اسم يسوع

موضوع الأسماء في الكتاب المقدس مُلفِت جدًا، دايمًا الناس كانت بتاخد أسماء لها معنى مرتبط بحياتها أو بدعوتها في الخدمة.

مثلًا، إبراهيم معنى اسمه إنه «أب لجمهور كبير». موسى معنى اسمه «المُنتشل من الماء». يشوع معنى اسمه «الله يُخلِّص». واسم يشوع بالتحديد كان مُنتشر بين شعب إسرائيل وفِضل مُستخدم لغاية وقت العهد الجديد، لغاية ما في يوم من الأيام ظهر الملاك ليوسف ولمريم وقال ليهم البشارة عن ولادة يسوع، وكمان قال ليهم عن الاسم ده بالتحديد علشان يسموا بيه المولود اللي جاي!

«يسوع» نفس الاسم اللي بنشوفه في العهد القديم يشوع، وزي ما قولنا معنى الاسم «الله يُخلِّص»... لكن كان في حاجة مُلفتة وفريدة جدًا في تسمية يسوع. إن الملاك ماقالش ليوسف بس تسموه يسوع لكن كمان أكد على معنى الاسم اللي هو الخلاص من الخطية. فبنقرا في متى ١: ٢١، "فَسَتَلِدُ ٱبْنًا وَتَدْعُو ٱسْمَهُ يَسُوعَ. لِأَنَّهُ يُخَلِّصُ شَعْبَهُ مِنْ خَطَايَاهُمْ".

لكن خلي بالك إن المرة دي وهو بيتكلم ماقالش لإن الله هيخلّص شعبه من خطاياهم، لكن قال إن المولود ده هو نفسه اللي هيخلّص شعبه من خطاياهم.

فمعنى اسم يسوع «الله يُخلِّص» وبعدين الملاك يقول "… لِأَنَّهُ (هو!) يُخَلِّصُ شَعْبَهُ مِنْ خَطَايَاهُمْ"... وكإن الملاك بيقول المولود ده هو الله نفسه، وهو اللي جاي علشان يُخلِّص شعبه من خطاياهم…

يمكن بنفتكر القصة دي أوقات الإحتفال بالكريسماس، لكن في الحقيقة قصة الميلاد بترفع عينينا على السبب الرئيسي لمجيء الرب يسوع: وهو إنه جه علشان يبذل نفسه ويخلَّص شعبه من خطاياهم.
فهل قبلت إن يسوع يخلصك من خطاياك؟