لشهر أكتوبر؛ رحمات جديدة كل صباحعينة

ماكافيش الله باش تكون شاهد على الخدمة ديال النعمة. هو دعاك باش تكون أداة لديك النعمة للنّاس لخرين.

راه المنصِب اللّي ختاره الله لينا في الخدمة ديال مملكته هو حاجة رائعة. كل ولاده عندهم دعوة كتدهش العقل. للأسف، أغلبية ولاده ماكيفهموش المنصب ديالهم، وهادشي علاش كيكونو مرتاحين يكونو مستهلكين وحشمانين ملّي كيتعلّق الأمر بكونهم أدوات ديال الله.

أغلبية الناس اللّي كيمشيو للكنائس الإنجيلية نهار الأحد ماعندهمش بزّاف ديال الإلتزام الحياتي للخدمة ديال دوك الكنائس. أغلبية الرُّعاة غيكونو فرحانين إلا كانت الأغلبية العظمى من الناس ديالهم كيحضرو كل نهار أحد وكيلتازمو بتقديم الدعم المالي للخدمة ديال الكنائس. ولكن كل هادشي للأسف هو بعيد من تصميم الله الحكيم لكنيسته. فكّر في هادشي: بكل بساطة ماعمّرك غتقدر تخدّم عدد كافي من الخُدّام في الخدمة الروحية باش تلبّي كل حتياجات الخدمة الروحية في شي أسبوع محدّد، بغض النظر على شحال كبيرة كنيستك. راه ماشي عجب باش الناس يطلبو المساعدة برّا جسد المسيح. راه ماشي عجب باش تبقا المشاكل تكبر حتى توصل لمستويات عالية من التعقيد.

كل ولاد الله عندهم دعوة لنفس المنصب. كلنا تستدعينا باش نكونو سفراء دياله. ماتنساش، الحاجة الوحيدة اللّي كيديرها السفير هو يمتّل هاداك اللّي صيفطه. خطة الله هي باش حضوره المخفي ونعمته المخفية يبانو من خلال شعبه، اللّي كيجسدو حضوره وكياخدو هاد النعمة للناس. هادي هي دعوة الله لكل واحد من ولاده. ماخاصش يكونو ناس اللّي كياخدو وراضيين على نفسوهم، ولا مُستهلِكين. راه الله صمّم جسد المسيح باش يكون جماعة عضوية ديما كتخدم.

إلا عمّر الكنيسة غتكون هاكدا، فراه شعب الله كيحتاج لتلاتة ديال الحوايج. أولا، حنا محتاجين للرؤية. حنا محتاجين مرارًا وتكرارًا باش نتفكرو منصبنا في الخدمة ديال الفادي. من بعد، حنا محتاجين للإتزام. حنا محتاجين للتشجيع باش ناخدو قرارات محددة وملموسة باش نحسنو بلاصتنا في الخدمة اللّي دعانا الله ليها. في الأخير، كنحتاجو للتدريب. كنحتاجو باش نفهمو كيفاش بالحق هو تمتيل النعمة ديال الفادي في حياة الأشخاص اللّي الله حطهم في طريقنا. حنا محتاجين باش نتدربو على باش مانشوفوش ديك العلاقات على أنها ديالنا من أجل سعادتنا، ولكن كغرف ديال العمليات فين الرب يقدر يدير خدمته ديال التغيير بالنعمة.

شحال زوينة هاد الطريقة الرائعة ديال العيش! راه الله ختارنا باش نكونو جزء من أهم خدمة في الكون. راه تختارينا باش نهزّو رسالة النعمة ديال الملك المنجّي معانا فينما مشينا. راه تعطينا نفس النعمة باش تقوّينا باش نكونو السفراء اللّي تختارينا باش نكونو.

من أجل دراسة وتشجيع كتر: أخبار الأيام اللّولة 16: 8-27