Naṉ. 13
13
Apram Rautja̱i̱ kanaamu
1Ayu, Apramka ni nua̱ri̱ji̱a̱i̱ tura ashí wariri̱ntiuk nuyá̱ kaná uchirí̱ Rautja̱i̱ Ejiptunmaya̱ jíinkiar arakaani̱ Nekepnum waketkiarmiayi. 2Tura Apramka tí kuitrinniuyayi kurincha, kuítniasha ántsaṉ untsurí taṉkun takaruyayi. 3Tura Nekepnumia̱ tuke arakaani̱ wéa wéakua Pitir nuṉkanam yuntumas nuik pujusmia nui̱ṉ ataksha waketkimiayi. Nusha Pitir nuṉkaja̱i̱ Aai nuṉka ajapén etentamunmaiti. 4Nui̱k Apram kayan irumar Yus shiir awajtai̱n najana Uunt Yusan áujsamia nui̱nti.
5Núnisaṉ Rautcha tí kuitrinniuyayi. Kaná aparí̱ Apramja̱i̱ métek muriknasha waakancha takarniúri̱ncha takaruyayi. 6Tura mai̱ ti taṉkurtin ásar nú nuṉkanmaṉ pujuschamnia ármiayi. Warí taṉkú yurumke̱sha táamiarmiayi. 7Tuma asamtai Aprama taṉkuri̱n wainniusha tura Ráutnan wainniusha kajernáiyarmiayi. Tura nuna naṉkaamas Kanaan aentssha ántsaṉ Píris aentssha nú nuṉkanmaṉ tuke matsamármiayi. 8Chíkich tsawantai̱ Apram Ráutan chichareak “Iisha nuamtakchakaitiaj. Íiji̱a̱i̱sha tura ii taṉkuri̱ wainniusha kajernaikiatin péṉkerchaiti. 9Yamaikia íiji̱a̱i̱ṉkia kanaktiai. Nuṉka aṉkant awai. Ame wakeramu achikta. Ame menanmaani̱ pujustájai tákumni̱ṉkia wikia untsuurnumaani̱ pujustájai. Antsu ame untsuurnumaani̱ pujustájai tákumni̱ṉkia wikia menanmaani̱ pujustájai” tímiayi Apram.
10Nuyá̱ Jurtana pakarí̱n tí peṉker tépakun Uunt Yusa ajarí̱ya̱ núnin entsarkiámun tura Ejiptunam Suárnumaani̱ ana núninian nuyá̱ Sutuma tura Kumura Uunt Yus émestsa̱i̱ṉ urukuya timianú péṉkeran Rautcha wainkiamiayi. 11Nui̱ṉkia Rautka Jurtan entsa pakarí̱n achikmiayi. Achikiu asa etsa̱ tatainmaani̱ wémiayi. Nuní̱ Apramka Rautja̱i̱ kanakiármiayi. 12Apramka Kanaannumaṉ juákmiayi. Tura Rautka pakanam wéak írutkamu armia nui̱ pujurkutak Sutuma írutkamunmaani̱ wémiayi. 13Tura Sutumanmaya̱ aentska Uunt Yusan nakitiáiniak tunaan tura tí yajauchin túrin ármiayi.
14Kame Raut wématai Uunt Yus Apraman chichareak “Pujamna nuyá̱ nuṉka mash íisarta. 15Tura ashí wáinmena nú nuṉkan amastatjai. Nuka áminiu ántsaṉ tiraṉminiu tuke atumnia átatui. 16Naikim nekapmarminkiait. Tímiatrusnak ame tiraṉmincha nekapmarchamnia awajsattajai. 17Wats jú̱ nuṉka esantí̱ tura waṉkantí̱sha wekasam Iistá. Íistatmena nuna ashí amastatjai” Yus tímiayi.
18Tutai Apramka jutai̱ je̱e̱n ashir jukí̱ Eprunnum jeastatuk numi ukat ukatin mátsata Mampri náartinnium pujuumiayi. Nui̱ Apramka Uunt Yusan shiir awajsataj tusa Uunt Yus áestutai̱n najanamiayi.
المحددات الحالية:
Naṉ. 13: jiv
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©2009 Avant Ministries in cooperation with Wycliffe Bible Translators, Inc. All rights reserved.
