LIRAANGA 17
17
Shishevo Nashio Shimanyilu shi Lilakano
1Lwa Abramu yali nali ni mihika makhomi tisa na tisa, Mwami Nyasaye yalolekha khuye; navoola, “Ninzi Nyasaye Uli Ikulu khu Viosi. Unonde shia khase khosi, khandi utsililile khukhola likhola liu vulunji. 2Niitsa khukhola lilakano hakari hanje nivi, khandi khukhole khwivula vitsukhulu vanyishi.” 3Abramu yakwa hasi mahunama, Nyasaye namuvoolela, 4“Kholanga nivi lilakano yili: Khulakanga ndi uliitsa khuva kuuka wa vandu vi tsimbia tsinyishi mu shivala. 5Khuraanjila nunundi shiutsitsanga khulangwa khandi lira Abramu tawe; navutswa lira liolio liliitsa khuva Aburahamu; shichila uliitsa khuva kuuka wa vandu vi tsimbia tsinyishi mu shivala. 6Nzitsanga khukhukhola khwivula vitsukhulu vanyishi khuvira shichelo; khandi valala khu vitsukhulu vovo, valiitsa khuva vami. Uliitsa khuva na vitsukhulu vanyishi muno, khutukha lwa valiitsa khuva vandu vi tsimbia tsinyishi.
7“Niitsa khukhola nivi lilakano lianje, nende vitsukhulu vovo nende vaana vavo litsililile khuva lilakano li mihika ni mihika. Niitsa khuva Nyasaye wowo khandi Nyasaye wa vitsukhulu vovo. 8Niitsa khukhuha yivi nende vitsukhulu vovo shivala shiumenyamu khuli mundu mucheni yishi. Shivala shia Kanaani shiosi, shiliitsa khuva shia vitsukhulu vovo mihika ni mihika, ninzi niitsa khuva Nyasaye wavo.”
9Nyasaye yavoolela Aburahamu, “Khutukha khali yivi uhuchilile khutsililila khulonda lilakano lianje, nende vitsukhulu vovo mumatukhu koosi kaliitsa khuvaho. 10Yili nalio lilakano lianje nivi nende vitsukhulu vovo valiitsa khuvaho, lilakano lia muliitsa khutsililila khulonda: shia mwana wi shiyayi wosi wumenyanga mu munyi, aliitsa khushevwa. 11Muliitsa khushevwa lwa mukhalaakwa shikhanda shili ikulu, khandi nashio shia nishive shimanyilu shi lilakano lianje nivi. 12Mwana vi shiyayi wosi uli ni mihika munane mu munyi khutukha ashevwi. Shia mwana wi shiyayi wosi mumatukhu koosi ka mushili mwoyo, ave wayivulwa munzu mwomwo, inoho yakuulwa ni tsisenti tsiotsio khu mundu mucheni ukharulanga mu vandu vu lwivulu lwolwo; 13khutukha voosi valiitsa khushevwa, ave yivulwa munzu mwomwo nende woyo wakuulwa ni tsisenti. Khushevwa khwi mmbili, nashio shiliitsa khuva shimanyilu shi lilakano lianje li mihika ni mihika. 14Mwana vi shiyayi wosi ushili khushevwa, shiatsitsanga khuva mulala khu vandu vaanje tawe, shichila wameneka lilakano lia yakhola ninzi.”
15Nyasaye yavoolela Aburahamu, “Shiulatsililila khulaanga mukhali wowo lira Sarai tawe; navutswa khuraanjila nunundi lira lielie ni Sara. 16Niitsa khumukasitsa, khandi aliitsa khwivula khu yivi mwana wi shiyayi. Niitsa khumukasitsa, khandi aliitsa khuva mama wa vandu vi tsimbia tsinyishi, khandi vami valiitsa khurula mu vitsukhulu veve.”
17Aburahamu yakwa hasi mahunama, naraanga khusekha lwa yakanakana, navoola, “Mundu musatsa anyala khwivula mwana, nali ni mihika imia indala? Sara anyala khwivula mwana, nali ni mihika makhomi tisa?” 18Aburahamu yareeva Nyasaye, “Lekha Ishimaeli alinyola miandu chianje, nimali khukhutsa?”
19Navutswa Nyasaye yamuvoolela, “Shikaliitsa khuva kario tawe. Mukhali wowo Sara aliitsa khwivula mwana wi shiyayi khu yivi, khandi uliitsa khumukulikha lira Isaka. Niitsa khutsililila khurweshitsa lilakano lianje naye nende vitsukhulu veve mihika ni mihika. Liliitsa khuva lilakano li mihika ni mihika. 20Mali khuhulila makhuva koko, khulondokhana khu Ishimaeli. Niitsa khumukasitsa khali ye khandi nilimukhola khwivula vaana vanyishi nende vitsukhulu vanyishi. Aliitsa khuva kuuka wa vaana va vami likhomi na vavili. Luhia lwi tsingulu tsinyishi, luliitsa khurula mu vitsukhulu veve. 21Navutswa niitsa khutsililila khurweshitsa lilakano lianje na Isaka, mwana wa Sara aliitsa khukhwivulila muhika kwa mukamba, mumatukhu khuli kanu.” 22Lwa Nyasaye yali namali khulomoloma na Aburahamu, yarulaho natsia.
23Khulitukhu lienelo, Aburahamu yalonda makhuva ka Nyasaye, nasheva mwana wewe wi shiyayi Ishimaeli nende vaana vandi voosi vu munzu mwemwe, khali varukwa vivulwa munzu mwemwe nende yavo va yakuula ni tsisenti. 24Aburahamu yali nali ni mihika makhomi tisa na tisa lwa yashevwa; 25mwana wewe Ishimaeli yali nali ni mihika likhomi na chivaka. 26Aburahamu nende mwana wewe wi shiyayi Ishimaeli vashevwa khulitukhu lilala lienelo, 27nende vandu vu munzu mwemwe, varukwa vivulwa munzu mwemwe khandi yavo vakuulwa ni tsisenti khurula mu vandu vi tsimbia tsindi.
المحددات الحالية:
LIRAANGA 17: LLLCATHOLIC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© The Bible Society of Kenya, 2013
