isizwur 11
11
lbrj yattuyn n‑babil
1kkan‑ttin mddn lli‑llanin ġ‑ddunit ar‑sawaln s‑iwaliwn lli‑ssnn kullutn, ar‑kullu‑tfhamn i‑ngratsn. 2ffuġn munn s‑tsga n‑usġlay n‑tafukt aylliġ lkmn azaġar n‑wakal n‑šinɛar, zdġn gis. 3inin i‑ngratsn: «rwaḥat a‑nskr uṭṭibn, nssnu‑tn ġ‑ufrran.» nkrn ġakudan bnun s‑uṭṭibn‑lli, zdin‑tn s‑zzft, 4inin: «zaydat a‑nskr i‑ih̬f‑nġ yat‑tmdint, nbnu yan lbrj yattuyn ar ignna, nssimġur ism‑nġ a‑ur‑sar‑nakut ġ‑tsgiw n‑ddunit aggugnin.»
5issmaqql‑d sidi rbbi tamdint ula lbrj lli‑bnan tarwa n‑bnadm. 6yini sidi rbbi ġakudan: «han yan‑uqbil ad‑gan, ar‑sawaln s‑iwaliwn lli‑ssnn kullutn. bḥra bdan skrn yad mayad, ġilad aynna‑ġ‑swangmn ur‑ra‑fllasn‑išqu a‑t‑skrn. 7hiya a‑n‑srsn‑ngguz nssmuttl‑asn iwaliwn‑nsn, a‑ur‑sul‑tfhamn i‑ngratsn.» 8issukt‑tn sidi rbbi ġakudan s‑kullu tisgiw n‑ddunit. ur‑ẓḍarn ad‑kmmln tabnnayt n‑tmdint‑an. 9mayan a‑f‑as‑gan ism ‹babil›, ašku ġin a‑ġ‑issmuttl sidi rbbi iwaliwn n‑kullu mddn, issukt‑tn s‑kullu tisgiw n‑ddunit.
tasutin n‑taraḥ d‑tarwa‑ns
27ġmkad a‑iga‑warra n‑tasutin n‑taraḥ. taraḥ yuru abram d‑naḥur d‑haran. haran yuru luṭ. 28immt ilmma haran ur‑ta‑immut babas taraḥ. ġ‑wakal n‑tlalit‑ns a‑ġ‑immut haran ġ‑tmdint n‑ur ġ‑tmazirt n‑ayt‑kaldan. 29imma abram d‑naḥur, tahln ntni. tamġart n‑abram tga saray. tamġart n‑naḥur tga malka illis n‑haran lli‑igan babas n‑malka d‑yiska. 30walaynni saray ur‑tẓḍar a‑trbbu, ur‑jji‑dars kra n‑warraw.
31inkr taraḥ yawi yus abram d‑luṭ lli‑igan yus n‑yus haran, ntni d‑saray lli‑igan tamġart n‑yus abram, ffuġn tamdint n‑ur n‑ayt‑kaldan, irin tamazirt n‑kanɛan. walaynni lliġ lkmn tamdint n‑ḥaran, qaman zdġn gis. 32irgl taraḥ sin id‑miyya d‑smmus (205) n‑usggʷas, immt ilmma ġ‑tmdint n‑ḥaran.
المحددات الحالية:
isizwur 11: SHILOT20
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Selected Old Testament in Tashelhayt (Latin script) © United Bible Societies, 2020.
Robert Bernard Dann.
