MATIO 2

Mghɛ zhyə sɛ sɔ' jɔ Yeso

1Pú dzə́ Yeso Bɛtəlehɛm m Yudea, nə cwə fo Herode. Shɑ́ mghɛ zhyə́ sɛ fɑ ghəŋ nthəm nam ŋwak Yerusalɛm 2dzɑ́tə́ gɑ: Fo pɑ Yudea yə pu bɑwə tə́ dzə́ e a hɑ? Nə pa' pyə yɔ sɛ tsyə́ ghəŋ nthəm nam tə́ sɔ' m nə ghamtə e. 3Fo Herode lə nə yu' mcuŋ bɔ, a va' e, ba guŋ Yerusalɛm awɛ. 4E lə cu'tə guŋ mkamsi gwyəgwyə awɛ pu a guŋ pɑ zhyɛ mco' awɛ nthʉm guŋ, həŋtə́ wap tsʉ' yə pu lə gɔ la' tsə́ Mesia nə a. 5Wap ghɔm bi e gɑ: M Bɛtəlehɛm m Yudea, nə pa' ywə yə gɔ̀m ghɔ̀m Si lə və a bɑ gɑ: 6Wə Bɛtəlehɛm, cǎ' pɑ Yudea, o tə bɑ jʉɔjʉ̀m nə mtisuŋ pɑ Yudea pɑ; nə pa' Fo yə e gɔ sɔ' pɑ cya pɑ Israɛl pɔ pɑ̌ a gɔ sɔ' təm bu. 7A lə pɑ po'o, fo Herode ghə pu ké mghɛ zhyə sɛ m càm e həŋtə wap kwa' cwə yə sɛ bɔ kɑ təm a, 8tə biŋ nə təm wap Bɛtəlehɛm gɔm bi pu gɑ́: Po ghɔ shəŋtə həŋtə́ mcuŋ nə mu bɔ̌; cwə yə pɔ yɔ e a po ghə ŋ jyə, po'o gɑ ba myə̀ ghɔ gamtə e yɑ̌.

9Wap lə yu' ghɔm fo cwəlɔ, ntham məjyə; sɛ tsyə wap kɑ yɔ̌ ghəŋ nthəm nam a ghiŋ bɑ dzə pu tə gɔ nthiŋnyə dəm tsʉ' yə mu bɔ lə bɑ nə a. 10Wap lə nə yɔ sɛ cwəlɔ kwa' mɑ ŋwɛnyə ko nə pu. 11Wap lə kodyə, jɔ mú pu Maria map e; ŋkham mkwi'tə map dzə é, gamtə e, biŋ ntha' mpʉə map cwəlɔ, hɑ tʉ́ɔ gɔl, ba phə tʉɔdəŋ pú a mwɑ̌ tʉɔdəŋ bi e. 12Si lə cyə́ m nthʉm jʉm biŋ gɔm bi pu gɑ́ wap kɑ piŋ bɑnyə bəŋ Herode, wap lə cyə m nə mu' məjyə dyɛ' bɑnyə gǔŋ pú.

Nə ŋkhʉ gɔ Egipto

13Mghɛ zhyə sɛ lə cwə́ tə gɔ̌, aŋgəle Cyəpɔ sɔ' bi Yosɛp m nthʉ̌m jʉ̀m gɔm bi e gɑ: Lusi dɑ mú pu map e ŋkhʉ gɔ Egipto, shwə wə tə ŋkhəm cwə yə gɑ ghɔm a, nə pa' Herode wə gɔ cə́ŋ mú nə zhwə e. 14Yosɛp lə lusi pɑ mtsʉ' dɑ mú pu map e gɔ Egipto. 15E lə cwə́ wə́ tə ŋkhəm cwə yə Herode lə pfʉ a, po'o gɑ ywə yə Cyəpɔ lə ghɔm shyə m nə gɔm ghɔm Si a, a pəmtə gɑ:

Gɑ̌ ke mú a, nthé é Egipto.

Nə si'nyə pǒ Bɛtəlehɛm

16Herode lə nə yɔ gɑ́ mghɛ zhyə sɛ fʉtə e, nwə pɔk e, e təm gɑ pu ghɔ Bɛtəlehɛm, ba m nthʉm guŋ e awɛ, jwətə guŋ pɔ awɛ tə ŋkhəm nə gu' pʉ́ə, dəŋ pa' mghɛ zhyə sɛ lə siŋ e a. 17A pɑ po'o ywə yə Yeremia gɔm ghɔm Si lə ghɔm a, a pəmtə gɑ: 18Pu yu' gi mo Rama, e pɑwə dɔ̌ biŋ bɑwə shwe; Lachɛl nə dɔ po pyə, la' e pɑwə biŋ gɑ mo zhwyətə e, nə pa' po pyə tə yɑwə pɑ́.

Nə fɑ Egipto

19Herode lə cwə tə pfʉ́, aŋgəle Cyəpɔ sɔ' bi Yosɛp nthʉ́m jʉ̀m Egipto 20gɔm bi e gɑ: Lusi dɑ mú pú map e bɑnyə Israɛl; pɔ pyə wáp lə bɑ́wə shəŋ nə zhwə mu a pfʉ́tə. 21Yosɛp lə lusi cwəlɔ dɑ mu pu map e, bɑnyə Israɛl, 22da' gɑ́ e lə nə yu' gɑ Arkelao nə wə́ sa' guŋ pɑ Yudea nə yə tsʉ' tap e Herode, bwɔk nə ghɔ wə́; Si lə ghɔmnwə bi e m nthʉm jʉm, e lɑ m Galilea 23gɔ shwə nə mu' tisuŋ pu ke gɑ Nazarɛt po'o gɑ ywə yə mghɔm ghɔm Si lə la' gɔm a pəmtə gɑ: Pu gɔ sɔ' ké é gɑ yə Nazarɛt.

المحددات الحالية:

MATIO 2: NTGomala

تمييز النص

نسخ