لشهر أكتوبر؛ رحمات جديدة كل صباحعينة

شي حاجة مانقدرش نعيش بلا بيها، ملّي ماتكونش عندي كنشك في المحبة ديال الله، كتاخد بلاصة الله وكتوجّه قلبي كتر منّه.

كون صريح هنا ودابا– شنو كتقول لنفسك أنه ماكاينش عندك؟ شنو اللّي ولّيتي مقتانع أنك ماتقدرش تعيش بلا بيه؟ شنو هما هاد الأمنيات ديال "غير كون" اللّي كتهز معاك واللّي كيشكّلو كيفاش كتفكّر في نفسك، في الحياة، وفي صلاح الله؟ في حالة الغياب ديال شنو كتغرا باش تشك في الأمانة ديال الله؟ ملّي كتشوف بفرح للّور في كيفاش دازت الأمور في شي موقف أولا شي علاقة معينة، شنو اللّي كيعطيك داك الفرح؟

ها فين غاديين كل هاد الأسئلة: شمن أمور على هاد الأرض اللّي كتجدب قلبك، وهاكدا هي كتتحكّم في أفكارك وكلامك وسلوكك؟ كيورّينا الرسول بولس الصراع اللّي كنعيشوه هنا بهاد لكلام: "إِيوَا إِلَا تّْبْعَتُّو مْعَ الْمَسِيحْ، قَلّْبُو عْلَى الْأُمُورْ اللِّي الْفُوقْ، فِينْ ݣَالْسْ الْمَسِيحْ عْلَى لِيمْنْ دْيَالْ اللَّهْ.دِّيوْهَا فْالْأُمُورْ اللِّي الْفُوقْ مَاشِي فْالْأُمُورْ اللِّي فْالْأَرْضْ" (كولوسي 3: 1-2). مباشرة من بعد ما كتب وصف زوين بزّاف على إنجيل يسوع المسيح، علاش بولس كيعطي الدعوة اللّي كاينة في هاد الأيات؟ الجواب هو أنه كيعرف القرّاء دياله. هو كيعرف بلّي واخّا هما ولاد الله، راه الحرب الروحية مازال ماسالاتش. كاين صراع مستمر من أجل السيطرة على قلوبهم. من منظور الصورة الكبيرة، القلب يقدر يتّشد أولا يسطرو عليه غير جوج حوايج. غنستعمل لكلام ديال بولس. قلبك دبما كيعيش تحت السيطرة ديال "الْأُمُورْ اللِّي الْفُوقْ" أولا "الْأُمُورْ اللِّي فْالْأَرْضْ".

في التطبيق، أنا ونت يا إمّا كنعبدو وكنخدمو المخلوق أولا الخالق. الصراع الروحي هو أننا كلنا كنميلو باش نتأرجحو بين هاد الجوج. كاينين أوقات فين كنديرو مزيان، وكيكون الدافع والفرح العميقين في قلوبنا هما باش نعيشو بطريقة كترضي الله. ولكن كاينين أوقات خرين فين كنقولو لنفوسنا بلّي كاينة شي حاجة خاص تكون عندنا، وكننساو الله وكنعطيو نفوسنا للمهمة باش ناخدو هاد الحاجة اللّي سيطرات على أفكارنا وكتشكّل رغباتنا.

هاد الصراع ديال "الْفُوقْ" أولا "الْأَرْضْ" هو الحرب الروحية العظيمة بين النهار اللّي أمنتي فيه ودارك الأخيرة. كاينة هاد الحرب بالحق في كل المواقف والبلايص والعلاقات في حياتك اليومية. ماشي غلط تفرح بالأمجاد المخلوقة. ماشي غلط تبغيهم في حياتك. ماشي غلط تخدم باش تاخدهم. ولكن ماخاص تخلّيهم يحكمو قلبك، وهاكدا ياخدو بلاصة الله. ماشي غير أن هاد الصراع هو الحرب الكبرى في الحياة المسيحية وصافي، ولكن حتّى أنه حجة رئيسية على حتياجنا المستمر للنعمة- النعمة اللّي تقدر تحرّرنا من العبودية ديال الحوايج اللّي ماعمّر تعطينا داكشي اللّي غير الله بوحده يقدر يعطي: الحياة.

من أجل دراسة وتشجيع كتر: تيموتاوس اللّولة 6: 17-19