لشهر أكتوبر؛ رحمات جديدة كل صباحعينة

رد البال حيت مملكة الدات هي مملكة ديال عرض أزياء. هي كتعرف مزيان كيفاش تتنكّر مزيان في صورة مملكة الله.

التزييف الروحي هو من أهم أدوات العدو. هو واحد من المكونات الرئيسية ديال العمى الروحي. هادشي علاش كنقراو هاد التحدير في متى 7: 15: "رْدُّو بَالْكُمْ مْنْ الْأَنْبِيَا الْكْدَّابِينْ، اللِّي كَيْجِيوْ عَنْدْكُمْ لَابْسِينْ لْبَاسْ الْخْرْفَانْ وَلَكِنْ هُمَ مْنْ لْدَاخْلْ دْيَابْ خْطَّافَا." راه مملكة الدات خطيرة بزّاف لدرجة أنها كتلبس لباس مملكة الله. وهاكدا:

·يقدر التركيز في الأمور المادية يتنكّر في صورة واحد وكالة وتصرّف مزيان على ممتلكاتك.

·محبة السيطرة الشخصية تقدر تتنكّر في صورة ستعمال مواهب القيادة اللّي عطاهم الله.

·الغضب يقدر يتنكّر على أساس يكون عندنا قلب كيقلّب على الخير.

·التقوى الداتية في الشريعة تقدر تتنكّر في صورة محبة شريعة الله.

·تبني إمبراطورية ديال الخدمة الروحية ديالك يقدر يتنكّر كالتزام بتوسيع مملكة الله.

·الخوف من الإنسان يقدر يتنكّر في صورة قلب حسّاس تجاه حتياجات الناس لخرين.

·الأنانية اللّي كتقلّب باش تجدب الانتباه تقدر تتنكّر على أنها نكران لحتياجاتك الشخصية.

·الحكم على الناس وإنتقادهم يقدر يتنكّر على أنه لتزام بالصراحة.

·التكبّر العقائدي يقدر يتنكّر على أنه التزام بالحق ديال الله.

·الرغبة في باش تكون معروف ومحترم تقدر تتنكّر على أنها التزام بالخدمة الروحية.

·العبودية لآراء الناس تقدر تتنكّر على أنها التزام بالمجموعة أولا المجتمع.

·الشهوة تقدر تتنكّر على أنها فرح بجمال خليقة الله.

·النميمة تقدر تتنكّر على أنها مصدر اهتمام في الناس لخرين من أجل الصلاة.

هادشي راه حق- مملكة الدات هي مملكة عرض أزياء. هادشي حيت وحدة من الأدوات اللّي العدو كيستعمل بزّاف هي القدرة ديال الغلط باش يقلّد الصالح. زيد على هادشي الميول ديالنا الطبيعي للعمى الروحي وكنوصلو للارتباك الروحي الشخصي. كيخوّف باش نفكرو في شحال من مرّة كنفكرو بلّي حنا كنخدمو الله ملّي في الحقيقة كنخدمو نفوسنا، أولا شحال من مرّة كفنكرو بلّي حنا كنعبدو الله ملّي حنا في الحقيقة كنعبدو وكنخدمو لشي جانب من الخلق.

الطبيعة التنكرية ديال الخطية عندها دور كبير في التقلب ديال قلوبنا اللّي كيتبع الأصنام. إدن داكشي اللّي غالبًا كنضنو ماشي هو الحق، والأصنام اللّي كتتنكّر ماعندهاش القوة گاع باش تعطي لقلوبنا الجيعانين داكشي اللّي يسوع بوحده يقدر يعطينا. الله بوحده يقدر يعطينا نور لقلوبنا ويحرّرنا من عبودية مملكة عروض الأزياء الصغيرة ديالنا.

من أجل دراسة وتشجيع كتر: إرميا 10: 1-16