لشهر أبريل؛ رحمات جديدة كل صباحعينة

ماتفشلش قدّام الحرب الروحية اللّي تستدعيتي باش تحاربها كل نهار. الرب القدير هو معاك وكيحارب في بلاصتك.

بين الحاجات ديال "ديجا" و "مازال"، الحياة هي حرب. تقدر تكون مرهقة ومحبطة وكتشفّل. كلنا كندوزو في لحظات كنتمناو فيها باش تكون الحياة سهل. كنتسائلو علاش خاص تكون تربية الأولاد معركة روحية مستمرة. كلنا كنتمناو باش يكون زواجنا بلا حروب. غنكونو فرحانين كلنا كون ماكانوش المدابزات في الخدمة أولا في كنائسنا. ولكن كلنا كنفيقو كل نهار على عالم مقطعاه الحروب. هو إرت محزن ديال عالم حطماته الخطية وكيتعرض للهجوم ديال العدو باستمرار.

الطريقة اللّي من خلالها كمّل الرسول بولس رسالته لكنيسة أفسس هي طريقة مزيانة ومفيدة. من بعد ما قدّم الحق ديال إنجيل يسوع المسيح وعطا التفاصيل ديال الآثار ديالها على حياتنا في التطبيق، هو ختم كلامه كيهدر على الحرب الروحية:

وْفْاللّْخْرْ كَنْݣُولْ لِيكُمْ آ خُوتِي، تْقُوَّاوْ فْالرَّبّْ وْفْالْقُدْرَة دْيَالُه الْقْوِيَّة. لْبْسُو السّْلَاحْ الْكَامْلْ اللِّي كَيْعْطِيهْ اللَّهْ لِيكُمْ، بَاشْ تْقَدْرُو تّْبْتُو ضْدّْ الْحِيلَاتْ دْيَالْ إِبْلِيسْ. حِيتْ الْحَرْبْ دْيَالْنَا مَاشِي مْعَ بْنَادْمْ اللِّي مْنْ لْحَمْ وْدْمّْ، وَلَكِنْ مْعَ الرُّؤَسَا وْالسُّلُطَاتْ وْالْحُكَّامْ الرُّوحِيِّينْ دْيَالْ هَادْ الزّْمَانْ الْمْضَلّْمْ، وْمْعَ الْأَرْوَاحْ دْيَالْ الشَّرّْ اللِّي فْالسّْمَا. عْلَى دَاكْشِّي هْزُّو سْلَاحْ اللَّهْ الْكَامْلْ بَاشْ تْقَدْرُو تْقَاوْمُو فْالنّْهَارْ اللِّي غَيْكُونْ فِيهْ الشَّرّْ، وْتْقَدْرُو تْبْقَاوْ تَابْتِينْ مْنْ بَعْدْمَا تْكَمّْلُو كُلّْشِي. إِيوَا وَجّْدُو رَاسْكُمْ وْتّْحَزّْمُو بْالْحَقّْ، وْلْبْسُو الضّْرَّاݣَة دْيَالْ التَّقْوَى. وْلْبْسُو فْرْجْلِيكُمْ الْغِيرَة عْلَى الْإِنْجِيلْ دْيَالْ الْهْنَا بَاشْ تْخَبّْرُو بِيهْ. وْدِيمَا هْزُّو تُرْسْ الْإِيمَانْ بَاشْ تْقَدْرُو تْطْفِيوْ ݣَاعْ نْبْلَاتْ الشِّيطَانْ اللِّي شَاعْلَة. لْبْسُو النّْجَا بْحَالْ الْكَاسْكْ اللِّي كَيْحْمِي الرَّاسْ، وْتّْسَلّْحُو بْسِيفْ الرُّوحْ اللِّي هُوَ كْلَامْ اللَّهْ. صْلِّيوْ فْكُلّْ وَقْتْ بْالرُّوحْ الْقُدُسْ فْݣَاعْ الصَّلَوَاتْ وْالدَّعَوَاتْ دْيَالْكُمْ، وْسَهْرُو وْدَاوْمُو عْلَى هَادْشِّي، وْصَلِّيوْ مْنْ جِهْةْ ݣَاعْ الْمُومْنِينْ الْمْقَدّْسِينْ، وْمْنْ جِهْتِي حْتَّى أَنَا، بَاشْ مْلِّي نْبْغِي نْتّْكَلّْمْ يْعْطِينِي اللَّهْ الْكْلَامْ مْنْ عَنْدُه وْبْكُلّْ تِقَة نْبَيّْنْ سِرّْ الْإِنْجِيلْ، اللِّي عْلَى وْدُّه أَنَا سَفِيرْ وَاخَّا مْشْدُودْ بْالسّْنَاسْلْ، إِيوَا صْلِّيوْ بَاشْ نْتّْكَلّْمْ عْلِيهْ بْلَا خُوفْ كِمَا وَاجْبْ عْلِيَّ. (أفسس 6: 10-20)

ملّي توصل لهاد الجزء الأخير من رسالة بولس، ساهل تفكّر بلّي هو بدّل الموضوع كَاع. كيبان بحال هو مابقاش كيتكلّم على الحياة المسيحية ديال كل نهار. ولكن راه هادشي بالضبط علامن هو كيتكلّم. هو كيقول للمؤمنين في أفسس، "كتعرفو كل داكشي اللّي قلته على الزواج، والتربية ديال الأولاد، والتواصل، والغضب، والكنيسة، وغيرها – هادشي كله هو حرب روحية وحدة كبيرة." بولس كيفكرك بلّي راه الحياة المسيحية العملية اليومية هي حرب في التطبيق. كاين بالحق المزيان والخايب في الأخلاق. كاين بالحق واحد عدو. كاين بالحق تجارب كتغري وكتخدع. نت بالحق ضعيف روحيا. ولكن هو كيقول كتر من هادشي. هو كيفكرك بلّي بالنعمة راك مسلّح من أجل هاد المعركة. السؤال هو، واش غتستعمل أدوات المعركة اللّي قدمها ليك صليب يسوع المسيح؟

من أجل دراسة وتشجيع كتر: بطرس اللّولة 5: 6-11