Miqyail neq, Laqbhanq jaol nail bha ail khi, "Ngal naoq bhai savtivq bivq lavq bhel. Yaqkov bhai meeq nail maq meeq nail khul teevq phaq iqsanl thaq ge" dai, ge bhiq-a nail ngaol.
Yanq al yanq Yaqkov neq, Gillav gaoqjaoq aqjail bhai haqphal saiqgov cov khi jaol thail thaiq-a nail ngaol. Aq-u phao, Laqbhanq iqsanl, aivq nail aqivq jaqbheq juq nee mail kev lee-a nail nee ovqtavq, aivq nee mao-ail maq eq nail bha haqphal saiqgov cov khi jaol-a nail ngaol.
Aq-u phao, Laqbhanq Yaqkov bhai ge bhiq-a nail: "Khal-ul thoq! Naol neq, ngaq-ai goiqbhaoq bhaoq khi ngaq nail yaqmiq juq bhai genl dev gaq khi nieil-aivq nail tsaol-aq khe-ai, hel laivq-il.
Khul khi mail goiqbhaoq bhaoq khi aqtsi tsu dai, tsaoq dov-a nail-aiq. Ngaq bhai ge gaiq lavq-al kheel nul-uq neq, dil-nvq deeq, tsaillail tsiq tsiq-ail, lavqkhiq teevq tsail aqbhee lav sav bhiq khi, bhi dov lai nail ngaol.
Naol neq, ngaq nail aqjievq dai khi yaqmiq juq bhai moeqsaol saol nail aqyanq gail maq bivq lavq-al. Naoq-i mail nl nail ganl niil neq, yaqjaoq khaqlal miqthoi nail ganl pevq nail ngaol.
Ngal naoq bhai lav cov kivq nail ngaol. Thail hai ngaol-aoq, mil kiv phao, naoq nail aqbhu nail Miqyail neq, "Yaqkov bhai meeq nail maq meeq nail khul teevq phaq ail thaq ge" dai, ngaq bhai savtivq bivq lavq-a nail ngaol.
Naol neq, naoq nail aqbhu jaol nail bha lavqtsail mail kev lai movq nail neema bhaq da nee, dov lal thaq nail dai, ngal heeq kivq-ao naol. Thail hai ngaol-aoq, ngaq nail thaoq phaoq aqma maolkhoel neq, khul khi mail khoil laivq-a nail-aiq" dai, Yaqkov bhai nal daiq bhiq-a nail ngaol.
Aq-u phao, Yaqkov ge nail: "Naol naoq nail yaqmiq juq bhai maq bhi dov lal dai, he thaiq gai nail bhai, gee sil lal nail ngel-i mail, tsaoq dov-a nail ngaol.
Thail hai ngaol-aoq, naoq nail thaoq phaoq aqma maolkhoel juq khoiq thaq nail gaq moel haq neq, aivq bhai heivq yaoq. Ngadao nail aqivq jaqbheq juq bhai salkhil thaq khi, naoq nail nlmaoq juq bhai hal pov yaoq. Moel haq neq, naol oil kovq yaoq" dai, ge bhiq-a nail ngaol. Laqbhanq nail thaoq phaoq aqma maolkhoel juq bhai Laqkheiqlal khoiq thaq nail ganl, Yaqkov maq heeq nia-ail.
Laqbhanq neq, Yaqkov nail haqphal saiqgov bha aol lai khi mail thaoq phaoq aqma maolkhoel juq bhai hal pov-a nail ngaol. Al ovqtavq, Leiqaq dai khi yaqkav nvq gaq nail haqphal saiqgov bhai gail hal pov lai gaoq neq, maq moel-al. Al heel ngel-i mail, Laqkheiqlal nail haqphal saiqgov bhai aol lai-a nail ngaol.
Laqkheiqlal neq, aivq nail aqbhu nail thaoq phaoq aqma maolkhoel juq bhai laolthao bha kavq jeeq-ai thaq nail jaol deel duq bhai oil bhoel khi, al nail kovtavq bhai jaol deel-a nail ngaol. Laqbhanq neq, haqphal saiqgov teevq gov gov lao hal pov gaoq neq, thaoq phaoq aqma maolkhoel juq bhai maq moel-al.
Laqkheiqlal ge nail: "Ngal bhala lee nail ngel-i mail, aqbhu nail sivtavq-ai maq thul phaol lee kivq nail bhai oeqbal phaiq lavq-o" dai, ge bhiq-a nail ngaol. Laqbhanq gail, aivq nail thaoq phaoq aqma maolkhoel juq bhai hal pov gaoq neq, maq moel-al.
Aq-u phao, Yaqkov neq, neema phail dee dee lal bhiq khi, Laqbhanq bhai ge bhiq-a nail: "Ngal naoq bhai khul nl laiq-a nail-aiq. Ngal khul nail oeqbal aol nail ngel-i mail, naol ngaq nail haoqnao thoi dai dai-ail the nail-aiq.
Niil aq-il, naol ngaq nail ildaoq maoqgaiq bhai hal pov gaq-u phao, teevq phaq ga nav moel-aoq naol laiq. Naoq nail yalkav teevq phaq ga nav bhai moel haq neq, ngadao juq nail sivtavq bhai oil thaq lee yaoq. Khaq sil gaq nail yalkav pevq nail-aiq dai, aqyu juq bhai bhi noeq ceiv yaoq.
Ngal neq, naoq-ai nee mail 20 kovq jaol-a nail ngaol. Naoq nail yaol yaol ma dai khi civqmeiv civq ma juq aqyaq maq phaoq dai maq jaol-ail. Naoq nail civqmeiv civq bhuq juq bhai gail, ngal heivq khi mail maq jaq-al.
Yaol teevq maol ga nav haqtsoiq jaiqyaq-i mail keivq heivq jaq khi ngaol-aoq, ngal bhaq da nee mail maq ngel ail dai, salkhil bhi pevq nail galduq, yaol aqsil naoq nail sivtavq bha maq oil leevq dai, ngal khaqmao gail yaol aqdoevq gaoq ul khaoq bhiq-a nail ngaol. Nqkiv maqkhaiq, n-gaol maqkhaiq, jaiqyaq juq khoiqbhaoq bhi bhaoq-u phao, naol neq, ngaq bhai gaoq bhi khaoq kovq lavq-a nail ngaol.
Ngal neq, n-gaol phao aqlaol leivq nail bhai maqkhaiq, nqkiv phao aqcoevq coevq nail bhai maqkhaiq, mee nia pov ya daq-a nail ngaol. Maq iq thaiq dai gail, ya jaol-a nail ngaol.
20 kovq bhee dai, naoq nail ilkhaol bhai jaol khi naoq nail ganl nl nl-ail, al hai ya daq-a nail ngaol. Naoq nail yaqmiq nvq gaq nail galduq 14 kovq ganl nl bhiq-a nail nee ovqtavq, jaiqyaq ya dai iqsanl kovq kovq bhee dai, gaoq tsu bhiq-a nail ngaol. Thail hai gaoq nl bhiq khi mail ngaol-aoq, naol neq, ngaq nail ganl nl-a nail aqphoiq tsel pov bhee dai lav pov lav phal lavq-a nail ngaol.
Ngaq nail aqbhu nail Miqyail, Aqbhaqlaqhaq nail Miqyail dai khi Ilcav-i mail ev nail Miqyail neq, ngaq-ai nee mail teevq gaq khe-ai, maq jaol nail kheel nul-nq, naol neq, ngaq bhai khul gail maq bivq lavq dai, bhi kovq lai lavq nail ngaol. Thail hai ngaol-aoq, Miqyail neq, ngaq-i mail ya daq-a nail haq nail aoq nail phaq bhai maqkhaiq, gaqdoil doil doil-ail ganl nl-a nail phaq bhai maqkhaiq, ya moel-a nail ngel-i mail, mil kiv naoq bhai khaq lee thaq nail ngaol" dai, ge bhiq-a nail ngaol.

Aq-u phao, Laqbhanq ge nail: "Niil yaqmiq niil juq neq, ngaq nail yaqmiq juq pevq-u khe-ai, aqyu juq nail yaqmiq yaqyov juq gail, ngaq nail aqjievq lilheel juq pevq nail ngaol. Niil yaol maq mav juq dai khi civqmeiv juq gail, ngaq nail jaiqyaq juq ngaol. Maldil ge haq neq, naoq-i mail ya-a nail yalkav juq iqsanl mail, ngaq nail ngaol. Thail hai ngaol-aoq, ngaq nail yaqmiq juq dai khi, aqyu juq nail yaqmiq yaqyov juq bhai, ngal khul maq khi bhiq kivq yaoq-aol.
Al bhaq da nee, naol dai khi ngal daoqma saljial jaq tavq bhel. Daoqma saljial niil laiq neq, ngadao nvq gaq nail gaiqlaq bhai salkhil pevq nail ngaol" dai, Yaqkov bhai ge bhiq-a nail ngaol.
Al heel ngel-i mail, Yaqkov neq, lovmav teevq heeq ngaoq thul khi bhi heeq lal nail ilkhel lav sav-a nail ngaol.
Al ovqtavq, aivq nail phaqyaq ma yaq juq bhai, "Lovmav gaoq gov dav yaoq" dai, ge bhiq-a nail ngaol. A bhai nee ngal-aq, aqyu juq lovmav gov ail khi bhaoq bhoi bhoi-a nail nee ovqtavq, al nail aqjail nee mail, jaq tavq daol tavq-a nail ngaol.
Laqbhanq neq, lovmav bhaoq bhoi al bhai Aqlaqmil nail daoq Yeiqgaq Saqhaqdultiv dai, khul bhiq-a nail ngaol. Yaqkov gail Heiqbhail nail daoq Gillav dai khul bhiq-a nail ngaol.
A bhai nee ngal-aq, Laqbhanq Yaqkov bhai, "Yaq n n-gaol khe ngadao nvq gaq-i mail lav sav-a nail lovmav bhaoq bhoi neq, ngadao nvq gaq nail gaiqlaq bhai salkhil pevq nail ngaol" dai, ge bhiq-a nail ngaol. Al heel ngel-i mail aqduq niil duq bhai Gillav dai khul nail ngaol.
Laqbhanq gaoq ge nail: "Ngadao juq teevq gaq nee teevq gaq ya pav ail-u phao, Heeqphaq Miqyail neq, ngadao nvq gaq nail gaiqlaq bhai hel daiq phail lavq dei-eiq" dai, ge nail ngaol. Al heel ngel-i mail, jaolduq al duq bhai Milsaqbhaq dai iqsanl, khul nail ngaol.
Laqbhanq teevq pov gaoq ge nail: "Naol ngaq nail yaqmiq juq bhai khoeq bhiq jiovq bhiq-u phao maqkhaiq, khaqma yaoq gaq yaoq gaoq hevq-u phao maqkhaiq, ngal maq heeq kivq khi mail ngaol-aoq, Miqyail neq, ngadao nvq gaq nail gaiqlaq bhai salkhil pevq nail bhai noeq moel yaoq.
Hel daiq yaoq. Lovmav bhaoq bhoi niil bhoi dai khi ilkhel niil khel neq, naol dai khi ngaq nail gaiqlaq bhai ngaq-i mail lav sav-ai thaq nail phaq pevq nail ngaol.
Ngal neq, lovmav ilkhel niil jel lee khi, naoq bhai aqdoil maq nl lee-ail dai maqkhaiq, naol gail, lovmav niil jel lal khi ngaq bhai aqdoil maq ya nl lal-ail dai maqkhaiq, lovmav bhaoq bhoi niil dai khi ilkhel niil neq, salkhil bhi pevq nail ngaol.
Aqbhaqlaqhaq nail Miqyail, aqphiq aqbhal juq-i mail uqhuq thaoq khal leevq thaq nail Naqhaoq nail miqyail neq, ngadao nvq gaq nail gaiqlaq bhai dal lavq dei-eiq" dai, ge bhiq-a nail ngaol. Aq-u phao, Yaqkov neq, aivq nail aqbhu Ilcav-i mail gee sil khi ev nail Miqyail nail aqmil bhai juq khi khanq-a nail ngaol.
A bhai nee ngal-aq, aivq neq, jaiqyaq teevq maol bhai gaoqjaoq bha heivq khi laol bhiq-a nail nee ovqtavq, yaoq gaq yaoq-ao nee bhai khul khi, jaq tavq daol tavq-a nail ngaol. Aqyu juq jaq gaq daol gaq-al nee ngal-aq neq, gaoqjaoq bha iq thaiq-a nail ngaol.
Haoqnao n-gaol nqhao navq mav-ail Laqbhanq neq, aivq nail aqjievq juq dai khi, yaqmiq juq bhai moeqsaol saol bhiq-a nail nee ovqtavq, geeqlaoq bivq khi aivq nail ilkhaol bha kovq ail-a nail ngaol.

Listen to Genesis 31