Эхин 4
4
Адаам Ева хоёрой хүбүүдэй түүхэ
1Адаам Ева һамгантаяа хэбтэбэ, тиин тэрэнь хээлитэй болоод, хүбүү түрэжэ:
– Эзэнэй аша туһаар би хүниие бүрилдүүлбэб! – гэбэ. Тиигээд тэрээндээ Хаяан гэжэ нэрэ үгэбэ. Энэнь «хүбүүтэй болоһон» гэһэн удхатай нэрэ юм. 2Ева баһа нэгэ хүбүү түрөөд, Аабэл гэжэ нэрэ үгэбэ. Томо болоходоо, Аабэл хонишон, Хаяан таряашан болобо.
3Хожомынь нэгэ үдэр Хаяан Эзэндэ талархалаа элирхэйлхэ гэжэ газарайнгаа ургасаһаа үргэбэ. 4Харин Аабэл хонин һүрэгэйнгөө түрүүшын түлэй хамагай тарганииень шэлээд, Эзэндэ үргэбэ. Аабэлэй үргэл Эзэндэ һайшаагдаба, 5харин Хаяанай үргэл һайшаагдабагүй. Энээндэ Хаяан ехэ уурлажа, шэг шарайнь барайба.
6– Ши юундэ уурлабаш? – гэжэ Эзэн Хаяанһаа асууба. – Юундэ шэгшни хубилбаб? 7Хэрбээ зохистой хэрэг хэһэн һаа, ши энеэжэ байха һэнши. Харин шинии зохисгүй хэрэг хэһэн ушарһаа нүгэл хэхэ гэһэн хүсэлшни үүдэнэй хажууда отожо, зэрлиг амитан мэтэ шамайе хүлеэжэ байна. Гэбэшье ши тэрэ хүсэлөө дабан диилээрэй.
8Хаяан Аабэл дүүдээ хэлэбэ:
– Хээрэ тала гарая.
Тэдэнэр хээрэ тала гараба. Тэндэ Хаяан гэнтэ Аабэлдэ добтолоод, алажархиба.
9Эзэнэй Хаяанһаа:
– Аабэл дүүшни хаанаб? – гэжэ асуухада,
– Мэдэнэгүйб! Би дүүгэйнгээ харуулшан юм гүб? – гэжэ Хаяан харюусаба.
10– Ямар юумэ хэбэ гээшэбши? – гэбэ Эзэн. – Дүүгэйшни ами шуһан нам руу газарһаа хашхаржа байна! 11Одоо Би газар хүрьһэнтэйш хамта шамда хараал шэнгээхэм. Алаһан дүүгэйш шуһан энэ газарта нэбтэрэнхэй. 12Шинии хэдышье энэ газар үйлэдбэрилхэдэ, тэрэшни шамайе тэжээхэ, хооллуулхагүй. Энэ сагһаа хойшо ши орон нютаггүй зайгуул, тэнүүл болобош.
13– Энэ хэһээлтэ намда айхабтар хүшэр хүндэ, – гэжэ Хаяан Эзэндэ хэлэбэ. – Энээниие би даажа шадахагүйб. 14Энэ орон нютагһаа, Өөрһөө намайе намнанат. Тиигэбэл, орон нютаггүй зольбо болохоб, дайралдаһан лэ хүн намайе алаха бшуу.
15Зүгөөр Эзэн харюусаба:
– Тиимэшье бэшэ. Хэн шамайе аланаб, долоо дахин гэмынь ехэ болгоод, тэрээнһээ үһөөгөө абахаб.
Тиигээд Эзэн уулзаһан зоной Хаяаниие алахагүйн тула тэрээндэ тусхай тэмдэг табиба. 16Хаяан Эзэнһээ холодон, Эдээмһээ зүүлжээ Ноод гэжэ газарта байрлаба.
Хаяанай үри һадаһад
17Хаяан һамгантаяа Ноодто амидаржа, һамганиинь хүбүү түрэжэ, Эноох гэжэ нэрлэбэ. Хаяан хото балгааһан барижа, тэрэнээ хүбүүнэйнгээ нэрээр Эноох гэжэ нэрлэбэ.
18Эноох Ираад гэжэ хүбүүтэй болобо. Ираадһаа Мэһуяаһээл, Мэһуяаһээлһээ – Мэтушаһээл, Мэтушаһээлһээ Лаамэх гараба.
19Лаамэх хоёр һамга абаһан юм: нэгэнэйнь нэрэ Адаа, хоёрдохинь Циллаа гэжэ нэрэтэй. 20Адаа гээшэһээ Ябаал гэжэ хүбүүн түрэбэ: эгээл тэрээнһээ майхан соо байдаг, мал адуулдаг хүнүүд гараһан юм. 21Ябаал Юбаал гэдэг дүү хүбүүтэй һэн: тэрээнһээ ятага болон лимбэ дээрэ наададаг зон үдэбэ.
22Лаамэхай хоёрдохи һамган Циллаа хүүгэдтэй боложо, Тубаал-Хаяан гэдэг нэрэ үгэбэ. Тубаал-Хаяан түмэршэ дархан боложо, гуулин, түмэрөөр олон янзын багажа хэрэгсэл хэдэг һэн. Тубаал-Хаяан Наһамаа гэжэ дүү басагатай һэн.
23Нэгэ үдэр Лаамэх һамгадтаа иигэжэ хэлэбэ:
– Адаа Циллаа хоёрни! Шагнагты намайе! Намайе айлгажа һүрдүүлхэ гэһэн нэгэ залуу хүниие би алааб. 24Хаяаниие алаһан хүн долоо дахин хүндөөр шиидхэгдэхэ һаа, намайе алаһан хүн далан долоо дахин хүндэ хэһээлтэ амасаха.
25Адаамай һамган дахин нэгэ хүбүү түрөөд:
– Хаяанда алуулһан Аабэл хүбүүнэйм орондо Бурхан намда үшөө нэгэ хүбүү үршөөгөө, – гэжэ хэлэн, тэрээндээ Шээт#4:25 Шээдэй нэрэ «үгэһэн» гэжэ удхатай. гэжэ нэрэ үгэбэ.
26Шээт хожом хүбүүтэй болоод, тэрээндээ Эноош гэжэ нэрэ үгэбэ.
Тэрэ сагһаа эхилэн, зон Эзэнэй нэрэ солынь дуудадаг болоо бэлэй.
المحددات الحالية:
Эхин 4: BurBBL2024
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
