Pinongurugan 4
4
Si Kain om si Abil
1Mondoto yo sono si Adam dii si Awa, sawo niyo ri, om minomontian-o sono woinoi oono, om nokopuanak nu ido kusoi. Mutongaro yo iyo nu, “Pagka tinabang aku nu TUHAN, tinaakan aku nu anak kusoi,” koo. Ingorani yo niyo anak oono so si Kain.#4:1: Orati yo po nu Kain nga, tinaakan. 2Olaid-laid om nokopuanak-o si Awa nu ido po kusoi, om ingorani yo niyo so si Abil. Nosukod-o po nosiro, si Abil-o po sono moongipat nu dumba, nga si Kain moomutanom.
3Ido runat, mongolapo yo si Kain sombaagi' nu pinumpung niyo ri niusaa' so TUHAN. 4Si Abil nga mongolapo ya nu anak togna uyog po so baanan nu dumba niyo ri om goraso yo niyo, om pousaa'o yo niyo iri onsi owarong sobana ri so TUHAN. Owoworongan TUHAN so si Abil om niusaa' niyo ri,#Ibr 11:4 5nga tinulak Niyo ong si Kain om niusaa' niyo ri. Indadi minungot sono si Kain, om modtu-rodtu.
6Mutongaro yo TUHAN so iyo nu, “Nokuro su mungot om modtu-rodtu ko? 7Bang owarong-a winaal mu no, tantu sumudu'an ko ya. Nga pagka oraai winaal mu no, mongibon sono koraayan-o so ikau soko kulos-kulos mongibon nu kuwai tompaan. Mokipopogkuasa koraayan-o so ikau, indadi doogo yo ono,” koo.
8Nga tongaro yo sono ni Kain si Abil nu, “Mian kito po adi' so umo,” koo. Nokologa' yo po nosiro so umo, potoyo yo sono niyo si Abil.#Mat 23:35; Luk 11:51; 1 Yns 3:12
9Indadi, mongoduato yo TUHAN so si Kain nu, “Siombo yo si adi' mu?” koo.
Sumombuto yo si Kain nu, “Dai ku ya oilaan. Subai ipat-ipatan ku gaam si adi',” koo.
10Mutongaro yo TUHAN so iyo nu, “Oilaan Ku nu pinatoi mu si adi' mu. Raa' niyo so tana' no soko momaau so Aku, mokisuli'on.#Ibr 12:24 11Pagka pinatoi mu si adi' mu om nokorasap raa' niyo so tana', ukumon Ku ikau nu soko itu nu, 12mutanom ko pona nga ado ya onu-onu pinumpung mu. Mogilolongkop ko sono om d'ado kototogan mu molak so wonuo tu,” koo.
13Sumombuto yo si Kain nu, “Oo TUHAN osokakan ukuman oono. Dai ku ogoosan. 14Susubon Mu aku kiat so tana' iitu, orawu' so Ikau. Mogilolongkop aku om d'ado kototogan ku molak so wonuo tu, om potoyon aku sono nu isai ya kosambat so aku no,” koo.
15Indadi mutongaro yo TUHAN nu, “Dai ya nu soko ono. Bang potoyon ko, turu sono koyuwan potoyon maid nu ono momatoi so ikau-o nu soko ponunsuli',” koo. Indadi, tondai yo sono nu TUHAN si Kain, tayon ong dai potoyon nu isai ya kosambat so iyo.
16Mulaiwo yo sono si Kain kiat so TUHAN om molako yo so tana' ingoranan Nud, ono yo “Poogilolongkopan”, umpak so pusitan nu Idin.
Solusuk ni Kain
17Mondoto yo si Kain so sawo niyo ri om minomontian-o sono sawo niyo oono om nokopuanak nu kusoi, ingoranan so si Inuk. Momaalo yo si Kain nu bandar om pinosangai niyo bandar oono nu ngaran nu anak niyo no. 18Kianak-o sono si Inuk nu kusoi, ingoranan so si Irad. Om si Irad-o po amo ni Mikuyail. Kianak-o sono si Mikuyail, ingoranan so si Mitusail, om si Mitusail-o po amo ni Lamik. 19Si Lamik-o po duo sawo, si Ada om si Jila. 20Muonako yo si Ada so si Yabal, om solusuk-o po ni Yabal nga iri yo bansa moongipat nu pongayam om moomolak-polak so bosalag.#4:20: Koopotan orati yo po nu tangar “bosalag” so buuk iitu, nga polakan dai otatap, kimbos winaal. 21Adi' yo po ni Yabal si Yubal, om solusuk niyo poopukai nu kosapi om suling. 22Muonako yo si Jila so si Tubal-Kain, om solusuk niyo ri moomaal nu boroginis nu gonggamon tombaga om bosi winaal. Si Tubal-Kain kisulod toudi nu woinoi, ingoranan so si Naama. 23Mutongaro yo sono si Lamik so duo sawo niyo ri nu,
“Oo Ada om Jila,
rongowo muyu yo.
Minomatoi aku nu ido omulok
so' linubak aku niyo.
24Bang turu koyuwan potoyon
nu ponunsuli'
ong potoyon si Kain,
turu sono nopulu om turu lobuw
potoyon nu ponunsuli'
ong potoyon aku,”
koo.
Si Sit om si Inus
25Kianak po si Adam om si Awa nu ido kusoi. Mutongaro yo sono si Awa nu, “Tinumbaid-o nu Kinoringan inindamo ku so Iyo ri nu mokitaak nu anak kusoi pongoganti' so si Abil, iri pinatoi ni Kain,” koo. Indadi, ingorani yo ni Awa anak oono so si Sit.#4:25: Orati yo po nu Sit nga, tinumbaid nu Kinoringan. 26Nosukod-o si Sit om kianak sono iyo nu kusoi, iningoranan so si Inus. Iya yo iiri su tinimpuunan nu lobuw mongorait nu ngaran nu TUHAN koduung mogdu'a nosiro so Kinoringan.
المحددات الحالية:
Pinongurugan 4: TomPWPgLgPn
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2023 (Active), Wycliffe Bible Translators, Inc. All rights reserved.
