Génesis 19
19
Diospa Sodoma ikawu Gomorra ikawuri atu adaitidi
1Ma ñatapakeaidu ángel rawe Sodoma adu dukudiwu. Lot pexe ichapa kaĩti adu tsauwa idi. Ma atu wichita widinakawata baikiri wepepakekawãdi. 2Lotpa dukuwede rawe atu duiyana atu yuidi: “Ewẽ diaiwu raweta ewẽ pexe adu wukawe naduxu matu tae chukaxikakĩ. Wenamari wutaxikakĩ”, Lotpa atu wadi. Ángel raweta kebadiwu: “Shinachakayabawe. Wanira wetsa nu uxai”, wadiwu.
3Naskawiyaiwawe Lotpa ewẽ pexe adu uxai wukawe atu wariawaitu awẽ pexe adu awe wudiwu. Awe dukuawuadu pan pusputiruba atu Lotpa inadi. Pidiwu.
4Ángel rawe uxayuawubadu Sodoma ikawawe pexkuwuyaxu adiwuwawe Lot awẽ pexe dakiwadiwu. 5Naskake Lot kedakata yuidiwu: “Wanime da yabeta dukuwede rawe mewẽ pexe adu weawu. Atu tsekawe nu atuwe inu”, Lot tsai ewapatu wadiwu.
6Naskata Lot tsekeinakawata awẽ pexe weputi wepukuita. 7Atu yuidi: “Ewẽ yurawawe, chaka shinayabakawe. 8Ẽ wake raweya dukuwedewe ibisba rawe. Naa rawe ẽ batu tsekaxunu na ma apaiyai keskawaaxikakĩ. Da dukuwede rawe ewẽ pexe adu weawu aweskawayabakawe”, Lotpa atu wadi.
9Nawuwawe kebadiwu: “Mi tsuame. Uri katawe. Mi duduayabawixu mia duku yuduime. Nu atu ata bia nu bibawai”. Askawakata Lot awẽ pexe weputi chakanawapaidiwu. 10Ángel raweta Lot atũ puñama iwita weputi wepuakewuwãdiwu. 11Naskata naatiiwi ángel raweta pexkuwuya adiwuu atu wexuwadi weputi adu ikiyabanuwu. 12Naskata ángel raweta Lot ñukadiwu: “Dudu awetii mi kaiwuuyame. Mewẽ rayus ikaidu mewẽ wake rawe duduxu atu iyutawe. 13Diospa ma tapia yurawawe atũ chakawu ana tedetiruba. Naskake duku nichia nu atu adaitinu”, ángel raweta Lot wadiwu.
14Naskata Lotpa awẽ rais ipaixiwai rawe atu yui kai kadi: “Duduax nu kanu. Widiniwuwakawe. Epa Diospa dudua yurawu atu adaiti”, Lotpa yuiyaitu awẽ rais ipaixiwai raweta ikũira wadiwuba. 15Ma pedayaidu ángel raweta Lot yuidiwu: “Duduxu mewẽ wake raweya mewẽ awĩya atu iyutawe dakaspakĩ nu atu adaitiyaidu”, ángelpa wadi.
16Naskata Lot sabarakayaitu ángel raweta awẽ biwĩ tsubakata xawakawi tsekadiwu Diaiwu Diospamai ubisbaitu. 17Pexe ichapa Sodoma aduxu ma atu tsekakata ángel wistichi atu yuidi: “Kushi wutakawe dayabaxikakĩ. Kachiuri ma uĩki naskatari mispa adu ma neteki. Ma dipaimaiki bachi ari wutakawe”, ángelpa Lot wadi.
18Lotpa atu kebadi: “Baa ewẽ Diospa ẽ bia yui. 19Ẽ dayabanu ea ma ubisba. Naskake ẽ bachi ari kapaiba. Nari kapai ẽ datiru”, Lotpa atu wadi. 20Naskawaitu Lotpa ángel yuidi: “Na chaiba pexe ichapaba nadu ea nichiwe ẽ dayabanu”, wadi.
21Ángelpa kebadi: “Ma ẽ bia dikai. Na mia yuiyai ẽ bia axui. A pexe ichapaba ẽ adaitiba. 22Naskake kushikui wutakawe. Na pexe ichapaba ma dukuabadu ẽ aweskawatiruba”, ángelpa wadi. Naskake na pexe ichapaba awẽ ade Sóar idi.
23Ma pedadu Lot Sóar adu dukudi. 24Naskayaidu Diospa dai arixu ui chii xuisaipa Sodomaya Gomorra ikawu atu adaitidi chakawuke. 25Atũ awarawuya atu adaitikuidi na Sodoma ikawu bai mispadu ikawuri. 26Lotpa awẽ awĩni kachiuri uĩpai kushikui saltadi.
27Peda wetsa na Epa Dioswe tsaikitadu Abraham kadi. 28Sodomaya Gomorrari uĩpaikĩ uĩya na baitiixu kuĩwawe tipu ikaitu. Horno kuĩ keskara idi.
29Naskadi Epa Dios Sodomaya Gomorra atu adaitikuidi na Lot ipaudi adua. Lot wisti dayabaitake Epa Dios Abrahamweta shinaitaxakĩ.
Moabitawunu amonitawu tsekei taediwu
30Lot Sóar adu ipai besedi. Naskax awẽ wake daetawa rawewe machiwa kidi mera iki kai kadi. Nadu idiwu. 31Peda wetsa Lotpa awẽ wake daetawa iyuatu awẽ chiku yuidi: “Nuku epa adiwu. Da bai adu dukuwedeba nu awe wianapana na awĩwu itiruwu keskai. 32Nuku epa paebaxu nu abanu aweta nu wake anu naskax nu rewuduya inu”, daetawa rawe idiwu.
33Naa yabeta paebakata awẽ wake iyuatu apawe iwiyaitu tapidiba. 34Ma peda wetsa awẽ iyuatu awẽ chiku yuidi: “Da yabeta nuku epawe ẽ iwaa. Da yabetari nu paebanu mi nawe uxata abaxikĩ. Naskaxu nu aweta wake nu anu”, idi.
35Yabe wetsa ana paebakata awẽ wake chipuketu apawe uxata abawiyaitu tapidiba. 36Naskaxu Lot awẽ wake rawe atu wake dadebadi. 37Awẽ wake iyuatu awẽ wake wisti adi. Awẽ ade Moab. Moab wakakĩ apaweta wake adike. Naskake moabitawu wadiwu. Datiãri naskarari. 38Awẽ wake chipuketuri wake wisti adi. Awẽ ade Ben-amí. Awẽ xidi apana wakakĩ awẽ wake datukuiweta wake aka. Amonitawawe atũ xidi.#19.38 Aweskai chakadiwume Lotpa awẽ wake rawe Epa Diospa awẽ tsai dikadiwuba. Awẽ xidiwu keskara chaka ipaudiwu awẽ wake rawe Abrahampa awẽ uibatiwu awẽ xidiwu keskara idiwu.
المحددات الحالية:
Génesis 19: mtsB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
