SAN MATEO 4
4
Tej toc niyꞌbet Jesús
(Mr. 1:12-13; Lc. 4:1-13)
1Yajcꞌatltzen bix e xiꞌ kꞌiꞌn Jesús tuꞌn Espíritu Santo tuj jun lugar mintiiꞌ cynajbil xjal tuj, tuꞌntzen toc tkꞌoꞌn taaw il tipen tiꞌjxin tuꞌn tyeecꞌante Jesús tnimbil texin. 2E cub tpaꞌn weyaj cyaꞌwnak kꞌij tuyax cyaꞌwnak koniyan, bix tej tjapan baj cyaꞌwnak kꞌij, otkxsen bajxin tuꞌn weyaj. 3Bix e pon taaw il tuya Jesús tuꞌn tbint tajbil taaw il tuꞌn Jesús. E xiꞌ tkbaꞌn texin:
—Ka Tcwal Diosa, binchancꞌa tzunj xaka te tway te yecꞌbil―tz̈i taaw il.
4Pero e xiꞌ tkbaꞌnxin te taaw il:
—Tzin tkbaꞌn tuj tyol Dios cyjulu: “Yaaꞌn nuk oꞌcx tuꞌn twa jun xjal iꞌtzen. Ja te mas il tiꞌj, tuꞌn tnimante cykilca yol tzin tkbaꞌn Dios,”―tz̈i Jesús.
5Bix e xiꞌ tiiꞌn taaw il ja Jesús tuj Jerusalén, ja tnom nintzaj, bix e jaw tiiꞌn taaw il jaxin maa twiꞌ tja Dios. 6Bix e xiꞌ tkbaꞌn taaw il texin:
—Ka jay Tcwal Dios, xooꞌnx tiiba twitz txꞌotxꞌ. Mlay cyima, cuma tzin tkbaꞌn tyol Dios cyjulu: “Chi tzaal tkꞌoꞌn Dios tsanjel tuj cyaꞌj te clol tey. Ejeeꞌ chi tzyulte tey tuj cykꞌab, tuꞌntzen miꞌn tzakꞌ tkena cywiꞌ xak,” tz̈i tyol Dios―tz̈i taaw il.
7Pero aj ttzakꞌbeꞌn Jesús te:
—Pero jax tzin tkbaꞌn tyol Dios cyjulu: “Miꞌn tzꞌoc cycyakwusaꞌna Cyaawey Dios tuꞌnj toc cykꞌoꞌna tuj malbil te, ka jax tuꞌn,”―tz̈ixin.
8Bix e xiꞌ kꞌiꞌn Jesús juntl maj tuꞌn taaw il. E pon kꞌiꞌnxin twiꞌ jun witz te nimxsen tweꞌ, bix e xiꞌ tyeecꞌan taaw il texin cykilca tnom twitz txꞌotxꞌ tuyax cykꞌinemal tnom nimxix. 9Bix e xiꞌ tkbaꞌn taaw il texin:
—Cykilca ke tnom lu cxeꞌl nkꞌoꞌna tey ka ma cub majey nwitza te yecꞌbil ka inayena taawa tuj twitza―tz̈i taaw il texin.
10Bix e xiꞌ tkbaꞌnxin te taaw il:
—¡Min! Cutxey, Satanás, cuma tzin tkbaꞌn tyol Dios cyjulu: “Nuk oꞌcx ja Dios cjawel cynimsaꞌna, bix nuk oꞌcx te texin baꞌn cyajbeꞌney,”―tz̈i Jesús.
11Bixsen e cyaj tkꞌoꞌn taaw il jaxin, bix ul ke tsanjel Dios tuj cyaꞌj onlte texin.
Tej ttzyet taakꞌen Jesús
(Mr. 1:14-20; Lc. 4:14-15; 5:1-11; 6:17-19)
12Tejtzen tbinte Jesús otk tzꞌocx Juan tuj tzeeꞌ, e xiꞌxin tuj departamento te Galilea, 13tuꞌntzen tponxin tuj ttanemxin Nazaret. Pero etzxin tuj Nazaret, bix e ponxin tuꞌn tnajanxin tuj tnom te Capernaum. Tcub Capernaum ttziiꞌ jun tnijabel aꞌ, jaaꞌ najle kej tchmanxin Zabulón bix kej tchmanxin Neftalí. 14Tej takꞌananxin tuj taakꞌen Dios jatzewe, el jax j-e tkba jxin tyolel Dios Isaías. E cub ttzꞌiꞌben Isaías cyjulu: 15“Kej xjal tuj txꞌotxꞌ te Zabulón bix kej xjal te Neftalí, cyuyax xjal ttziiꞌ tnijabel aꞌ bix jlajxe nimaꞌ Jordán, bix kej xjal yaaꞌn judío tuj Galilea, 16ejeeꞌj tzunj xjal lu chi temel tuj klolj. Nuk chi ayol cycyamecy, pero cxeꞌl cycyeꞌyen jun spiꞌyen nintzaj. Kej xjal lu najlke tuj jun txꞌotxꞌ jaaꞌ taꞌ nuk klolj bix cyamecy, pero cwel koptzꞌaj jun spiꞌyen cyibaj,” tz̈i Isaías jatxe ootxa.
17Tponlenxitltzen Jesús Capernaum, akꞌxin kꞌumlte tyol Dios. E tkbaxin cyjulu: “Chi meltzꞌaja tuya Dios, cuma ma pon tumel tuꞌn tul tcawbil Dios tuj cyaꞌj,” tz̈ixin.
18At jun kꞌij e bet Jesús ttziiꞌ jnintzaj tnijabel aꞌ te Galilea, bix e tilxin caꞌba xjal cyitzꞌen cyiib. At jxin Simón, bix juntl tbixin Pedro, bix at jxin Andrés. Bix e cuꞌx cyxooꞌnxin jun xiyꞌpa tuj aꞌ, cuma tzyul quis̈kexin. 19Bix e xiꞌ tkbaꞌnxin cyexin:
—Chi lpetza wiꞌja. Jaꞌlewe lu key nchi chmona quis̈. Pero chi oquel nkꞌoꞌna te chmol xjal tuꞌn cyxiꞌ lpe wiꞌja―tz̈i Jesús cyexin.
20Bix ncyaj cykꞌoꞌn najtlxin cyxiyꞌpaxin, bix oc lpekexin tiꞌjxin.
21Tejtzen t-xiꞌ tbet-xin juntl tkiyꞌ, e tilxin caꞌbatl xjal cyitzꞌen cyiib, jaj jxin Jacobo, bix jxin Juan. Tcwal jxin Zebedeo ejeeꞌxin. Eteꞌcꞌaxxin tuj jun barc tuya Zebedeo, cymanxin, nchi remyenaxin cyxiyꞌpaxin. Bix e tzaj ttxcoꞌnxin ejeeꞌxin. 22Bix e cyaj cykꞌoꞌnxin najtlxin cybarcxin tuyax cymanxin, bix oc lpekexin tiꞌj Jesús.
23Bix e bet Jesús tuj cykilca ke tnom tuj Galilea. Tuj jaca juun camon jaaꞌ te xnakꞌtzbil tyol Dios, e xiꞌ t-xnakꞌtzaꞌnxin cye xjal, bix e xiꞌ tkꞌumenxin jtbanel yol tiꞌj tcawbil Dios. Bix oc tkꞌanexin kej xjal yaab. El tiiꞌnxin nuk alcyexja cyyabel xjal. 24Bix el tpocbal Jesús tuj cykilca ke tnom tuj Siria. Juꞌ tzunj, ul kꞌiꞌn twitzxin nimxsen xjal yaab cyuꞌn aj Siria. Ul kej xjal nim qꞌuixcꞌaj eteꞌ tuꞌn yabbil, bix kej nchyon cyiꞌj, bix kej xjal otk chi oc biman cyiꞌj, bix kej e tzaj tuj cywiꞌ, bix kej mintiiꞌ tanem cyxumlal. Bix e kꞌanjke tuꞌnxin. 25Nimxsen xjal oc lpe tiꞌjxin. E tzajke tuj Galilea, bix cyuj ke tnom te Decápolis, bix tuj Jerusalén, bix cyuj tnom te Judea, bix at e tzaj jlajxe nimaꞌ Jordán.
المحددات الحالية:
SAN MATEO 4: mamTS
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2000, Wycliffe Bible Translators, Inc. All rights reserved.
