Génesis 17
17
Diosweta Abrampa shinadiwu wushki wichi xatepakexanuwu
1Abrampa awẽ wari ma noventa y nueve ikadu Dios aki dukuta yuidi: “Ẽ Dios bitsisipa. Ea ikũira wapaxawe chakataba. 2Dukuraweta na nu shinakuiyai mewẽ kaiwuu uduax ichapanawã kaĩpakedakawu ichapakui inupukukadi”, Epa Diospa wadi.
3Naa dikai Abram baikiri wepepakekawãdi aũ duiyana. Naskayaitu Diospa yuidi: 4“Dukuraweta na nu shinakuiyai ẽ bia yuikui. Bai wetsa ari ikawu mi atũ apa ipadaka. 5Naskake ana mi Abram ikiba. Datiã mi Abraham#17.5 Abrahampa awẽ kaiwu na exteweru keskara ipadakawu. iki. Yura bai wetsa ikawu ichapawawe mi atũ apa ipadaka. 6Mewẽ kaiwuunuax ichapanawã kaĩpakedakawu ichapakui inuwu ẽ anupukui. Naskatari mi uduax diaiwuu kaĩkata bai wetsa ikawu ichapa kainupukukadi. 7Dukuraweta na nu shinakuiyai mewẽ kaiwuunuax ichapanawã kaĩpakedakawuwetari ẽ anupukui. Ẽ mewẽ Dios iixiwi mewẽ kaiwuu uduax ichapanawã kaĩpakedakawu ẽ atũ Diosri ipadaka. 8Da bai Canaán adu mi ika na mi yura wetsa keskara. Ẽ bia inata mewẽ kaiwuunuax ichapanawã kaĩpakedakawu ẽ inananupukui atuna ipaxanu”, Epa Diospa wadi.
9Diospa Abraham yuidi: “Dukuraweta na nu shinakuiyai naskawe. Mewẽ kaiwuunuax ichapanawã kaĩpakedakawu naskanuwu. 10Dukuraweta na nu shinakuiyai mewẽ kaiwuu uduax ichapanawã kaĩpakedakawu dukuwedewawe atũ wushki wichi xatepakexanuwu. 11Matu wushki wichi ma xatepakedaka. Dukuraweta na nu shinakuiyai naskapakedakawu. 12Datiã werunawakewu kaĩyawudu ma kaĩtadu ma ocho peda ikadu atũ wushki wichi xatepakedaka. Na atu peiuxũ wibis atũ wakewuri mi xatetiru. 13Naskax dukuraweta na nu shinakuiyai matu werunawakewu kaĩyadu naatiiwixu atũ wushki wichi ma xatepakedakawu. Da ewẽ shina naskapakedaka. 14Dukuraweta na nu shinakuiyai ikũira wataba awẽ wushki wichi xateaba batuwe itiruba”, Epa Diospa atu wadi.
15Naskatari Diospa awiana Abraham yuidi: “Datiã mewẽ awĩni awẽ ade Sarai ikiba. Awẽ ade Sara#17.15 Sarapa awẽ kaiwu ichapanawã kaĩpakedakawu. iki. 16Sarauxũ wake wisti ẽ bia inaxiwi. Naa ẽ awara shara inanupukui. Bai wetsa ari ikawu atũ diaiwunu kaiwuunuax ichapanawã kaĩpakedakawu atũ awa ipaxanu”, Epa Diospa Abraham wadi.
17Abraham baikiri wepepakekawã shinayana: “Adiwu cien wariya wakeyatiruba. Ewẽ awĩ Sarariwi ma noventa wari aka”, ikax witsadi. 18Naskake Dios yuidi: “Mewẽ awara sharawuya Ismaelna ipainu”, Abrahampa Dios wadi.
19Naskaitu Epa Diospa Abraham kebadi: “Mewẽ awĩ Saraweta mi wake wisti ma awaidaka. Ma kaĩyadu adekĩ Isaac”, ma waaxiwi. “Dukuraweta na nu shinakuiyai awẽ kaiwuunuax ichapanawã kaĩpakedakawu ẽ naskari wapadaka. 20Ismael uduax mia kiwĩyaitu ẽ bia dika. Naariwi ẽ awara shara inanupukui. Wake ichapaya ita awẽ kaiwuunuax ichapanawã kaĩpakedakawu. Naskatari doce diaiwu bitsisipa bai wetsa ari ikawu atũ apa Ismael inupukui. 21Wari wisti iixiwaitu Sara ma wakeya iwaidaka. Dukuraweta na nu shinakuiyai ẽ axunupukui Isaacweta”, Epa Diospa Abraham wadi.
22Abrahamwe tsaita naduax Dios kadi. 23Naa pedata Abraham awẽ wushki wichi xatedi. Naskata awẽ wake Ismaelnari adi awẽ uibatiwunari na peiuxũ wibiswuri nawawe atũ wichi wushki xatediwu. Na Epa Dios yuiya keskadiwu. 24Abraham noventa y nueve wariya idi. 25Awẽ wake trece wari ma ika idi wushki wichi xatediwu. 26Naskadu naa pedata na raweta wushki wichi xatediwu. 27Naatiiwi dukuwede na Abraham pexe aduxu kaĩdiwu yawi bai wetsawu awẽ kaiwuuyabaweke atu peiuxũ widi naawaweri naatiiwi Abrahamweta atũ wushki wichi xatediwu.
المحددات الحالية:
Génesis 17: mtsB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
