لشهر أكتوبر؛ رحمات جديدة كل صباحعينة

واش الاستجابة ديالك اليوم غتتشكّل كتر من خلال الخوف من العجز ديالك أولا الفرحة بالكفاية ديال المسيح؟

حتّى واحد ما غير كيعيش الحياة وصافي. حتّى واحد ما كيتصرف أولا كيتفاعل بشكل محايد. حتّى واحد ما هو موضوعي. حتّى واحد ما غير كَالس ماكيدير والو. أنا ونت ديما كنجيبو معانا شبكة تفسيرية لرؤيتنا لنفوسنا وسلوكنا والناس لخرين والله والحياة. ردود أفعالنا ماكتتشكّلش من خلال الحقائق ديال تجاربنا، ولكن من خلال الطريقة اللّي بيها كنفسرو دوك الحقائق. القصد من الإنجيل ديال شخص يسوع وخدمته هو باش يكون بحال شبكة تفسيرية كتغيّر حياة المؤمن. هاشنو قصده بولس ملّي قال "خَلِّيوْ الْكْلْمَة دْ الْمَسِيحْ تْسْكُنْ فِيكُمْ بْالْكْتْرَة" (كولوسي 3: 16).

علاش قال " الْكْلْمَة دْ الْمَسِيحْ"؟ بولس كيعني الإنجيل. الرسالة الشاملة ديال الكتاب المقدس هي إنجيل يسوع المسيح. الكتاب المقدس ماشي سلسلة ديال القصص أولا مجموعة ديال الكلام الحكيم. الكتاب المقدس ماشي كتاب دراسي ديال علم اللاهوت النضامي. الكتاب المقدس هو السيرة الداتية الكبرى ديال الرب يسوع المسيح. ممكن يكون أصح باش نقولو بلّي الكتاب المقدس هو القصة المشروحة ديال الرب يسوع المسيح، يعني قصته مع ملاحضات الله الأساسية ديال التفسير والتطبيق. نت كتسيء للكلمة ديال الله ملّي كتقول أنها غير كتاب لاهوتي، مبادئ، وقواعد. بكل بساطة ماتقدرش تفهم الكتاب المقدس بلا الشخص والعمل - النعمة – ديال الرب يسوع المسيح.

إدن لفين كياخدنا كل هادشي؟ عندك جوج طرق باش تشوف في الحياة. تقدر تشوف في كل التحديات الداخلية والخارجية من منظور سجلك الحافل وقائمتك الحالية ديال قدراتك، أولا تقدر تشوف فيهم من وجهة نظر ديال كفاية عمل يسوع في بلاصتك. راه الكتاب المقدس ماتعطاش غير باش يغيّر هويتك وإمكانياتك بشكل جدري، ولكن باش يغيّر طريقة تفكيرك وتفسيرك للحياة بشكل جدري. نت ماكتبقاش بوحدك مع الموارد ديالك الخاصة. حيت نت "في المسيح"، فراه إمكاناتك كبر من المجموع ديال أجزاء جسدك. نت ماعمّرك كتكون في شي موقف أولا شي بلاصة بوحدك. كاين واحد كيحارب الخطية من أجلك حتّى ملّي ماكتكونش عندك رغبة كافية باش تتحارب من أجل نفسك.

ماخاصش يكون إنجيل يسوع المسيح غير جانب من جوانب اللاهوت أولا العقيدة ديالك. ماخاصش يكون في البعد "الديني" في حياتك. علاقتك مع الله من خلال يسوع المسيح هي حياتك. كتمس وكتغيّر كل جانب من جوانب الوجود ديالك؛ كتعاود تصاوب هويتك. هي كتزرع في حياتك معنى وهدف جداد، وكتعاود تشكّل المصير ديالك كليّا. هادشي علاش خاص يكون عمل يسوع في بلاصتك هو الشرجم اللّي من خلاله كتشوف في كلشي في حياتك. ماتعطيش بلاصة للخوف من العجز ملّي عمل يسوع عطاك كل ماكتحتاج.

من أجل دراسة وتشجيع كتر: بطرس التانية 1: 1-11