لشهر أكتوبر؛ رحمات جديدة كل صباحعينة

راه المعارك ديال التقديس هما كتار، ولكن المراحم ديال الله هما جداد صباح بعد صباح بعد صباح.

الحرب من أجل قلبك مازال مستمرة. الإغراءات كاينين في كل بلاصة حداك. العدو كيقلّب عليك بحال سبع كيزأر. الباطل كيتدابز مع الحق. شعب الله كيعيشو كأقلية كيفهموهم غلط في أغلبية الأوقات. المرض والمعاناة كيدخلو بابك. نت خاصّك باش تنمو في النعمة. في الضعف، كتفتح الطريق لداكشي اللّي خاصّك تقاومه. الناس لخرين كيخطأو ضدك. الرجا والأحلام والخطط كيفشلو. كتعاني من الفساد والظلم. كاينين أوقات فيهم كتتسائل على واش كل هادشي كيستحق المشقة. ولكن في وسط كل هادشي، الله مازال خدّام، كيخدم فيك باش تولّي بحال ولده. من نواحي كتيرة هادي حياة ديال مشقة متعددة الوجوه- مصاعب الحياة في هاد العالم الساقط كتتلاقا مع مصاعب النعمة اللّي كتغيّر.

ربما نت كتقرا وكتفكّر، "پول، حتّى لدابا تشجّعت بزّاف." واخّا، خلّيني نطلب منّك تفكّر في حاجة مشجّعة بزّاف في وسط المصاعب اللّي ماغيساليوش حتّى نهار نكونو في الجهة لخرا. كنشوفوها في هاد الكلام: "راه محبة الرب التابتة ماعمّرها كتسالي. المراحم دياله ماعمّرهم كيساليو. هما جداد كل صباح. عضيمة هي أمانتك" (مراتي إرميا 3: 22-23).

تأمل في هادشي اللّي كيقوله هاد المقطع الكتابي على هويتك وشنو خديتي كولد ديال الله. راك خديتي محبة الله التابتة والأمينة واللّي ماعمرّها كتفشل واخّا نت ماعمّر كنتي تقدر تدير أي حاجة باش تكسبها أولا تستاحقها. ولكن كاين كتر باش نقولو على هاد المحبة. ماعمّر كتحبس. الله ماعمّره يتخلّى عليك. هو ماعمّر كيبعّد منّك وهو مشمائز. هو ماعمّر يندم حيت عطاك محبته. هو غيحبّك في أسوأ نهار في حياتك كيما في أحسن نهار. هاد الهدية ديال المحبة هي ديالك للأبد.

ولكن المقطع كيقول كتر من هادشي. كيعلن بلّي بصفتك ولد الله، راك تباركتي بالمراحم الأبدية اللّي هما جداد كل صباح. فكّر في شنو كيعني هادشي. كاينين مراحم جداد من أجلك هاد النهار، كيناسبو كل الأمور اللّي غتواجهم، سواء الأمور اللّي كتعرف واللّي كتخمّم فيهم، وحتّى الأمور اللّي ماكتعرفهمش مازال. الرحمة ديال الله هي ماشي عامة. هي نعمة شخصية، رعاية على حسب الضروف ديالك، ومساعدة ملموسة. كتجي لعندك بالضبط فين نت كاين وكتعطيك غير داكشّي اللّي نت محتاج. كتاخدها على حسب حتياجك وكتاخدها على حسب القَدْر اللّي كتحتاج. ماخاصّكش تتسائل على شحال كاين من رحمة الله. هي كتجي من عين ديال نعمة متجددة ماكتساليش. أه، تقدر تكون الحياة في هاد الجانب من الحياة الأبدية صعيبة، ولكن راك ماشي بوحدك؛ راك خديتي محبّة قوية ومراحم جداد كل صباح – بالضبط داكشي اللّي كتحتاج هنا ودابا.

من أجل دراسة وتشجيع كتر: مراتي إرميا 3: 22-27