لشهر أكتوبر؛ رحمات جديدة كل صباحعينة

بلا الحياة الأبدية في المركز ديال تفكيرنا، راه صورتنا للحياة هي بحال شي أحجية ديال الصور ناقصاها واحد القطعة مركزية.

واحد من المواضيع ديال هاد الدراسة اليومية هو أن كل البشر عندهم نزعة لاهوتية، سواء كانو كيعتبرو نفوسهم متدينين أولا لّا. كل واحد بغا الحياة تكون منطقية. كل واحد مُحلّل ملتزم. حتّى واحد ماكيخلّي حياته ترونكيل. كلنا كنحلّلو حياتنا وكنحاولو نفهموها. حنا كلنا كنطوّرو أنضمِة عقائدية، كتابية أولا غيرها. حنا كلنا كنطوّرو فلسفات معينة على الحياة. حنا كلنا كنهزّو معنا وجهات نظر للعالم اللّي كتشكّل طريقة تفكيرنا، والحوايج اللّي كنبغيوهم، والاختيارات اللّي كناخدوهم، والكلمات اللّي كنقولوهم، الأفعال اللّي كنديروهم. حتّى واحد منّا ما مربّع يدّيه. حنا كلنا كنشكّلو الطريقة اللّي بيها كتبان الحياة بالنسبة لينا.

إدن الله، وهو عارف شكون حنا وعارف بلّي حنا مربوطين مع الرغبة باش نفهمو حياتنا، هو عطانا الكلمة دياله. فيها كيكشف على هويته، وكيحدّد شكون حنا، وكيشرح المعنى والهدف ديال الحياة، وكيكشف على أعظم مشاكل البشرية- الخطيّة- وكيوجّهنا للرجاء بنعمته الرائعة. هو ماكيقولش لينا كلشي، حيت ماغنكونوش قادرين نفهمو كلشي أولا نتعاملو معاهم في حياتنا اليومية، ولكن هو كيعطينا كلنا الأجزاء الضرورية ديال "وجهة نظر للعالم من الخلق للقيامة" باش نقدرو نعيشو كيما تخلقنا باش نعيشو.

الحياة الأبدية هي أساس هاد النظرة الكتابية للعالم. كيواجهنا الكتاب المقدس بحقيقة أن هاد العالم ماشي هو كلشي. كيقول لينا أن هاد العالم غادي للخاتمة دياله النهائية. أنا ونت كائنات أبدية غتعيش الحياة الأبدية في شي بلاصة. إما في حضرة الله ديما وللأبد أولا منفصلين منّه في بلاصة ديال عقاب أبدي ديما وللأبد.

راه الواقع ديال الحياة الأبدية كيزرع الجدِّية والرجاء في الوقت ديال هنا ودابا. الطريقة اللّي كتعيش بيها هي مهمة حيت كاينة حياة أبدية جايّة من بعد. الاختيارات اللّي كتاخد هما مهمّين حيت كاينة الحياة الأبدية. الأمور اللّي كتأمن بيهم هما مهمّين حيت العالم غادي في الإتجاه ديال الأبدية. الأمور اللّي كتسلّم ليهم قلبك هما مهمّين حيت كاين واحد الغد أبدي. بكل بساطة ماتقدرش تتمسّك بالنظرة ديال "أهم حاجة هي اللدّة ديال هاد اللحظة" للحياة وتأَمن بالحياة الأبدية في نفس الوقت. في ضوء الحياة الأبدية، ماشي منطقي تنسا الله وتعيش من أجل نفسك. قدّام الحياة الأبدية، ماشي عقلاني أنك تكتب القواعد ديالك وتتبع الطريق ديالك. الحياة الأبدية كتتطلّب منك باش تاخد الحياة بجدّية.

ولكن الحياة الأبدية حتّى كتعمّر هاد اللحظة بالرجاء. حين أنا عارف بلّي ماشي غير هادشي اللّي كاين، حتّى كنعرف بلّي الدنوب، التجارب، والآلام ديال الوقت الحاضر ماغيدوموش للأبد. بالنسبة لأولاد الله، راه الحياة الأبدية كتواعدنا بلّي الخطية غتموت، المعاناة غتسالي، والتجارب ديالنا ماغيبقاوش، وغنعيشو مع الله في سلام كامل ديما وللأبد.ماتقدرش تفهم الحياة بشكل صحيح بلا ماتشوفها من منظور الحياة الأبدية.

من أجل دراسة وتشجيع كتر: يوحنا 5: 19 – 29