मर्कुस 7
7
रितिथिति रे चालचलनका बारेमि
(मत्ति १५:१-९)
1यरुसलेमबटहइ आया फरिसि रे धर्म-गुरु इसुका चारइतिर भेला भया। 2पइ इसुका कसइ कसइ सिस्याले हात नधोएइ खान्नारया तिनुले धेक्यो।
3फरिसि रे सप्पइ यहुदि तिनरा पुर्खाले दिया रितिथिति रे चालचलन अन्सार हात नधोएइ खाना खानाइनथ्या। 4बजारबटहइ आया पाछा सुद्द नभइबर तिनु केइ खानाइनथ्या। रे अउरलइ भउतइ रितिथिति मानन्थ्या। जसइकि थालि, कटउरा, भाँणाकुणा, खाट लइ नचोख्याएइ चलाउनथ्या।
5तबइ फरिसि रे धर्म-गुरुले उनुलाइ सोध्यो, “तमरा सिस्या पितापुर्खाले चलाया रितिथिति रे चालचलनमि क्यालाइ चल्लाइन्, रे असुद् हातले खानाहान्?”
6तबइ इसुले तिनुलाइ भुन्यो, “यसइया अगमबक्ताले तम कपटिका बिसयमि यसेरि अगमबाणि अर्यो,
“‘जसो लेखिया छ, एइ जातिले मुलाइ मुखले मात्तरइ आदर अरन्छ,
तर तिनरो ह्रिदय भन्या मुबटहइ टाडा छ।
7तिनुले मुलाइ आराधना अर्या बर्थइ हो,
क्यालाइकि तिनु खालि मान्सले बनाया नियम मात्तरइ सिकाउनाहान्!’
8“तम परमेस्वरका आग्यालाइ छाडिबर मान्सले बनाया रितिथिति रे चालचलन मान्नाछउ।”
9इसुले तिनुलाइ भुन्यो, “तमु आफना रितिथिति रे चालचलन मान्नाइलाइ परमेस्वरका आग्यालाइ लत्याइदिन्छउ। 10क्यालाइकि मोसाले भन्या छन्, ‘आफना इजा रे बालाइ आदर अर,’ रे, ‘जइले इजा-बाका बिरुद्दमि फुचेरा कुरा बोलन्छ त्यो मारिनुइ पणन्छ।’ 11तर तमले भन्या यसा कुरा सिकाउन्या रइछउ, कसइले आफना इजा-बालाइ, ‘हेर तमुले मुबटहइ पाउन्या कुरा बलिदान हो या’ यो कुरा मुइले परमेस्वरइलाइ चडाइसक्या भुन्यो भन्या, 12तइले आफना इजा-बाको सेबा अद्दु पड्डइन भनिबर तइलाइ रोकन्छउ। 13इसेरि तमु आफना चलिआया रितिथिति रे चालचलन कायम राखिबर परमेस्वरका बचनलाइ रद्द अरन्छउ। रे यसाइ अनेक काम तमु अरन्छउ।”
मान्सलाइ असुद्द पाड्या कुरा
(मत्ति १५:१०-२०)
14इसुले अज मान्सलाइ आफना वाँ बोलाइबर भुन्यो, “तमु सप्पइले मेरा कुरा सुन रे बुझ। 15यसो केइ कुरा आथिन् जो मान्सका मन भित्तर पसिबर तइलाइ असुद् पाणन्छ, तर मान्सका मनबटहइ बाइर निकल्या कुराले मान्सलाइ असुद् पाणन्छ। 16[जइको सुन्न्या कान छ तइले सुनउ।]”
17इसु मान्सलाइ छाडिबर घरभित्तर पस्यापाछा उनरा सिस्याले यइ कुराको अर्थ बुझाइ दिय भुन्यो। 18इसुले तिनुलाइ भुन्यो, “क्या तमु अजलइ अउर जसा अबुझइ छउ? क्या तमुलाइ थाँ आथिन्? मुखबटहइ भित्तर पस्या कुराले मान्सलाइ असुद् पाड्डइन्। 19क्यालाइकि त्यो उइका मनभित्तर हइन, तर पेटभित्तर पसन्छ, रे बाइर निकलन्छ।” (यसेरि इसुले सप्पइ भोजन सुद्द हो भनिबर बताइदियो।)
20इसुले भुन्यो, “मान्सका मनबटहइ ज्या बाइर निकलन्छ तसइले मान्सलाइ असुद्द पाणन्छ। 21क्यालाइकि सप्पइ किसिमका खराब बिचार मान्सका मन भित्तरबटहइ निकलबर आउनाहान् रे उइलाइ खराब कामतिर लइजान्छ जसो कि, ब्यबिचार, चोरि, हत्या, अनइतिक्ता, 22लोब, दुस्टता, छल, छाडापन, रिस, निन्दा, घमण्ड, मुर्खता निकलन्छ। 23यिनु सप्पइ फुचेरा कुरा मनभित्तरहइ निकल्लाहान्, रे मान्सलाइ असुद् बनाउनाहान्।”
अउरजातिकि स्वाइनिको बिस्वास
(मत्ति १५:२१-२८)
24तइपाछा इसुले त्यो ठउँर छाडिबर टुरोस रे सिदोनका छेत्रतिर गया। कसइले थाँ नपाउ भनिबर उन एक जनाका घर पस्या। तर मान्सले थाँ पाइहाल्यो। 25तसइबेला एक स्वाइनि मान्सले इसुका बिसयमि सुन्यो रे आइबर उनरा खुट्टाइनि घोप्टि पणि तइ स्वाइनि मान्सकि चेलिलाइ दुस्ट आत्मा लाग्या थ्यो। 26त्यो सिरियाका फोनिके भुन्न्या ठउँर जन्मेइ एक ग्रिक स्वाइनि थिइ। रे तइले आफनि चेलिबटहइ भुत निकालिबर निको पाणिदिय भनिबर इसुलाइ बिन्ति अर्यो। 27उनुले तइलाइ भुन्यो, “पइलि खान्या कुरा आफना चेला-चेलिलाइ दिय, क्यालाइकि चेला-चेलिको रोटो लइजाइबर कुकुरलाइ दिन ठिक हुनइन्।”
28तर तइले इसुलाइ भुन्यो, “हो प्रभु, रे कुकुरले लइ त चेला-चेलिकाइ टेबुलबटहइ झड्या टुक्णा टाक्णि खानाहान्”
29उनुले तइलाइ भुन्यो, “तुइले यसो भन्या हुनाले ढुक्क होइबर घर जाँ। रे तेरि चेलिबटहइ दुस्ट आत्मा निकलबर गइसक्या छ।”
30त्यो घर गइ रे चेलि खाटमि सिरया भिट्यो पइ तइबटहइ दुस्ट आत्मा निकलिसक्या थ्यो।
इसुले मुख नबोल्या रे कान नसुन्या मान्सलाइ निको पाण्यो
31टुरोसका छेत्तरबटहइ निकल्बर इसु सिदोन सहर भइबर डेकापोलिसको सिमानाका बिचबटहइ भइबर गालिल समुन्दरतिर आया। 32ताँ मान्सले एक जनो मुख नबोल्या रे कानि नसुन्या मान्सलाइ उनरा वाँ लेइबर आया, रे तइलाइ छोइदिय भनिबर बिन्ति अर्यो। 33इसुले तइलाइ मान्सका भिडबटहइ थोक्काइ पल्तिर लइयइबर आफना अउला तइका कानमि लायो। रे थुकिबर तइका जिब्रणामि छोयो। 34तइपाछा इसुले स्वर्गतिर हेरिबर लामो सास लि तइलाइ भुन्यो, “इफ्फाता,” जइको अर्थ हो “खोलिजा,”
35तन्जेइ त्यो कानि सुन्न्या रे जिब्रणो चलिबर निकेरि बोल्ल सक्द्दया भयो। 36तर इसुले तिनुलाइ “यो कुरा कस्इलाइ जनभन्या” भनिबर भुन्यो। तर जतिलाइ उनुले यो कुरा जनभन्या भुनि आग्या दियो झिग बर्ता उस्साहित भइबर तिनुले त्यो कुरा भन्नइ हिट्या। 37यो कुरा सुन्न्या जति सप्पइ मान्स अचम्म मानिबर भुन्न लाग्या, “उनुले कति निका काम अर्या छन्। उनुले कान नसुन्यालाइ सुन्या रे बोल्ल नसक्द्यालाइ बोल्ल सक्द्दया लइ बनाया छन्।”
المحددات الحالية:
मर्कुस 7: DOTY
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2024 (Active), Mother Tongue Translators Society and Wycliffe Bible Translators, Inc. All rights reserved.
