لشهر أكتوبر؛ رحمات جديدة كل صباحعينة

إلا كنتي ولد الله، فراه عندك دعوة باش تتخلّى على العقلية ديال "حياتي" وتعيش يوميّا بعقلية الخدمة الروحية لحظة بلحظة.

شنو بغيتي لحياتك؟ بالحق من أجل شنو نت عايش؟ إلا كان ممكن تكون عندك "الحياة السعيدة"، فكيفاش غتبان حياتك؟ إلا كنتي غتقول، "غير كون كان عندي ___، غتكون حياتي ___"، شنو غتحط في هاد الفراغات؟ واش ممكن يكون واخّا أنك ولد الله، نت مازال كتضن أن حياتك هي ديالك؟ ملّي كتفكر في حياتك بهاد الطريقة، فراه الخدمة الروحية كتكون هي أنك تدير خطوة وحدة خارج حياتك، تعطي لله شوية من وقتك وطاقتك وفلوسك، ومن بعد ترجع لحياتك. في هاد الطريقة ديال التفكير، كتكون الخدمة الروحية حاجة منفصلة من حياتك اليومية. الخدمة الروحية كتكون حسب التنظيم وجدول التوقيت ديال القادة ديال كنيستك، ونت كتدعم هادشي لشي فترة ديال الوقت بمجهودك الخاص. ولكن مورا هاد المنضور ديال الخدمة كاينة الفكرة أن حياتك مازال ديالك، ونت كتعطي لحضات منها للرب من أجل خدمته.

المنضور للخدمة في العهد الجديد كيختلف اختلاف جدري (قرا أفسس 4: 1-16؛ كورنتوس اللّولة 12؛ كولوسي 3: 12-17). العهد الجديد واضح مزيان في دعوته لينا باش نفهمو بلّي حياتنا مابقاتش ديالنا. جسدنا ماشي مِلكنا. أحاسيسنا ماشي مِلكنا. حياتنا الروحية ماشي مِلكنا. عقليتنا أولا تفكيرنا ماشي مِلكنا. نفسيّتنا ماشي مِلكنا. قدراتنا على التواصل ماشي مِلكنا. علاقاتنا ماشي مِلكنا. مواهبنا أولا خبراتنا ماشي مِلكنا. حتى ممتلكاتنا ماشي مِلكنا بالمعنى العميق ديال شنو كتعني المِلكية. بولس كيهدر على هادشي ملّي كيقول في اللّخر ديال النقاش دياله على الجنس في كورنتوس اللّولة 6، "وْنْتُمَ رَاهْ مَاشِي دْيَالْ رْيُوسْكُمْ، حِيتْ تّْشْرِيتُو بْالتَّمَنْ" (آية 19). غتبدا تقرّب لداكشي اللّي الله صمم حياتك باش تكون كواحد من ولاده ملّي تفهم بلّي حتّى حاجة فيك وفي حياتك ماهي مِلكك. نت وكل حاجة فيك تشريتو بتمن، إدن راك مِلك ديال هاداك اللّي خلّص هاد التمن.

ولكن كاينة حاجة تانية كيوضّحها العهد الجديد مزيان. هي أنّ الله دعا كل ولاده ماشي غير باش ياخدو خدمة النعمة ديال مملكته، ولكن حتّى باش يكونو أدوات ديال هاد الخدمة. هادشي اللّي أنا كنسمّيه "نمودج المشاركة الكلّية"، يعني كل شعب الله وفي كل وقت. كل واحد من ولاد الله تعطاته دعوة للخدمة، وكل واحد خاصّه يفكر في نفسه بهاد الطريقة.

في الأخير، العهد الجديد ماكيعلّمش بلّي كاين فرق بين الحياة والخدمة الروحية. كل بُعد في حياتك هو ميدان ديال الخدمة الروحية. الزواج هو خدمة روحية. الصداقة هي خدمة روحية. التربية ديال لولاد هو خدمة روحية. كونك جار هو خدمة روحية. بلاصة الوضيفة ديالك هي بلاصة ديال خدمة روحية.

راه عندك دعوة باش تمتّل المنجّي المجيد، اللّي عطاك كل ما كتحتاج باش تعيش بعقلية ديال الخدمة الروحية.

من أجل دراسة وتشجيع كتر: لوقا 17: 7- 10