لشهر أكتوبر؛ رحمات جديدة كل صباحعينة

ماخاصكش تفهم كلشي في حياتك، حيت رب الحكمة والنعمة كيفهم كلشي.

كاينة مفارقة بزّاف ماكنتعاملوش معاها مزيان. خلقنا الله باش نكونو بشر منطقيّين وكنهزّو معانا الرغبة في المعرفة والفهم، ولكن خاصنا ماننساوش بلّي حنا ماعمّرنا غنختبرو السلام الداخلي غير حيت لقينا أجوبة على كل أسئلتنا. الإيمان الكتابي هو ماشي خارج على العقل، ولكن هو كياخدنا لما هو أبعد من قدرتنا على التفكير. كمؤمنين بهويتنا كحاملي صورة الله والحق ديال كلمته، فراه حنا كنعتارفو بلّي مهم ندرسو ونتعلمو ونفحصو ونعبرو ونعرفو. ولكن حنا ماشي منطقيّين. ماكنتيقوش في المنطق ديالنا كتر من كنتيقو في الله. حنا ماكنرفضوش داكشي اللّي كيقول الله أنه صحيح ملّي ماكنفهموهش، وكنعرفو بلّي السر ديال الله غيخلّينا مع ألغاز في حياتنا؛ ألغاز اللّي حتى مع أحسن علم اللاهوت عندنا، ماغنقدروش نحلّوها. راه المعرفة الكتابية ماكتحيّدش الغموض والألغاز من حياتك حيت ملّي الله كيكشف على إرادته من أجلك في الكتاب المقدس، هو ماكيكشفش على كل الحوايج اللّي غيدير في حياتك من أجل الخير ديالك والمجد دياله. الله كيفاجئك.

هادشي علاش كتسوّل، "فين نلقا السلام؟" كاين الجواب على هاد السؤال بشكل واضح وقوي في إشعياء 26:

هاداك اللّي تفكيره كيبقا عليك، نت كتحفضه في سلام كامل، حيت كيتيق فيك. تيق في الرب للأبد، حيت الرب الإله هو صخرة أبدية (آية 3-4)

كيقول لينا هاد المقطع الكتابي على فين كاين السلام. ماعمّر كيكون في أنك تحاول تفهم الإرادة السرية ديال الله. ماكاينش في التخطيط الشخصي أولا في المحاولات ديال السيطرة على الضروف والناس اللّي في حياتك. السلام كاين في التّقة في الشخص اللّي كيسيطر على كل الحوايج اللّي ماكتفهمهمش واللّي ماكاينش غموض قدّامه حيت هو اللّي خطّط لكولشي. كيفاش تختبر هاد السلام الرائع - السلام اللّي ماكيتلاشاش ملّي كيخيب ضنّك، ملّي كيكونو الناس صعاب، أولا ملّي كتكون الضروف صعيبة؟ غتختبرو من خلال أنك تحافض على تفكيرك باش يكون مركّز على الرب. كُلما تأمّلتي في مجده، قوته، حكمته، نعمته، أمانته، التقوى دياله، صبره، وحماسه باش يفدي، والتزامه بوعوده الأبدية ليك، كلما زادت قدرتك باش تتعامل مع الغموض اللّي في حياتك. علاش؟ حيت نت كتعرف بلّي هاداك اللّي واقف مورا الغموض هو صالح بشكل مجيد، وماشي غير كيستحق تيقتك وصافي، ولكن حتّى العبادة ديال قلبك. راه بالصح بلّي السلام في أوقات الشدة ماكاينش في أنّك تفهم حياتك، ولكن في أنك تعبد هاداك اللّي ديجا فاهم كلشي.

من أجل دراسة وتشجيع كتر: مزمور 139