Génesis 29
29
Jacob Padán-aram bai adu dukudi
1Jacob wari ubiskiri kadi yura ikawu adu. 2Nari kakĩ uĩya wai babakidua tres oveja xukuwu uĩdi. Pozo chaibakixu ovejawawe tedekadi idiwu. Ovejawawe ede ayabiswu ruwewãne wepua idi. 3Tres oveja ichawuadu oveja kexebiswu pozo wepukaxu ovejawu ayababiswu. Ovejawu ayabakata pozo wepupaudiwu.
4Jacobpa oveja kexebiswu atu ñukadi: “Ma waniame”, atu wadi. Naskata: “Nu Harán adua”, na oveja kexebiswawe wadiwu.
5Jacobpa awiana atu ñukadi: “Ma Labán tapiame Nahorpa awẽ wake”, atu wadi. Awiana oveja kexebiswu ñukadi: “Nu tapia”, wadiwu.
6Awianari Jacobpa atu ñukadi: “Isinikibame”, oveja kexebiswu wadi. Naskata: “Shara. Isinikiba. Dua awẽ wake Raquel ui ovejawuya”, wadiwu.
7Jacobpa atu yuidi: “Pedayua yabeyuaba ovejawu kede mera ma ikibapana. Aweskakĩ ma atu ede ayabata ma wasi pibaibame”, atu wadi.
8Nawuwawe kebadiwu: “Nu atu badayui ma ovejawu ichawudu pozo weputa ede atu nu ayabai”, wadiwu.
9Jacob atuwe tsaiyuwaidu Raquel udi apã awẽ ovejawuya. Naatu oveja kexebis ipaudi. 10Naskaidu Jacobpa Raquel uwaitu uĩdi Labánpa awẽ wake. Labánpa awa pui idi. Naskata Jacobpa pozo awẽ weputi ruwewa wepedi Labánpa awẽ ovejawu ede ayabaxikĩ. 11Jacobpa Raquel tsu ata siaikuidi. 12Jacobpa Raquel yuidi: “Ẽ Rebecapa awẽ wake Labánpa awẽ pia”. Naa dikai Raquel ichudi apa yui kai.
13Puĩ awẽ wake Jacob dikai Labánpa aki dukuta pishkuta tsu adi. Naskata awẽ pexe adu ewedi. Jacobpa awẽ kuka Labán awarawu yuidi. 14Labánpa Jacob duiyana yuidi: “Mi ewẽ pia weyakakuiya”, wadi.
Jacobpa atu widi Lía yawi Raquel
15Ma uxe wisti Jacob ikadu Labánpa yuidi: “Baitsi mia ea yuduxutiruba mi ewẽ pia. Awetii pei ẽ bia inatirume”, wadi.
16Labán xutukuwake raweya idi. Na iyuatu awẽ ade Lía chipuke Raquel. 17Iyuatu awẽ ade Lía awẽ weru uĩsharatiruba ipaudi. Chipuke Raquel sharakui idi. 18Jacobpa Raquel mai duikĩ Labán yuidi: “Mewẽ wake chipuke Raqueluxũ ẽ bia siete wari yuduxui”, wadi.
19Labánpa kebadi: “Ẽ bia wibanu dukuwede wetsa inataba. Ewẽ pexe adu iwe”, wadi.
20Naskaxu Jacobpa siete wari yududi Raqueluxũ. Siete wari uĩya awa idiba Raquel mai duikĩ.
21Peda wetsa Jacobpa Labán yuidi: “Siete wari ma ẽ yudua. Ewẽ awĩ ea inawe ẽ awi wiananu”, wadi.
22Naskata Labánpa yura chaiba ikawu atu ichawadi piti pii wenuwu. 23Ma yabeadu Labánpa Lía Jacob wibadi. Líawe uxadi. 24Naskata Lía uibatiya idi awẽ ade Zilpá da Labánpa inadi awara axunu.
25Ma pedadu Jacobpa Lía unadi awe uxashita. Labán ñukadi: “Aweskai mia iskawaame. Raquel wiixikĩ beweta ẽ yudubis. Aweskai mia paraitame”, Jacobpa wadi.
26Labánpa kebadi: “Duduxu iyua nu reke wedeya wababis. Chipuke nu wena wedeya wabatiruba”, wadi. 27“Na domingo wisti ayuwe naskaxu ewẽ wake wetsa ẽ bia inanu awiana siete wari mia yuduxuwaitu”, Labánpa wadi.
28Jacob naskadi. Domingo wisti ata Labánpa Raquel wibadi awĩ inu. 29Labánpa awẽ wake Raquel Bilhá inadi awẽ yudubis inu. 30Jacob Raquelwe wianadi duikuidi. Lía duiwikĩ askawapaudiba. Awiana siete wari Jacobpa Labán yuduxudi.
Líaweta Jacobpa awẽ wakewu
31Jacobpa Lía duisharayabaitu Diospa uĩdi Líapa wake anu. Naskayaidu Raquelpa wake dadetiruba idi. 32Líapa werunawake dadedi. Awẽ ade Rubén. Líapa yuidi: “Diospa ea uĩkĩ ẽ ichapaba shinachakaitu Jacobpa ea duisharayabaitu naskake ea ubisbakĩ ea wake ina. Naskake ea Jacobpa dui”.
33Naskata awiana Líapa wake wetsa adi awẽ ade Simeón. “Dios dikaxu ewẽ wene ea duisharayabaitu naskake Dios ea wake wetsa ina”, idi.
34Naskata awiana Líapa tres wake adi awẽ ade Leví: “Datiã ewẽ wene ea duikui ewetamai ma tres wake axu”, Lía idi.
35Líapa awiana wake wetsa adi awẽ ade Judá wadi naskata yuidi: “Aichu Dioski ẽ idibakui”, idi. Naskata Líapa ana wake adiba.
المحددات الحالية:
Génesis 29: mtsB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
