Limbum  - 2003 - BSC NT Drama

Limbum New Testament © Bible Society of Cameroon, 2003.

Buu ca à ka' koni wa'a, ku' bèe à mncʉ̀kì à mncʉ̀kì, a kaarì a ce nyòrni, a ce nyɛ̀ŋshi bèe mo' nè mkùu. Jisòs à kɛ' entombì a laa nè ŋgǎa yɛ'ni yì buu enɛ̂, “Lòr nè nfè' nè yes bèe Farìsi ce yu ŋgǎa mbo'ni nà. Yuu mo' yi yu ce a tɛ'shi, ce yi be kè buu efa ryɛɛti àwaŋ ka'. Yuu mo' yi yu ce a sʉ̀ti, ce bèe a be kè buu efa rrìŋ ka'. Banɛ a be yu' yuu ce wèe à làa nètʉ' ba à mmir waŋ, suŋ yì ce wèe à cete kèŋ a cʉʉni ŋwɛ̀ mbà tù' ba à btu mndap. Bkar wâ, m ce làa nè wèe mɛnɛ wèe fa wɛp bèe ce a ke yʉ ŋwɛ̀ e kwe wɛɛ, a ker tʉr yuu mo' à rgèe ka' nà ka'. M be suŋ wèe ŋwɛ̀ ce àde' wèe wɛp. Wɛp nè ŋwɛ̀ ce e ka' yʉ ŋwɛ̀ wɛɛ, e ker tʉr ŋger à rmà' ye njep mor foŋ nà. Ɛ̀no, m ce suŋ wèe enɛ wèe wɛp ba ye. Mbò a ke fyèni bbe' ta à bfrǎŋ mmbaa a? Ka' yi yu wa'a, Nyʉ̀ à lèse mò' efa mʉ̀ bbe' anà ka'. Ka' nyʉ̀'tu ce yi yu mbe wěe tù ɛ̀, e bè' yi wɛɛwɛ. Banɛ wèe fa wɛp ka' njobè' wèe lùu ntaa à bsii Nyʉ̀, a caa bbe' àŋgoo. M ce laa nè wèe enɛ ŋwɛ̀ ce e ka' suŋ à bsii bèe enɛ e yu yà ŋwɛ̀, banɛ Muu Ŋwɛ̀ be suŋ àmbò ye foŋ à bsii bcìndap Nyʉ̀. Ŋwɛ̀ ce e ka' mɛŋni mɛ̀ à bsii bèe banɛ m be kè mɛŋni ye à bsii bcìndap Nyʉ̀ foŋ. Ŋwɛ̀ à ka' laa yuu mo' bebep kuu Muu Ŋwɛ̀ banɛ a be fòosi ye. Geewa'a, ŋwɛ̀ ce e ka' bepsi rlii Yʉ' Rara banɛ a be fòosi ŋgàŋ ka'. A ka' lor wèe du àgho à mndap mloo, kɛ̀ nè ŋgǎa rsa' ce a tʉr ŋger nà ɛ̀, wèe fa ce kwà'shi enɛ wèe be dù bèesi kɛ̀ làa wee kɛ lɛ ka', njobè' Yʉ' Rara yi be fa wèe blàa ce yɛɛnì à rlàa à nfè' anà.”
Ŋwɛ̀ mò' efa mʉ̀ kʉr bèe cà à laa nè ye enɛ̂, “Ŋwɛ̀ ryɛ'nì, làa tɛ nfʉrà gap bti' wèr ye.” Jisòs à beesì enɛ̂, “Mbaŋrùŋwɛ̀ câ, ŋwɛ̀ ce e fa mɛ̀ ŋger enɛ m sa', kɛ̀ enɛ m gap buu nè wèe à fa nda?” E ker laa nè wowèe enɛ̂, “Lòr nè nfè' efa rgani buu. Ryòŋ ŋwɛ̀ li ke ba ku' buu ce ŋwɛ̀ tʉr ka'.” E ma' ŋgàa nè wowèe enɛ̂, “Ŋwɛ̀ mbàa mò' à m tʉr yi nsuu, byee vi ku' à nsuu anà bòŋboŋ sê. E kwa'shì a laa nè yì nyor enɛ̂, ‘M be gèe mɛ kɛ? M tʉr dì' ce m be lɛ̀ byee ca wɛɛwɛ ka'.’ E ka' kwà'shi wa' wɛɛ a ker laa enɛ̂, ‘A yuu ce m be gèe na. M be sà'si wa bcàŋ, sɛɛ vǐ bgòrgòr, lɛ̀ yà kwaa ba yà buu njo. Mɛ̌ gèe wa' wɛɛ, laa nè yà nyor enɛ̂, Wɛ̀ tʉr ku' buu bbòŋboŋ ce à be ye à bfè' àŋgoo sê. Lòr ŋgòŋ àtɛ̀r, yeŋger, noŋger, yu' rbòŋ nè yò nyor.’ E ka' ce kwà'shi wa'a, Nyʉ̀ à laa nè ye enɛ̂, ‘Lʉr câ, m be koo lo ryòŋ nètʉ' e ntìni na, tɛ ku' yò buu ce wɛ̀ kupshi a lɛ na ba vǐ nda?’ A mbò yi be kù ba wa'a nè ŋwɛ̀ ce e lòr yì buu wɛɛwɛ a lɛ ba nè yì nyor, a ke' tʉr buu à mbèp yì Nyʉ̀ ka'.”
E m ker laa nè ŋgǎa yɛ'ni yì buu enɛ̂, “Banɛ m ce suŋ wèe mɛnɛ mlù mi fa ce koo wèe nè yè nyor enɛ wèe be ye ba kɛ ka', kɛ̀ nè yè nyor enɛ wèe be yar ba kɛ lɛ ka'. Ryǒŋ ŋwɛ̀ li càa byee, nyor ŋwɛ̀ à caa bcɛ̀'. Kwà'shi ka nè àmbò bkǎaŋkò' ce vi ke byè buu ka', kep buu efa mŋkʉ̀ ka', tʉr btàp kɛ̀ bcàŋ ka', geewa'a, Nyʉ̀ ku ce nyaŋ wowèe. Yè ntaa à lùu sê, a caa yì bsiŋ. Ŋwɛ̀ efa wěe mʉ ce mlù mi ka' ce koo ye, e kyesè nǒŋ mo' mbendù vi mnòŋ enjep ŋgòŋ na a nda? Ka' ba enɛ àde' wèe gee yuu ce yi ku ba mʉcàr àmbò yì anà ka', mlù mi ka' ce koo wèe à bɛr buu mo' cà njokɛ? Kwà'shi ka nè àmbò bfʉ̀lawà vi ke kù'. Vi ke fà' kɛ̀ ba' bcɛ̀' ka', ka' yi yu wa'a, m ce suŋ wèe mɛnɛ ka' bcɛ̀' kʉʉ ce Solomʉ̀n à m ce yar ce vi m bòŋ se nà, mo' yi m bòŋ àmbò fʉ̀lawà ka'. Nyʉ̀ ka' ce susi mjɛɛ efa rìŋ, ce mi yɛɛti ntìni, e fʉʉ àyàŋsè, a too njep mor, banɛ e be sùsi yi wèe gòr àmbò kɛ? Le rbyemì li yu mʉcàr. Wèe fa ròo ba yuu ce wèe be ye, ba yì ce wèe be no ka'. Fa gèe tɛ mlù mi ce koo wèe ka'. Bèe enje jɛɛ ce a rìŋ Nyʉ̀ ka' a ke dù yap ba àmbùu buu ca, yè Ta à rìŋ enɛ wèe à ba tʉr buu ca. Banɛ wèe roo ba kʉʉ Nyʉ̀ tɛ e fa buu ca nè wèe foŋ.
“Fa wɛp nè ka', mʉ ya njèe, njobè' yè Ta ce yu' rbòŋ se à rfa wèe kʉʉ anà. Fyèni nè yè buu, lor mbàa efa gho gap nè ŋgǎa fùp. Tar nè bposà ce àde' vi bep ka', lɛ̀ nè yè buu ba mbe bùu mbe dì' ce àde' vi du à yuu ka'. Àde' nyɛ̀ɛ ba' mbo ka'. Àde' mfyɛp vi ye ka'. Yi yu enɛ fàdì' ce yè buu yu, a fàdì' ce ye ntee yi yu foŋ.
“Cʉʉ nè mŋkànda mbendù bcɛ̀', cʉ' wee blâm, tɛ vi ce raa. Ba nè àmbò bèe ce a cu a ce kè' enɛ yàp masà kʉti efa Ŋkǎ' bgùu, e ce kʉti, kùushi kèŋ, tɛ wowèe a bo kù mʉ̀' nè ye à nfè' ce e kùushi anà. Rbǒŋtu li be ba nè ŋgǎa mfà' ce yàp masà à ka' vʉ yɛ àmbò wowèe a tami nyor. M ce làa nè wèe nè mini-ŋwɛ̀ enɛ e be cʉʉ cɛ̀' rfà', làa tɛ wowèe a cute à nshè tɛ e caasi byee nè wowèe. Rbǒŋtu li be ba nè wowèe ce yàp masà à ka' vʉ nè ntee-tʉ', kɛ̀ tɛ tʉ̀' ka' raa ɛ̀, ku yɛ àmbò wowèe a tami nyor. Rìŋ nè ca enɛ ŋwɛ̀ ndap à ka' ba riŋ nfè' ce nyɛ̀ɛ ce vʉ̀, e ba mà'shi tɛ nyɛ̀ɛ kep yì ndap ka'. Banɛ wee wèe foŋ tami nyor njobè' Muu Ŋwɛ̀ be vʉ̀ à nfè' ce wèe ce kè' ye ka'.”
Pità à laa enɛ̂, “Tatâ, à ce mà' ŋgàa ca ba nè wèr kɛ̀ nè bèe wɛɛwɛ?” Tata à beesì enɛ̂, “Banɛ ŋwɛ̀ rfà' ce e yu ŋwɛ̌ mini a ker riŋ buu foŋ sê, yu nda? Yu ŋwɛ̀ ce yì masà à lɛ̀ yì ndap enɛ e ce fyɛ', ce fa byee nè yi ŋgǎa mfà' njep nfè'. Rbǒŋtu li be ba nè ŋwɛ̀ rfà' ce yì masà à ka' kʉti, yɛ àmbò e ce gèe li rfà' à njɛ̌ɛ wa'a. M ce suŋ wèe nè mini-ŋwɛ̀ enɛ masà anà be fa yì buu wɛɛwɛ mbe yě mmbò. Geewa'a, ŋwɛ̀ rfà' anà à ka' laa nè yì nyor enɛ̂, ‘Yi be lòr nfè' sê, tɛ yà masà ka' vʉ̀,’ kɛ' sè'ni ce lìp mmbaŋrù ba bbyèŋge ce a yu ŋgǎa mfà', ce ye yì buu, ce no buu, vi ce koo ye, yì masà be vʉ̀ à nǒŋ mo' ce e ce kè' ka', ker ba à njɛ̀ɛ nfè' ce e ba riŋ ka', gwàte ye à btete à btete, fa ye dì' ba à mʉ̀ bèe ce a byemi ka'. Ŋwɛ̀ rfà' ce e ka' riŋ yuu ce yì masà ce kòŋ, ke' tami nyor, gee yuu ce yì masà ce kòŋ ka', banɛ a be lìp ye nè mŋgwàa àŋgoo. Ŋwɛ̀ rfà' ce e ka' tɛ rìŋ yuu ce yì masà ce kòŋ ka', ka' gee yuu mo' ce a ba lìp ye àtu mo, banɛ a be lìp ye nè mŋgwàa mʉcàr. Ŋwɛ̀ ce a ka' fa ye buu gòr, a be kè' enɛ ye ye fa gòr. Ŋwɛ̀ ce a ka' lɛ buu mbe yě mmbò gòr, banɛ a be kè kè' enɛ e fa buu gòr foŋ.
“Mɛ̀ m vʉ̀ à rmà' mor njep ŋgòŋ, a ce kòŋ mɛnɛ yi ba kɛ̀' war ce she. Njɛ̀ɛ bàptir mò' yu ce m be bàptir. Tɛ m ka' bàptir njɛ̀ɛ bàptir anà, m be yɛ mlù. Wèe ce kwà'shi weenɛ mɛ̀ m vʉ̀ ba nè cumʉnyaŋ njep ŋgòŋ na a? Yi yu wa' ka'. M ce suŋ wèe mɛnɛ mɛ̀ m vʉ̀ ba nè mŋgàpni. Kɛ' e sè'ni na, bèe a ka' ba mbe ndàp bèe ntâ, mŋgàpni mi ba fa wǎp mʉ, tɛ bèe a mntaar a baa bèe a mmbaa, tɛ bèe a mmbaa a baa bèe a mntaar. Mŋgàpni mi be ba mbetar tàr ba muu mbaŋrù, tɛ mŋgàpni mi ba mbetar ma ba muunje. Mŋgàpni mi be ba mbetar malû, ba ŋgwa muu yì.”
E laa foŋ nè bèe ce a m ba àfo nà enɛ̂, “Wěe ke yɛ àmbò mmbà' vi ko' embà mbùuntii wèe ku laa weenɛ mbèŋ be gwè, mbèŋ ku gwe ghup. Fu' yi lò ce ko' embà mbùuŋgòŋ, wèe laa weenɛ ŋgòŋ yi be lùu sê, yi ku luu ghup. Wèe ce wèe yu ŋgǎa mbo'ni, wěe rìŋ à rfyɛ' buu, riŋ àmbò ŋgòŋ yi be ba, ker yɛ àmbò rbuu li yu, wèe ku riŋ yuu ce yi be ba. Wèe à ka' ke' riŋ à rfyɛ' buu ce vi ce koni à nfè' yǐ sè'ni, rìŋ yuu ce yi be ba ka' njokɛ?
“Àde' wèe ke' sa' nè wee btu, rìŋ yuu ce yi yu yɛɛnì ka' njokɛ? Yi yu ba enɛ ŋwɛ̀ à ka' lor wɛ̀ à mnsa', wèe ye ka' ce dù mbe kôr, à ghetèr wèe ye seesi mìsi à nduunjì fà dì' e bo lòr wɛ̀ dù àgho fa nè ŋwɛ̀ nsa' mnsa', tɛ ŋwɛ̀ nsa' mnsa' lor wɛ̀ fa nè ŋwɛ̀ ncir, tɛ ŋwɛ̀ ncir fa wɛ̀ mbe shaŋ ka'. M ce suŋ wɛ̀ enɛ à be kù cu mbe shaŋ anà caar, là' yi mbàa ce yi yu nè wɛ̀ wɛɛwɛ ka' fʉʉ embo.”

Listen to Ñwaè' Luêk 12