لشهر أكتوبر؛ رحمات جديدة كل صباحعينة

البرنامج ديال الله هو التغيير. حتياجك هو التغيير. الوعد ديال النعمة هو التغيير. الرجاء في الحياة الأبدية هو الإكمال ديال خدمة التغيير.

كلنا عندنا مشكلة شخصية كبيرة وخايبة. هي مشكلة ماكنهدروش عليها بزّاف. وواخّا هكداك، فراه هاد المشكلة هي حجرة كبيرة قدّام النمو الروحي الشخصي ديالنا. إلا عندك هاد المشكلة، فراك ماغاديش تخمّم في حقيقة أنك عندك هاد المشكلة بالضبط حيت عندك هاد المشكلة! كنعترف بلّي كنضن بلّي حتّى أنا عندي هاد المشكلة. المشكلة هي الرضا الداتي الروحي الشخصي. كلما سافرت من كنيسة لكنيسة، كلما گلست مع قادة روحيين، وكلما كانو عندي فرص باش ندير مقابلات مع الناس، كلما كنت مقتنع كتر بلّي الأزمة الحقيقية في الكنيسة الإنجيلية المعاصرة ماشي هي الاحتياج؛ ولكن العكس. حنا راضيين وشبعانين بزّاف. حنا كلنا راضيين بزّاف مع شكون حنا، فين حنا، وشنو كنديرو. حنا راضيين بشوية ديال المعرفة الكتابية. حنا راضيين بأوقات ديال الخدمة حسب المناسبات. حنا راضيين بالديون اللّي قادرين نتحكمو فيهم واللّي كيخلّيونا نحطّو شي دريهمات في التقديمات ديال الكنيسة. حنا راضيين حيت حنا تزوجنا هادي مدة وماكيبانش بحال غنتفارقو قريب. حنا راضيين بشوية ديال الفهم ديال العقيدة ديال الكتاب المقدس. حنا راضيين بالحضور الأمين في الإجتماعات ديال الويكاند في كنائسنا. حنا راضيين بالقراءات اليومية السريعة ديال الصباح. حنا راضيين بشوية ديال الإختبارات في الخدمة. حنا راضيين حيت حنا ماكنتصرفوش على أساس الأغلبية ديال شهواتنا وماكنخرّجوش الأغلبية ديال الحسد ديالنا. حنا راضيين حيت في خيبة ضنّا مع الله، ماكنبعدوش منّه. حنا راضيين حيت نقدرو نتحكمو شوية في الخوف ديالنا من الناس. حنا راضيين باش نستعملو الأغلبية ديال الموارد ديالنا المادية باش نخلّيو نفوسنا مرتاحين. حنا راضيين باش نكونو غير مستهلكين للخدمة ديال الكنيسة عوض مشاركين ملتزمين فيها. حنا راضيين بالقلوب اللّي غير بعض المرّات كتبعّد والأفكار اللّي كتتعارض مع شنو كيقول الكتاب المقدس أنه مزيان وحق. حنا راضيين بالمقدار ديال الصراعات اللّي عندنا في حياتنا. حنا راضيين.

حتّى واحد فينا ماتخرّج من المدرسة ديال النعمة، ولكن حنا راضيين وشبعانين. كلنا كنعطيو الدليل بلّي حنا مازال محتاجين ننضجو، ولكن حنا راضيين. وحيت حنا راضيين، فراه كنقاومو النعمة اللّي هي رجائنا الوحيد. إلا كنتي قادر تقنع نفسك بلّي راه عندك صحة مزيانة، واخّا ممكن كاينين مؤشرات على أنك ماشي بخير، فراه ممكن أنك ماغتمشيش لعند الطبيب باش تطلب مهارته في تشخيص المرض والعلاج.

ولكن هاشنو نت وأنا خاصنا ماننساوش: حنا كنخدمو فادي ماراضيش ومازال ماشبعانش. هو كيعرف أننا مازال محتاجين للخدمة التغييرية ديال نعمته القوية. واش ماشي رائع باش في عدم الرضا دياله الكريم، هو ماغيعياش حتّى يحيّد كل ميكروب ديال الخطية من كل خلية في قلب كل واحد من قلوب ولاده؟

من أجل دراسة وتشجيع كتر: بطرس اللّولة 2: 1-12