San Lucas 4
4
Taxiwe rzina'ata Jesús
(Mt 4.1-11; Mc 1.12-13)
1Jesús, napagaze Be'egrasia ki Diozo, beyiaje lo yago rhelawe Jordán, na Be'egrasia beche'a le' lo yo' bichhi. 2Na' gzoe' chopagalaj dza, te taxiwe go'onheta sina'ata le'. Bigsla bigdawe yogote'a dza na, zigdonle. 3Taxiwe na rhe'ata le':
—Chen balhegslo nakalho Xhi'in Diozo, gochhi guiaj ni yeyaka yetaxhtilha.
4Jesús bochhie':
—Lo guichi ga' chhia xhtidza Diozo rne'a: "Laga le'an yetaxhtilhazi sban bene". 5Na taxiwe na gchisata le', na rlueta le' yogote'a ka yechhi yela ki lichhileyo', 6gochhita le':
—Ne'adi gona kio' diarha yelarne'abe'a le'an yelaxhen kika yechhi xhen ni. Le'a ne'adia chigxhia kia', na waka gdea kon nokie rhe'anda. 7Chen wagze'acho xhibilho le'an snelho ne'adia, diarha gaka kio'.
8Jesús bochhie':
—Lo guichi ga' chhia xhtidza Diozo rne'a "Be'an xhen Diozo kio', na bze'anaga kie'aze.
9Dena'a taxiwe na beche'ata le' lo yechhi rhelawe Jerusalén, kche'ata le' ga' mazirhe sibi ki yo'o sdo'o na gochhita le':
—Chen balhegslo nakalho Xhi'in Diozo, bsladzo kuinlo de nite'a; 10le'a lo guichi ga' chhia xhtidza Diozo rne'a:
"Diozo sele ka angle kie'
te guioke kan gonke sigorha loe'.
11Te yechisake loe' le'an na'ake,
kinda bitzo'o nia'alho guiaj."
12Jesús bochhie':
—Le'aksikan lo guichi ga' chhia xhtidza Diozo rne'a: "Bisilhobe'a Diozo kio'."
13Kati taxiwe na bibedzelheta nakala sina'ata Jesús, te bekoasata ga' ze'a Jesús to tiembo.
Jesús gzolawe kixaje'e xhtidza Diozo lo yechhi Galilea
(Mt 4.12-17; Mc 1.14-15)
14Jesús beyiaje Galilea napagaze balorhe ki Be'egrasia ki Diozo, te rtzalajke kie' gadiazi yechhi rhoalawe. 15Rse'adiene lo yo'o ga' rhedobike ki toto' yechhi, te yogoke rhonke xhen le'.
Jesús zue' Nazaret
(Mt 13.53-58; Mc 6.1-6)
16Jesús guiaje Nazaret, yechhi ga' gonie. Dza sabdo guioe' lo yo'o ga' rhedobike, ka' nolanhe, te gzo'enene kinda glabe xhtidza Diozo. 17Bdeke glabe guichi bzoaj bene btzalaje laza Diozo grelawe Isaías, te kati gsalhaje guichi bedzelhene ga' zoa:
18«Be'egrasia ki Diozo zua' le'an ne'adia,
le'a noxenlachhie ne'adia
kinda goa rson wen kika bene ye'achi;
chigsele ne'adia zajtixajea ki tan yerhoajka bene dze'eke lichhiguia
kinda yonha loka bene birle'ekene;
kinda yosla'a ka bene rhedzagaloke;
19snia nobi yiza naka chhia'a ki Diozo.»
20Dena'a Jesús bose'ayaje guichi rlabe, te bode'e ki bene rhonhe yodarhe lo yo'o ga' rhedobike te bebie'. Na yogote'a bene dzake na', kon ryoke le'. 21Le' gzolhoe rtzalaje, rne':
—Dza nan choka kumplirhe ka' rne'a lo guichi ga' chhia xhtidza Diozo tan lén labenkele.
22Yogokate' rtzalajke chhia'a ki Jesús te rhajxenkeguezene didza sdan rtzalaje. Te rnabe leza'ake:
—¿Alaga' bene ni xhi'in José?
23Jesús bochhie':
—Chinezegseda lén ye'alhe ne'adia didza ni: "We'an romedio be'an romedio lagazi kuinlo. "Te le'aksikan ye'alhe ne'adia: "Tan benheto tan be'anlo lo yechhi Cafarnaúm, be'an le'aksikan lo yechhi kio'."
24Zeajte'aze rne':
—Talite'a nito' bene rtzalaje laza Diozo bino si' chhia'a le' lo yechhi kie'. 25Talite'a, bkoakagazi nigolha weze'abi lo yechhi Israel lo tiembo ki bene btzalaje laza Diozo grelawe Elías, kati bigolha yajsio' non tzona yiza yogatzaj te gotagazi gbin sdote'a yechhi yela; 26te Elías bigselake le' ki nito' nigolha weze'abi ki yechhi Israel, ki toga nigolha weze'abi ki yechhi Sarepta, ga'agozi yechhi rhelawe Sidón. 27Le'aksikan bkoaka lo yechhi Israel tixeka bene rhaka xhwe'ake gchhiake yedzo' lo tiembo ki bene btzalaje laza Diozo grelawe Eliseo, nitoe' bibeyake, toga Naamán, bene Siria.
28Kati benkene ten, yogote'a bene dzake lo yo'o ga' rhedobike bdza'akagaze. 29Beyasake te bebeajke Jesús lo yechhi, beche'ake le' lo guia' sibi, ga' xhoa yechhi na, kinda chonke le' chhi'ilha denate'a. 30Te Jesús bede'e galawe ga' dzake te zeyiaje.
To bene nape to be'e malha
(Mc 1.21-28)
31Jesús guiaje Cafarnaúm, to yechhi ki Galilea, te yogo dza sabdo rse'adiene ka bene. 32Te ka bene rhajxenkene ka' rse'adiene, le'a tan rtzalaje konka zeaj.
33Lo yo'o ga' rhedobike ze'a to bene nape to be'e malha, te kan grechhiye'e tazidzaj:
34—¡Lajyozito! ¿Nobixhkia' rgotzaga kio' le'an ne'ato, Jesús bene yechhi Nazaret? ¿Ablalho dechhiagui'ilho ne'ato? Ne'adia nonbea loe', nezegseda nakalho Sando ki Diozo.
35Jesús gdile taxiwe, na gochhieta:
—¡Balanzi te bsan bene ni!
Te taxiwe na gro'onta bene na lo yo' loka bene zen, te berhoajta bigslabi be'anheta le'. 36Yogoke bdzebike, te rhe'ake leza'ake:
—¿Nobi rhe'anke sne'a didza ni? Sdote'a yelarne'abe'a le'an balorhe ki bene ni gochhie ka be'e malha leyerhoaj, ¡te berhoajka!
37Te rtzalajke ki Jesús yogote'a yechhi rhoalawe.
Jesús beyonhe do'on toxhi'in Simón
(Mt 8.14-15; Mc 1.29-31)
38Jesús berhoaje lo yo'o ga' rhedobike te guioe' lo yo'o ki Simón. Do'on toxhi'in Simón rhaka xhwe'e, dze'egaze tala', te gotayoke Jesús nia ki nigolha na. 39Jesús bze'achoe kuinhe ga' dia nigolha na te bolague tala' na, te tala' na bede'ala. Tina'azi, nigolha na beyase te gzolhoe rhonhe balha le'ake.
Jesús beyonhe tixeka bene rhaka xhwe'ake
(Mt 8.16-17; Mc 1.32-34)
40Nan rheye'an gbidza, yogoka bene dza'a kie'ake bene dze'eke bikala yelawe'a gche'ake le'ake ga' ze'a Jesús; te le' gdanhe totoke, te beyonhe le'ake. 41Ki tixeka bene rhaka xhwe'ake le'aksikan berhoajka be'e malha, rbechhiya'aka:
—¡Loe' nakalho Xhi'in Diozo!
Na Jesús bolague be'e malha bigsla bde'e lataj sne'aka, le'a nezeketa le' nake Xhi'in Diozo.
Jesús rguixaje'e rson wen lo yo'o ga' rhedobike
(Mc 1.35-39)
42Ka guie'ani, Jesús broaje yechhi, guiaje lo lataj ga' binodza'a. Na bene beguilhajke le', te bchhinke ga' zee. Go'onkene gzagake le', kinda biyiaje, 43te Jesús gochhie le'ake:
—Le'aksikan rhe'anhe zajtixajea rson wen ki yelarne'abe'a ki Diozo ki yebalaka yechhi, le'a tanka gsela Diozo ne'adia.
44Kan zeaj Jesús rguixaje'e rson wen lo yo'o ga' rhedobike ki yechhi xhen kika judios.
المحددات الحالية:
San Lucas 4: ZAALuk
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Evangelio de Lucas en Mixe de Yalalag, Oaxaca, México © Sociedad Bíblica de México, A.C.
