Génesis 4
4
Abelta Caín wanutsinqan
1Tsaypitanam Adánwan tärarnin Eva qeshyaq rikakurqan. Wamran yuriskiptinmi nirqan: <<Tayta Dios munaptinmi ollqu wamrä yurishqa>>.
Tsaymi wamranpa jutinta churarqan Caínta#4.1 Caín ninanqa tarishqa ninanmi..
2Tsaypitanam yapay ollqu wamrata qeshyakur jutinta churarqan Abelta. Abelqa üshatawan cabratam wätarqan. Caínnam chakrachö aruq karqan.
3Tsaypita atska wata päsaskiptinnam Caínqa mikuyta cosechanqanpita Tayta Diospä ofrendata aparqan. 4Tsaynöllam Abelpis Tayta Diospä aparqan üshankunapa y cabrankunapa punta yuriq wawankunata. Apanqanta pishtaskirmi wirankunata Diospä rupatsirqan. Tsaytam Tayta Dios kushishqa chaskirqan.#Heb. 11.4. 5Peru Caín apanqan ofrendatam sïqa chaskirqantsu. Tsaynö mana chaskiptinmi Caínqa pasaypa ajanar qallayarqan.
6Tsaymi Caínta Tayta Dios nirqan: <<¿Imanirtä ajanar qallayarquyki? 7Allita rurarqa manam qallayashqa kankimantsu. Peru mana allita ruraptikim sïqa jutsa ruray shuyaraykäshunki poderninchö katsishunaykipä. Tsaynö kaptinpis shumaq tantiyakurqa manam jutsa rurayman ishkinkitsu>>.
8Tsaypita juk junaqnam Caínqa wawqin Abelta nirqan: <<Jirkapa aku rikachakuq>>.
Jirkaman chaykurnam Abelta illaqpita wanuskatsirqan.#Mat. 23.35; Luc. 11.51; 1Juan 3.12.
9Tsaypitanam Caínta Tayta Dios tapurqan: <<¿Maytä wawqiki Abel?>>
Tsaynö tapuptinmi nirqan: <<Manam musyätsu. ¿Acäsu wawqï rikaqninku kä?>>
10Tsaynö niptinnam Tayta Dios nirqan: <<¿Imatatä rurarquyki? Wawqikipa yawarninta jichanqaykim patsapita qayaykäman.#Heb. 12.24. 11Tsaymi kay patsachö maldicionädu kar qarqushqa kanki. Wawqikipa yawarninta jichanqaykipitam 12murunqaykipis wayunqatsu. Tsaynöllam jamayta mana tarir maytsaypapis purinki>>.
13Tsaynö niptinnam Caín nirqan: <<Taytay, kay castïgutaqa manam awantashätsu. 14Kaypita qarqamarqa puntaykipitam karuman qarqaykämanki. Tsaynö karqa maytsaypapis mana jamaypachi purikushä. Tsaynö puriykaqtachi pï runapis wanutsimanqa>>.
15Tsaymi Tayta Dios nirqan: <<Pipis wanutsishuqnikiqa qanchis kuti pasaypa castigashqam kanqa>>.
Tsaynö nirmi señalta churaparqan Caínta pipis mana wanutsinanpä. 16Tsaypitanam Tayta Diospa puntanpita Nod#4.16 Nod ninanqa purikuq ninanmi. partiman Caín aywakurqan tsaychö tänanpä. Tsayqa karqan Edén huertaman rupay yarqamunan läduchömi.
Caínpita miraqkuna
17Tsaypitanam Caínpa warmin qeshyaq rikakur ollqu wamrata qeshyakurqan. Tsay wamrapa jutintanam churarqan Enocta. Tsaypitanam Caínqa juk markata shäritsir markapa jutinta churarqan tsurinpa jutinta. 18Enocmi karqan Iradpa papänin. Iradmi karqan Mehujaelpa papänin. Mehujaelmi karqan Metusaelpa papänin. Metusaelmi karqan Lamecpa papänin.
19Lamecqa karqan ishkay warmiyuqmi. Jukaq warminpa jutinmi karqan Ada y jukaqpanam Zila. 20Ada qeshyakurmi wamranpa jutinta churarqan Jabalta. Jabalmi wakin runakunapita mas puntata toldukunachö tärar ashmankunata wätarqan. 21Jabalpa wawqinmi karqan Jubal. Jubalmi puntataqa arpata y kënata tukayta yachakurqan.
22Zilanam qeshyakurqan Tubal-caínta. Tubal-caín herrëru karmi broncipita y fiërrupita imaykatapis ruraq. Paninpa jutinmi karqan Naama.
23Juk kutichömi ishkan warminta Lamec nirqan: <<¡Ada y Zila, ninqäta wiyayämay! Maqamaq runatam wanutsirqü. Jövin kaptinpis maqamaptinmi wanutsirqü. 24Caínta pipis wanutsir qanchis kuti castigashqa kananpä kaykaptinqa noqata yatamaq kaqqa qanchis chunka qanchis (77) kuti masmi castigashqa kanqa>>.
Set yurinqan
25Adánpa warmin yapay qeshyaq rikakurmi ollqu wamrata qeshyakurqan. Yuriskiptinmi nirqan: <<Wamrä Abelta Caín wanutsishqa kaptinmi Tayta Dios munashqa Abelpa rantin juk wamrä kananta. Tsaymi paypa jutin kanqa Set>>.#4.25 Set ninanqa trokinta qarashqa ninanmi.
26Setmi tsurin yuriskiptin jutinta churarqan Enósta. Enós kanqanpitarämi runakuna Tayta Diosta adorar qallaykuyarqan.
المحددات الحالية:
Génesis 4: qxo
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2002, 2008, Wycliffe Bible Translators, Inc. All rights reserved.
