Aposol 10

E Pita mere Konilius

1Tara taun i Sisaria e ka mei a töa katuun a solonen e Konilius, a tsunono te mamin a töa pala turu ami ra i Itali. 2Nonei e hamanaia tere Sunahan, na nonei na u katuun hoboto i luma tanen i hatsunoni e Sunahan. Nonei e roron hala ni a moni tina taguhu merai u Jiu ti möa ta moni, na nonei e roron singo has uu tere Sunahan. 3Turu töa u lan tara pal 3 kilok tara lahi nonei i hatare ii u töa u hiharöto te tara hanigan töa naien a angelo tere Sunahan bate tasuna me poeiena i tanen, “O Konilius.”

4Be Konilius e tara tötoso nitöa mena a nimatout me poeiena, “O tsunono, aha nonei?”

Ba angelo e poeiena i tanen, “U singosingo na nihalhala moni i tamölö, e Sunahan e hengoeien na e tari a manka teka me sasaala menen. 5Alö go tula rela u katuun tara taun i Jopa, ba nori tena ngöe rima a katuun te ngöeri e Saimon Pita. 6Nonei e ka gono mena a tana Saimon, a katuun te roron hapalakeiena a pikpiköna a bulmakau. A luma i tanen e kana i rehina a tasi.” 7Pöata te la hakapaia a angelo te rangaia i tanen be Konilius e ngö rena a huol katunun kui i tanen, ba nonei e ngö hasena a töa soldia te kui be haseien na te hatsunono hasi e Sunahan. 8Ba nonei e hatei raneien a ka te butuia i tanen me tula mera neien i Jopa.

9Tara pal söasa turu hamahö ti la noaien i maroro me sukusukun tuku hamanasaria tara taun, be Pita e seina tara makumun roro ieluna luma tena singo uaien tere Sunahan tara söasa. 10Ba nonei e sagohena a bes me ngilin nouna. Tara pöata ti nas noeien a kannou, be Pita e tarena u töa u hiharöto. 11Ba nonei e tareiena u Kolö e takalata, ba töa ka te here ii u labalaba u tataabala e koul uanama i puta, me here namei a tohats a katuun i pileia tara tohats a makum rungu na u labalaba bate hakoule rumen. 12Mamana mar enimol e kaia turu labalaba teka, u poum na kori na mamanaka te silna turu tsiktsiki na u apena has. 13Ba u töa u raranga e poeiena i tanen, “O Pita, alö go takei balö te atung hamatem ta ka, bate noum!”

14Be Pita e poeiena, “O Tsunono, e möa koru! Taraha, alia e namala nouegi ta ka ta korkoriana na ta omi.”

15Ba u raranga teka e la lel uanama i tanen a hahuoluna a pöata, “A ka te haniga nena e Sunahan tego noui lö, alö goma tatei agono naien.” 16U ranga teka e butu a topisa a pöata bu labalaba e las sei pouts menari i Kolö.

17Pöata te hakats hapan koru naia e Pita a ka te tareien na ime temar mouna uaien, ba u katuun te tula rema e Konilius te tukur i matana a luma tere Saimon. 18Ba nori e ngör me rangatar, “Ime te kana a katuun te ngöeri e Saimon Pita?”

19Pöata te hakats noahas naia e Pita a ka te tareien, ba u Namnamei tere Sunahan e poeiena i tanen, “A topisa a katuun e rangata na riou lö. 20Takei balö te koulum i puta batena tara ramen bate la gono mera men. Alö goma toku ii, taraha alia te tula ragu men.” 21Be Pita e koul uana i puta mena rangana turu katuun mena poeiena i taren, “Alia nonei a katuun te sakie muma limiou. Alimiou e la sile muma aha?”

22Ba nori e poeier, “A töa tsunono tara ami, a solonen e Konilius, e tula rena moulam. Nonei a katuun a niga na nonei e hatsunono hasena e Sunahan, u Jiu hoboto e hanige ren. A töa angelo tere Sunahan e butuia i tanen me poeiena, ‘Alö gona ngöeiema e Saimon Pita ba nonei te la uanama i luma i tamölö, balö te hengo mia turu ranga i tanen.’” 23Be Pita e ngö rena u katuun me hasoho ranen tara luma tere Saimon.

Turu tana u lan be Pita e la gono mera nen. A palair u katunura i Jopa ti hamanaia tere Iesu i la gono has meraien. 24Nori i sohoia i maroro, ba turu hamahö ba nori ena tuku ria i Sisaria. E Konilius e ngö gögono hakaper a sungutu nen na man hahikapien has i tanen, ba nori e hahaloso raren. 25Tara pöata te tukuia e Pita, be Konilius e tupale nen me hatukunna i matanen me turu putana. 26Kaba e Pita e hatakeien me poeiena, “Takei, alia a katuun tuun has.” 27Pöata te ranga gono meia e Pita e Konilius ba nori e tasur i luma, be Pita ena tarena a katuun a para koru ti gono hoboto. 28Ba nonei e poeiena i taren, “Alimiou e atei silemiou a Lo i tamulam u Jiu te hapiou nena tego kapiena merai lam u katuun tema Jiu ri. Na lam u Jiu ema tatei tasu has mia tara luma i tamilimiou. Kaba e Sunahan e hatare lalei lia, alia goma mar hakats lel uai teka. Alia goma tatei pei lelei a tana katuun e tara halel na i matana e Sunahan. E möa. 29Ba tara pöata tu hangö mula limiou, alia uma rama mei na lia uma hapinamei me la guma. Aha tu hangö me mula limiou?”

30Be Konilius e poeiena, “U tohats u lan te la hakapa, tara mar pöata teka, alia una singo tara 3 kilok tara lahi. Ba töa katuun e hasogi u hasobö u kankanaha nitöa e songots butuna me tuoluna i matar. 31Ba nonei e poeiena, ‘O Konilius, e Sunahan e hengo hakapi a man singosingo i tamölö, na nonei e hakats kap has nena te roron hala mena milö a moni turu katuun ti möa ta moni. 32Alö go tula rela u katuun i Jopa ba nori tena ngöe ruma a töa katuun a solonen e Saimon Pita. Nonei e kana tara luma tara tana Saimon te hahapalakeiena a pikpiköna bulmakau. A luma i tanen e kana i rehina a tasi.’ 33Ba lia e hangö boroboro na goulö, na e niga koru mena te la ua mumalö. Na lam e ka hoboto talamia teka i matana e Sunahan, tegomi hengo menai lam a man raranga hoboto te hale ii lö a Tsunono.”

E Pita e katoe u ranga

34Be Pita e tanian rangana me poeiena, “Alia e atei hamana talagu, e Sunahan ema ngil kalakala ranei u katunura i puta. E möa. 35E Sunahan e haniga rena u katuun turu han hoboto te hatsunone ren na te kato hamatskör. 36Alimiou e atei silemiou u ranga te hala namen i tamulam u katunura i Israel. U raranga teka e habulungana nena a masalohana temi halan e Iesu, bate hakapa hasena u pakö turu katuun i tanen. Nonei a tsunono turu katuun hoboto. 37U raranga teka e taniama i Galili me la ualala i Judia i murina a tou baptais tere Jon. 38E hatei nena e Iesu na i Nasaret. E Sunahan e hale meien u Namnamei u Göagono na nitagala has. Nonei e tataala bate taguhu rena u katuun na nonei e kato haniga pouts hasir u katuun hoboto ti ka mei a siki na u katuun te pile kapir e Satan, taraha e Sunahan e ka gono meien.

39“Alam tu tarei a manka hoboto te katoeien i Jerusalem na tara palair u han has turu Jiu. Ba nori e hakute rien tara kuruse me atung hamate ren. 40Kaba turu hatopisana u lan e Sunahan e hatakei poutseien tara tou mate i tanen, be haröto nanen turu ualesala i matar u katuun. 41U katuun hoboto ima tareien kaba alam tu tareien, taraha e Sunahan e hopö kap mam raiou lam tego tara menai lam a ka teka ba lam tena hahatei namen. Alam u nou gono meien na u ua gono has meien i murina te takei pouts ien tara tou mate. 42Na nonei e ranga meraiou lam me poeiena, ‘Alimiou gona hahatei naiam u Bulungana u Niga turu katuun, ba tena hatei ramien e Sunahan e hopö kap naiou lia tego ona menai lia u katuun te töatöar na u katuun ti mate.’ 43U propet hoboto i ranga naien me poeier u katuun hoboto te hamana ria i tanen, e Sunahan e luba nanou a man markato a man omi, taraha e Iesu e taguhu ranouen.”

U katuun tima Jiui i lui u Namnamei u Göagono

44Pöata te ranga noahasia e Pita ba u Namnamei u Göagono tere Sunahan e koul nama memi tö na turu katuun hoboto ti hengo u ranga. 45U Jiu ti la gono mema e Pita u katunun tsitsilo tere Iesu i asingoto koru, taraha e Sunahan e hala nema u Namnamei u Göagono i tanen turu katuun has tema Jiu ri. 46-47Taraha nori i hengoe ti ranga uaien tara man taina man ranga me soloseier e Sunahan. Be Pita e poeiena, “U katuun teka e lu haser u Namnamei u Göagono tu mar lu has menaien lam. E möa ta katuun tega antunan hapioun tegi baptais merai u katuun teka u ramun,” 48Be Pita e ranga mera nen tegi baptais meraien tara solona e Iesu Kristo. Ba nori e rangate ren tego gamon ka buaien bate ka gono mera nen.

المحددات الحالية:

Aposol 10: HLA 2020

تمييز النص

نسخ