Iranian Azeri Bible

رب اَبراما ددی: «اؤز تورپاغیندان، قوحوملارینین آراسیندان، آتا اِوئندن چیخ و سنه گؤرسده‌جیئم تورپاغا گت. سندن بؤیوک بئر مئلّت تؤره‌ده‌جیم، سنه برکت وره‌جیم، آدینی اوجالداجاغام و برکت قایناغی اولاجاقسان. سنه برکت ورنلره، برکت وره‌جیم. سنه لعنت ادنلری، لعنت اده‌جیم. و یِر اوزونون بوتون طایفالاری سنئن واسئطَنله برکت آلاجاقلار.»
اَبرام ربّئن اونا ددئیی کئمی اورادان چیخدی. لوط دا اونونلا بئرلئکده گتدی. خاراندان چیخدیغی واخت، اَبرام یتمئش بش یاشیندا ائدی. اَبرام آروادی سارانی، قارداشی اوغلو لوطو، خاراندا مالئک اولدوغو بوتون وارینی و صاحئب اولدوغو نؤکرلرئنی گؤتوروب، کَنَعان تورپاغینا طرف یولا دوشدو. اونلار کَنَعان تورپاغینا گلدئلر. اَبرام اورادان کچئب، شِکِم دیئلن یرده‌کی مورِه پالیدینین یانینا چاتدی. او واخت بو یرده کَنَعانلی‌لار وار ائدئلر. رب اَبراما گؤرونوب ددی: «بو تورپاغی سنئن نسلئنه وره‌جیم.» اَبرام اونا گؤرونن ربّه اورادا بئر قوربانگاه دوزَلتدی. اورادان اَبرام بِیت‌-ائلئن شرقئنده یرلشن داغلیق بؤلگه‌یه طرف یولا دوشدو و اورادا چادیر قوردو. چادیرین قربئنده بِیت-‌ائل، شرق سمتئنده ده عای شهری ائدی. اَبرام اورادا دا ربّه بئر قوربانگاه دوزَلتدی و ربّئن آدینی چاغیردی. اَبرام سفرئنه داوام ورئب نِگِبه طرف حرکت ادئردی.

بو تورپاقدا آجلیق باشلادی. اَبرام مئصئره گتدی کی، بئر مودّت اورادا قالسین، چونکی اؤلکه‌ده بؤیوک آجلیق حاکئم ائدی. او، مئصئره یاخینلاشاندا آروادی سارایا ددی: «باخ، من بئلئرم کی، سن گؤزل آروادسان. مئصئرلی‌لر سنی گؤروب دئیه‌جکلر: ”بو اونون آروادیدیر.“ و منی اؤلدوره‌جکلر، لاکئن سنی صاغ بوراخاجاقلار. سن دِه کی، منئم باجیمسان، اوندا سنئن خاطئرئنه منئمله یاخشی رفتار ادرلر و من ده صاغ قالارام.»
اَبرام مئصئره گلئب چاتاندا، مئصئرلی‌لر اونون آروادینین چوخ گؤزل اولدوغونو گؤردولر. فئرعونون اعیانلاری دا آروادی گؤردولر و اونو فئرعونا تعرئفله‌دئلر. آرواد فئرعونون سارایینا آپاریلدی. اونون خاطئرئنه فئرعون اَبراملا دا یاخشی رفتار اتدی؛ و اونا سورو، مال-حیوان، اِرکَک و دئشی اِششَکلر، نؤکرلر، کنئزلر، و دَوه‌لر وردی.
آمّا رب اَبرامین آروادی سارایدان اؤتری، فئرعونون و اونون اِو اهلئنئن باشینا آغیر ناخوشلوقلار گتئردی. فئرعون اَبرامی چاغیریب ددی: «بو نه ائشدئر، منئم باشیما گتئردئن؟ نئیه منه بئلدئرمه‌دئن کی، بو آرواد، سنئن آروادیندیر؟ نه اوچون ددئن کی، ”بو منئم باجیمدیر.“ اِله کی، من ده اونو اؤزومه آرواد آلدیم؟ باخ، آروادین بورادادیر، اونو گؤتور، گت.» فئرعون آداملارا اونون حاقّیندا امر وردی و اَبراملا آروادینی صاحئب اولدوغو بوتون شیلرله بئرلئکده یولا سالدیلار.

Listen to یارادیلیش 12