Limbum  - 2003 - BSC NT Drama

Limbum New Testament © Bible Society of Cameroon, 2003.

Nfè' à kɛ̀' a ce ghɛɛ ce a be ye ŋkà' nè brɛ̌d ce a lɛ̀ yes njo ka', ce a m ce too enɛ Ŋkǎ' càasi-mndap. Běe bgòrgòr efa mʉ̀ ŋgǎa taŋshi taŋshì, ba ŋgǎa ryɛ'ni mncir a m ce ròo mʉ njɛ̀ɛ nduunjì mo' à ryʉ Jisòs njobè' wowèe a m ce wɛp bèe.
Satàn à niŋ njep Judàs ce a m ce too enɛ Ìskarìyòt, ce e m ba mò' efa bèe ce ncòp-baa-à-rrʉ̀ʉ. Judàs à natì a dû, a yɛ běe bgòrgòr efa mʉ̀ ŋgǎa taŋshi taŋshì ba bèe ce a m ba btu nè bèe ce a m ce kè'ni Ndap Nyʉ̀, a seesi a wowèe àmbò àde' e gee ka' fyeni Jisòs nè wowèe. Wowèe a yu' rbòŋ, a ka'ni enɛ a be fa ye mbàa. E byemì, a kɛ' a ce ròo nduunjì à rfyèni Jisòs nè wowèe à nfè' ce bèe a yu àfo ka'.
Nòŋ entòmbì efa mnòŋ ce a m ce ye brɛ̌d ce a lɛ̀ yes njo ka' yi m ghɛɛ. Nòŋ anà à m ba nòŋ ce a m ce shɛshi njèe ce a be ye Ŋkǎ' càasi-mndap àgho. Jisòs à tuu Pità ba Jǒn, a laa nè wowèe enɛ̂, “Dù nè fɛr byee tɛ sèe bo ye Ŋkǎ' càasi-mndap àgho.” Wowèe a bipshì nè ye enɛ̂, “À ce kòŋ enɛ wèr fɛr byee ŋkà' anà ba fɛ tɛ à bo ye?” E beesì enɛ̂, “Yɛ̂, wèe be dù niŋ à mʉ̀ rla', tɛ wèe tarte wèe mbaŋrùŋwɛ̀ mò' ce e byɛ̀' ntʉŋ mdip. Dù nè fa yě mbùu, niŋ mbe ndàp ce e be niŋ, laa nè ŋwɛ̀ ndap enɛ̂, ‘Ŋwɛ̀ ryɛ'nì à làa enɛ wèr bipshi nè wɛ̀ enɛ dì' ce e be ye byee Ŋkǎ' càasi-mndap mbo a ŋgǎa yɛ'ni yì buu wèe yu ba fɛ lɛ?’ E be dùŋshi wèe ma rum ndap embe ndap ce a bà'ri mbendù ndap anà, a kupshi bòŋboŋ sê. Fɛ̀r nè byee ŋkà' mbo.” Wowèe a ka' dù, a yɛ, yi ku ba àmbò Jisòs à m suŋ wowèe nà. Wowèe a fɛr byee ŋkà' anà.
Nfè' à ka' ghɛɛ, Jisòs ba yi ŋgǎa ntuu a cutè a sir tɛbùr. E laa nè wowèe enɛ̂, “Mɛ̀ mʉ ce kòŋ se enɛ sèe ye Ŋkǎ' càasi-mndap ca, tɛ m ka' yɛ ŋgɛ'. M ce suŋ wèe mɛnɛ m be kèr ye ŋkà' ca ka', caar tɛ yuu ce ŋkà' ca yi tɛɛ àtu mo yi ke ghɛɛte mbe rla' Nyʉ̀ embe bùu.” E ka' làa wa'a, a lor ndoŋ, a yoŋshi Nyʉ̀, a laa enɛ̂, “Kò nè no. M ce suŋ wèe enɛ m be kèr no mrù' ce a gèe nè mbàŋ ce ca ka', caar bà' à nfè' ce kʉʉ Nyʉ̀ yi be kè vʉ̀.” E m lòr brɛ̂d, a yoŋshi Nyʉ̀, a bɛ'shi, a fa nè wowèe, a laa enɛ̂, “Ca yu yà nyor ce mɛ̀ fa a wěe btù. Ce gee nè àmbò sèe ce gèe na tɛ wèe bo ce kuushi mɛ̀.” A ka' ye byee mìsi, e lor ndoŋ àmbò e m lòr brɛ̌d nà, a laa enɛ̂, “Ndoŋ ca yu lě' fi ce Nyʉ̀ à kur a bèe nè wa blɛɛ. Geewa'a, ŋwɛ̀ ce e be fyèni mɛ̀ ce yeŋger wèr ye mbe tɛbùr na. Muu Ŋwɛ̀ be kù kwe àmbò yi m ba à rba, geewa'a, ndòo be co' ŋwɛ̀ ce e be fyèni ye.” Wowèe a kɛ' a ce bipshi fa wǎp mʉ enɛ ŋwɛ̀ ce e be gèe njɛ̀ɛ yuu ca yu ba nda lɛ?
Wowèe a kɛ̀' a ce sɛr mnsɛr foŋ enɛ ŋwɛ̀ ce e yu ŋwɛ̌ ŋgòr efa wǎp mʉ yu nda lɛ? Jisòs à laa nè wowèe enɛ̂, “Bkʉʉ bèe enje jɛɛ a ke sa' yap bèe nè ŋger-ŋwɛ̀, bèe a ce too ŋgǎa rsa' anà enɛ ŋgǎa rjà'. Wèe fa ba à njɛ̌ɛ wa' ka'. Yi yu ba enɛ ŋwɛ̌ ŋgòr se efa wěe mʉ ba àmbò muu ŋkɛ'. Ŋwɛ̀ ce e yu tu nè bèe ba àmbò ŋwɛ̀ rfà'. Ŋwɛ̀ ce e yu ŋwɛ̌ ŋgòr yu ba nda? Yu ba ŋwɛ̀ ce e ye byee kɛ̀ yu ba ŋwɛ̀ ce e ce càasi byee nè ye à? Mbò yu ŋwɛ̀ ce e ce ye byee a? M yu ya fa wěe mʉ àmbò ŋwɛ̀ rfà'. A wèe ce wèe à ku tɛɛ tatap, a ma' mɛ̀ à nfè' rmòoshi ka'. Mɛ̀ fa kʉʉ nè wèe àmbò yà Ta à m fa nè mɛ̀ nà, tɛ wèe bo yeŋger kèr noŋger mbe yà tɛbùr embe mɛ̌ nto', cu mbe bkàbàrà' ce sa' mntɛ̀' Isrɛ̀l ce ncòp-baa-à-rrʉ̀ʉ.
“Saimʉ̀n, Saimʉ̀n, yɛ̂, Satàn à loo njì à rfyɛpshi wèe àmbò à ke fyɛpshi msaŋ nà. Geewa'a, mɛ̀ gèe rloo nè wɛ̀ enɛ lo rbyemì li fa mì ka'. E ba à nfè' ce lo rbyemì li kʉti a ba rtatap, à tapsi bfʉr wo.” E beesì enɛ̂, “Tatâ, mɛ̀ tami nyor à rdù shaŋ wèe sò, kèr kwe wèe sò.” Jisòs à laa enɛ̂, “Pità, m ce suŋ wɛ̀ mɛnɛ tɛ nduŋgʉp ka' toŋ nètʉ' e ntìni na, à be kani ŋkàrà' taar enɛ à rìŋ mɛ̀ ka'.”
E m ker laa nè wowèe enɛ̂, “À m ba mbe nfè' ce mɛ̀ m tuu wèe, a laa mɛnɛ wèe fa lòr posà kɛ̀ bàa, kɛ̀ blaba' ka' nà, wà' wèe à m buu yuu mo' a?” Wowèe a beesì enɛ̂, “Wèr à m buu yuu mo' ka'.” E laa nè wowèe enɛ̂, “M ce làa nè wèe sè'ni na enɛ ŋwɛ̀ ce e ka' tʉr posà kɛ̀ bàa ɛ̀, e lôr. Ŋwɛ̀ à ka' tɛ tʉr kàafà' ka', ŋgàŋ fyenì yi cɛ̀', yuu yì. M ce suŋ wèe enɛ yuu ce a saŋ mbe Ŋwǎ' Nyʉ̀ enɛ̂, ‘A m bè' ye à mʉ̀ ŋgǎa ŋgèe buu bbebep’ nà, yi be koni nè mɛ̀, ghɛɛte njo. Nè mini-ŋwɛ̀, yuu ce a saŋ àmbò mɛ̀ yi ce ghɛɛte njo.” Ŋgǎa yɛ'ni yì buu a laa enɛ̂, “Tatâ, yɛ̂, a bkàafǎ' bbaa na.” E beesì enɛ̂, “Vi ghɛɛ wa'a.”
E fʉʉ efa mʉ̀ rla' a du mbe rtùu Olèf àmbò e m ce dù à nfè' wɛɛwɛ nà. Ŋgǎa yɛ'ni yì buu a du a yě mbùu. E ka' dù bà' mbe dì' anà, a laa nè wowèe enɛ̂, “Loo nè, fà dì' wèe gwe rmòoshì ka'.” E m fʉʉ efa wǎp mʉ a du mbe dì' ce ŋwɛ̀ à m ka' ba ma' lùr e ku ba', a gʉ'shi nè mŋkʉʉshi, a gee rloo, a laa enɛ̂, “Yà Tâ, wɛ̀ ka' kôŋ, gèe tɛ ndoŋ ŋgɛ' ca caa embe mɛ̌ tù. Geewa'a, ke' ba enɛ m ce làa mɛnɛ à gee ba àmbò mɛ̀ kòŋ ka', gèe ba àmbò wɛ̀ kòŋ enɛ yi ba.” Awɛ ncìndap Nyʉ̀ embe bùu à yɛɛtì, a fa ye ŋger. Mlù mi ka' ce koo ye sê, e gee rloo nè yi ntee-ŋwɛ̀, mlì' mi suu ye efa nyòr àmbò blɛɛ wa'a, a cɛɛcɛ à nshè. E ka' natì embe dì' ce e ba ce gèe rloo nà, kʉti, a yɛ ŋgǎa yɛ'ni yì buu àmbò a ce buumi njobè' wowèe a m koosimnse gòr a sɛ̂. E laa nè wowèe enɛ̂, “Wèe ce buumi ba kɛ? Nàti nè mbekì, gee rloo, fà dì' wèe bo gwè rmòoshì ka'.”
E ka' kù bii ce làa, kʉr bèe a vʉ̂. Ŋwɛ̀ ce a m ce too enɛ Judàs, ce e m ba mò' efa bèe ce ncòp-baa-à-rrʉ̀ʉ nà, à tɛɛ kùntombì nè wowèe. E m vʉ̀ a ba' àgee Jisòs tɛ e bo baa ye nje nyòr. Jisòs à laa nè ye enɛ̂, “Judàs, à be fyèni Muu Ŋwɛ̀ nè rbaa ce à ce baa ye nje nyòr a?” Yì bèe ce a wowèe a m ba a m yɛ yuu ce yi be koni, a laa nè ye enɛ̂, “Tatâ, wèr gwate wowèe nè sà' a?” Mò' efa wowèe à co' sà', a tee tù' mà' ese ŋwɛ̀ ce e m ba ŋkwàa nè ŋwɛ̀ ce e m ba tu nè ŋgǎa taŋshi taŋshì. Jisòs à laa enɛ̂, “Yi ghɛɛ wa'a.” E ka' làa wa'a, a joo tù' ŋwɛ̀ anà, yi kʉtì àmbò yi m ba. E laa nè běe bgòrgòr efa mʉ̀ ŋgǎa taŋshi taŋshì, ba bèe ce a m ba btu nè bèe ce a m ce kè'ni Ndap Nyʉ̀, ba bleebèe ce a wowèe a m vʉ̀ à rkoo ye nà enɛ̂, “Wèe à vʉ̀ à rkoo mɛ̀ nè bsà' ba mmbàŋ àmbò m yu lɛ nyɛ̀ɛ wa'a njokɛ? To mɛ̀ m ku ba wèe sèe mbe Ndàp Nyʉ̀ à mnòŋ wɛɛwɛ, wèe à m be naa bo joo mɛ̀ àgho ka'. Geewa'a, nfè' ca yu yè nfè', nfè' ce tʉ̀'nji be tʉr ŋger.”
Wowèe a m koo Jisòs, a du àgho mbe ndàp ŋwɛ̀ ce e m ba tu nè ŋgǎa taŋshi taŋshì. Pità à m ce dù a wǎp mbùu, a ba yi encàŋ. A m tòo mor mbe mambe kôr, bèe a cu a ce yɛr, Pità à cu fa wǎp mʉ foŋ. Muunje mò' ce e m ba ŋwɛ̀ rfà' à yɛ àmbò e cu a ce yɛr mor, e fyɛ' ye mbe mmìr, a laa enɛ̂, “Ŋwɛ̀ ca à m ba a Jisòs foŋ.” Pità à kanì, a laa enɛ̂, “Njeŋwɛ̀ câ, m rìŋ ye ka'.” Mʉ nfè' à ka' tuuse, ŋwɛ̀ mò' à ker yɛ ye a laa enɛ̂, “A wɛ̀ mò' efa wowèe foŋ.” Pità à beesì enɛ̂, “Mbaŋrùŋwɛ̀ câ, a mɛ̀ mò' ka'.” Nfè' à ka' tuuse àmbò awà mò'sir wa'a, ŋwɛ̀ mò' à ker laa tatap enɛ̂, “Nè mini-ŋwɛ̀, ŋwɛ̀ ca à m ba a ye. E yu ŋwɛ̌ à ŋgǒŋ Galèlê.” Pità à beesì enɛ̂, “Mbaŋrùŋwɛ̀ câ, mɛ̀ rìŋ yuu ce à ce làa na ka'.” E ka' kù bii ce làa wa'a, nduŋgʉp à toŋ. Tata à karsì nyor a ke' ye mbe mmìr. E ka' kuushi yuu ce e m làa nè ye enɛ̂, “Tɛ nduŋgʉp ka' toŋ nètʉ' e ntìni na, à be kani ŋkàrà' taar enɛ à rìŋ mɛ̀ ka'.” nà. Pità à fʉʉ njep mbè a bʉ' rwar.
Bèe ce a m ce kè'ni Jisòs, a m vʉ̀shi ye, a lip ye. A m kur ye mmir, a bipshi nè ye enɛ̂, “Suŋ ka enɛ à lìp nda wɛ̀ lɛ?” Wowèe a m sù' ye nè mcɛp sê.
Tʉ̀' à ka' raa, bleebèe efa mʉ̀ Jûs, ba běe bgòrgòr efa mʉ̀ ŋgǎa taŋshi taŋshì, ba ŋgǎa ryɛ'ni mncir, a cutè mbe kansùr, a lor Jisòs a vʉ àgho mbo, a laa nè ye enɛ̂, “Wɛ̀ ka' ba Krǎis anà, à suŋ wèr.” Jisòs à beesì enɛ̂, “M ka' suŋ wèe, wèe byemì ka'. M ka' bipshi yuu nè wèe, wèe beesì ka'. Kɛ' e sè'ni na, Muu Ŋwɛ̀ be cu à rkoo mà' Nyʉ̀ ce e tʉr ŋger wɛɛwɛ.” Wowèe wɛɛwɛ a bipshì enɛ̂, “Banɛ a wɛ̀ Muu Nyʉ̀ a?” E laa nè wowèe enɛ̂, “À làa wèe nè wee bcùu enɛ a mɛ̀ ye.” Wowèe a laa enɛ̂, “Àde' sèe ker ce ròo bèe mo' enɛ a vʉ tɛɛ njìnsa' à njɛ̌ɛ kɛ? To sèe à yu' yuu ce e làa nè yi cùu.”

Listen to Ñwaè' Luêk 22