لشهر أكتوبر؛ رحمات جديدة كل صباحعينة

هاد النهار، حرب ديال المحبة كتنوض على الأرض في قلبك. واش غتحكمك محبة الله أولا شي محبة خرا؟

ساهل تعطي الجواب الروحي الصحيح على هاد السؤال: "بلا شك، محبة الله غتحكم قلبي قبل من أي حاجة خرا". المشكلة هي أنه في التطبيق، مازال كاينة حرب على المحبة في قلوبنا. حنا كنتلفو على طريقنا. مازال محبة العالم والحوايج اللّي كاينين في العالم كيخطفو قلوبنا. كننساو الله وكنقولو لنفوسنا بلّي خاص يكون عندنا شي حاجة بالضبط. محبة الله في قلوبنا كتتنافس مع محبة الدّات. محبة الله كتتصارع مع شتياقنا للمحبة ديال الناس لخرين. الأمور المادية والتجارب الجسدية كتحكم على عواطفنا ودوافعنا. أه، الحرب مازال شاعلة.

كنتمنّى كون نقدر نقول بلّي معايا ماكاينش هادشي، ولكن كاين. شي مرّات كنبغي راحتي بزّاف، وكنولّي رجل كيتقلّق وكيتعصّب بزّربة حيت ماكناخدش داكشي اللّي كنضن أنني كنستحق. شي مرّات كنبغي بزّاف يكون عندي الحق، وكنولّي عنيف وكنتجادل بزّاف. شي مرّات كنبغي بزّاف الاحترام والعاطفة ديال الناس، وهادشي علاش كيحكموني الأراء ديالهم. شي مرّات كنحط قلبي بقوة على شي حاجة، وكنحس محروم حتّى نلقا شي طريقة باش ناخدها. شي مرّات كنبغي السيطرة أولا التحكّم بزّاف، وكنولّي متطلّب كتر من خادم. شي مرّات كنعطي قيمة كبيرة للسرور الشخصي، وكنستتمر بزّاف ديال الوقت وأنا كنقلّب عليه. شي مرّات كنشتاق بزّاف للأمجاد اللّي كتكال ديال الخلق، وكناكل كتر من اللّي خاصني.

الأغلبية ديال الحوايج اللّي كتاخد قلبي وكتحارب على البلاصة اللّي غير محبة الله خاص تاخدها، كنلقا أنها ماشي حوايج شريرة في حد داتها. راه الرغبة باش تكون على حق، ويحتارموك الناس، ويكونو عندك ممتلكات، وتكون عندك شي سيطرة، وتعيش السعادة، أولا باش تاكل ماكلة بنينة هي ماشي أمور شريرة بطبيعتها. ولكن ها شنو أنا ونت خاصنا ماننساوش، داكشي اللّي عليه كتدور الحرب من أجل محبة قلوبنا: الرغبة في شي حاجة مزيانة كتولّي حاجة خايبة ملّي كتولي هاد الرغبة كتحكم فيّا. ملّي الحوايج المزيانين كيولّيو متحكمين، فراه كيتحكمو في العاطفة ديال قلوبنا ومن بعد كيشكلو كلامنا وسلوكنا. ملّي كيوقع هادشي، فراهم كياخدو البلايص ديال قلوبنا فين غير الله بوحده خاص يكون.

كيما كتشوف، ديما كنحطو محبة قلوبنا على شي حاجة، وراه مهم نتفكرو بلّي راه كاينين غير جوج بلايص فين نقدرو نستتمرو هاد المحبة اللّي كتشكّل الحياة - على الخالق أولا على المخلوق. ماشي غلط تحب خليقة الله المجيدة، ولكن راه هي كارتة روحية باش تحكمك ديك المحبة. إدن هاهي حجة خرا على حتياجنا للنعمة اللّي تعطات لينا. حنا كلنا عندنا قلوب متقلبة. كلنا ما زال محتاجين للنعمة اللّي كتنقد وكتحمي. الحمد لله على النعمة اللّي تعطات!

لمزيد من الدراسة والتشجيع: تيموتاوس التانية 2: 22-26