Génesis 39
39
Joséwe Potifarpa awĩ
1Ismaelitawawe José iyuawudu Egipto adu ikatu dukuwede awẽ ade Potifarpa José peiuxũ widi. Egipto adu diaiwukui faraón idi. Naatu Potifar diaiwuwaa soldadowawe atũ diaiwu.
2Diospa José kexesharapaudi. Awẽ diaiwu Egipto adua idi awẽ pexe adu ike Diospa axusharapaudi awẽ diaiwu yudusharaxunu. 3Diospa José axuwaitu awẽ diaiwawe José unadi Diospa axusharapaudi sharata inu. 4Naskake José awẽ diaiwu idibabapaudi. Naskata Potifar aki chipu diapaudi awẽ awarawumai kexexuwaitu. 5Potifarpa José awarawu kexebaidu Joséuxũ Diospa Potifar Egipto bai adu ika sharawapaudi awẽ pexe adu awẽ wai aduri. 6Potifarpa awẽ awarawu Josépa kexexupaudi. Naskake ana shinachakapaudiba. Pikĩ wisti shinapaudi. José wesu sharaya ipaudi kayakawikui. 7Naskata peda wetsa awẽ diaiwũ awĩni uĩyana yuidi iskawadi: “Ewe iwe”, wadi.
8José awe ikaspakĩ kebadi: “Ewẽ diaiwu iki chipu dia. Awẽ awarawu ẽ kexexuke ana awa shinachakaiba. 9Matu pexe aduxu ea tsuã winuaba. Ewẽ diaiwawe ea awa wishkuaba. Mi awẽ awĩ. Aweskai ẽ chakatirume Epa Dioskiriwi”, Josépa wadi. 10Na pedatiiwi: “Ewe iwe”, wawiyaitu Josépa tadapaudiba.
11Naskata wetsatiã Josépa awẽ diaiwawe pexe adu yudui kai kadi. Adu tsuabadu nadu Potifarpa awĩ wisti idi. 12Naatu José awẽ sawetini achita: “Ewe iwe”, wadi. Awẽ saweti achinadu aki edewaĩdi José pexe aduax ichudi.
13José awẽ saweti tsubax Potifarpa awẽ awĩ 14tsai ewapatu kedainakawa atu kedadi wene awẽ uibatiwu: “Ewẽ wene hebreo eweita dukuki kaxepai. Ewẽ pexe adu ikikaita ewe ipaiyaitu tsai ewapatu ẽ kedainakawada. 15Ẽ wasĩ kedayaitu dikakĩ awẽ saweti putawaĩda ichukĩ”, Potifarpa awẽ awĩni atu wadi.
16Naskata Josépa awẽ saweti wadi wede dasuxu uĩyunu. 17Naskata wede dukuwaitu yuidi: “Hebreo mia duku ewexuita kede mera ikikaita ea achita ewe ipaiya. Eũ duitaba iki kaxepaiya. 18Ẽ wasĩ kedayaitu dikai ichukĩ awẽ saweti iki putawaĩda”, wede wadi.
19Awĩni naduri yuiyaitu dikai Josépa awẽ diaiwu sidakuidi. 20Naskaxu atu yuidi José achinuwu. Naskata faraón awẽ cárcel mera yurawu ikawu mera José nichidi.
21Diaiwu Diospa awẽ shina shara José uĩbaidu cárcel mera ikawawe atũ diaiwawe sharawapaudi. 22Naskakata cárcel mera atũ diaiwawe José diaiwuwadi cárcel meraduawu atu kexeta atu yuinu awara anuwu. 23Cárcel mera atũ diaiwawe ana shinachakadiba Josépamai naatiiwi kexeke. Dios Joséwe ipaudi. Naskake na akai sharakui ixupaudi.
المحددات الحالية:
Génesis 39: mtsB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
