The Susu Bible

كْنْ عَلَ نَشَ رَتُ نُهَ مَ، عَ نُن بُورُنيِ سُبٍ نُن شُرُ سٍ نَشٍيٍ نُ نَ عَ شُن مَ كُنكُي كُي. عَلَ نَشَ قٌيٍ رَدِن دُنِحَ مَ، يٍ قَ شْرِ قْلْ. يٍ نَشَن نُ كٍلِمَ بْشِ بُن مَ، نَ نَشَ دَن. يٍ نَشَن نُ كٍلِمَ كٌورٍ مَ، نَ قَن نَشَ دَن. لْشْ يٌ لْشْ قٌ ندٍ بَ يٍ رَ. شِ كّمّ شِ تٌنفٌ سُولِ كَمَلِ شَنبِ، ندٍ نَشَ بَ يٍ رَ كِ قَنيِ رَ. كِكٍ سٌلٌقٍرٍ، شِ قُ نُن سٌلٌقٍرٍ ندٍ، كُنكُي نَشَ دْشْ فٍيَيٍ قَرِ، فٍيَ نَشٍيٍ نَ عَرَرَتِ بْشِ مَ. كِكٍ قُ شِ كٍرٍن كَمَلِ شَنبِ، فٍيَيٍ قَرِ نَشَ مَبَ.
شِ تٌنفٌ نَانِ دَنفِ شَنبِ، نُهَ نَشَ وُندّرِ رَبِ نَشَن نَ كُنكُي مَ. عَ نَشَ شَشَ بّحِن، عَ نُ سِفَ، عَ نُ قَ، هَن يٍ نَشَ شُرُن. نَ شَنبِ عَ نَشَ فَنبّ بّحِن، عَ شَ كٌلٌن شَ يٍ بَرَ شْرِ. كْنْ نَ فَنبّ نَشَ يِرٍ مَتٌ، سَنتِدٍ مُ نَ، بَرِ مَ يٍ دِنشِ دُنِحَ بِرِن مَ. عَ نَشَ فبِلٍن نُهَ يِرٍ. نُهَ نَشَ فَنبّ تٌنفٌ، عَ عَ رَ سٌ كُنكُي كُي.
عَ نَشَ مَمّ تِ هَن شِ سٌلٌقٍرٍ، عَ مَن نَشَ فَنبّ بّحِن عَ قِرِن ندٍ. نُنمَرٍ، فَنبّ نَشَ فبِلٍن نُهَ يِرٍ، عٌلِوِ وُرِ حِنفِ سُشُشِ عَ دّكٌلٍ رَ. نَ كُي نُهَ نَشَ عَ كٌلٌن يٍ بَرَ بَ دُنِحَ مَ. عَ نَشَ مَمّ تِ شِ سٌلٌقٍرٍ. عَ نَشَ فَنبّ بّحِن عَ سَشَن ندٍ، كْنْ فَنبّ مُ فبِلٍن.
نُهَ شَ سِمَيَ تٌ سِفَ حّ كّمّ سٍننِ نُن حّ كٍرٍن، كِكٍ كٍرٍن، شِ كٍرٍن، بَنبَرَنيِ قَ حْن دُنِحَ مَ. نُهَ تٌ كُنكُي شُنيِ بَ نَا، عَ نَشَ عَ تٌ شَرٍ بَرَ مَبَ. كِكٍ قِرِن شِ مْشْحّن عَ نُن سٌلٌقٍرٍ تٌ دَنفِ، بْشِ نُ بَرَ شَرَ عَ قَنيِ رَ. عَلَ نَشَ عَ مَسٍن نُهَ بّ، «وٌ مِنِ كُنكُي كُي، عِ تَن نُن عِ شَ فِنّ، عِ شَ دِيٍ نُن عٍ شَ فِنّيٍ. عِ شَ نِمَسٍ بِرِن نَمِنِ كُنكُي كُي؛ شْنِيٍ، سُبٍيٍ، بُبُسٍيٍ، عَلَكٌ عٍ شَ يِرِوَ، عٍ شَ وُيَ دُنِحَ مَ.» نَ تّمُي نُهَ نَشَ مِنِ قَ، عَ نُن عَ شَ دِيٍ، عَ شَ فِنّ، نُن عَ شَ دِيٍ شَ فِنّيٍ. سُبٍيٍ قَن نَشَ مِنِ، عَ نُن بُبُسٍيٍ، نُن شْنِيٍ. نِمَسٍ بْنسْي بِرِن نَشَ مِنِ عٍ شَتِ شَتِ مَ.
نَ شَنبِ، نُهَ نَشَ سّرّشّبَدٍ يَءِلَن عَلَتَلَ بّ. عَ نَشَ سُبٍ نُن شْنِ رَدَشَشِ ندٍيٍ تٌنفٌ، عَ نٍيٍ بَ سّرّشّ فَن دَاشِ رَ. نَ تُورِ تٌ تٍ، عَلَتَلَ نَشَ نَ فَن شِرِ مّ. عَ نَشَ رَقَن عَ مَ. عَ نَشَ عَ قَلَ عَ بْحّ مَ، «ﭑ مُ بْشِ دَنكَمَ سْنْن عَدَ مَ شَ قٍ رَ، بَرِ مَ ﭑ نَ كٌلٌن عَدَ مَ بْحّ مُ قَن كَقِ عَ دِ مّدِ تّمُي. ﭑ مُ نِمَسٍ بِرِن سْنتْمَ سْنْن عَلْ ﭑ نَ سِنفٍ رَبَ كِ نَشّ. سَنسِ سِ تّمُي نُن سَنسِ شَبَ تّمُي، شِنبٍلِ نُن كُيٍقُرٍ، سٌفٌقُرٍ نُن حّمّ، يَنيِ نُن كْي، ﭑ مُ نَ بَمَ سْنْن هَن دُنِحَ حْن.»

Listen to قْلّ 8