MATIUS 8
8
Yesus meghadui jemau diau buidapan ja'at
(Mrk. 1:40-45; Luk. 5:12-16)
1Yesus tughun jak di bukit, mangku banyak jemau ngikut Diau. 2Mangku adau sughang jemau njenguak Diau. Jemautu buidapan ja'at diau mbayauka. Diautu nunduak nyemba Yesus sampai bekatau, “Pak, amun Dighi endak, Dighi pacak meghadui aku.”
3Yesus nyurungka tanganAu ngecakka jemau itu ngan bekiciak, “Aku endak, ghadula kaba.” Masau itu pulau idapannyau ghadu.
4Mangku Yesus bekatau ngan diau, “Ingatkala, jangan kaba kiciakka ngan sughang kia ceritau ini. Anyautu pegila njenguak imam, mintak diau merisau kaba. Udim itu enjuakkala kerban diau diajung Musa njadi buktiau ngan jemau, bansau kaba la ghadu.”
Yesus meghadui sughang budak kepalak tentera
(Luk. 7:1-10; Yuh. 4:46-53)
5Masau Yesus masuak ke Kapernaum, adau sughang kepalak tentera njenguak Diau ngan mintak tulung, kataunyau, 6“Pak, budakku tebadai di ghuma karnau buidapan lumpua, la nanggung nian.” 7Katau Yesus ngan diau, “Aku ka pegi meghaduka diau.” 8Anyautu tentera itu bekatau, “Gaula, aku nidau pantas nerimau Dighi di ghumaku. Kiciakka sepata katau ajau, mangku budakku ghadu. 9Aku sughang bawahan, mangku di bawa aku adau pulau tentera. Amun aku ngajung ngan sughang tentera ‘Pegi!’, mangku diau pegi, ngan sughang agi, ‘Ke sini!’ mangku diau datang, lagi ngan budakku, ‘Kerjaukala ini!’, mangku dikerjaukanyau.”
10Ndengagh kici'annyautu Yesus kemangan nian, mangku Diau ngiciak ngan jemau banyak diau ngikut Diau, katauNyau, “Nyela nian katauKu ini, di guak jemau Israil lum kekela Aku nemuka iman sebesak ini. 11Ngenian, banyak jemau ka datang jak di sebela matau-aghi tumbua, jak di sebela matau-aghi tumban duduak makan serempak ngan Abraham, Isak ngan Yakub di sergau. 12Anyautu jemau diau behak njadi umat Allah ka dicapakka di bada diau keleman sekali. Di situ ughangtu ka nangis ngan sengsarau.”
13Mangku Yesus bekatau ngan tentera tadi, “Baliakla, setu diau kaba percayaui ka tejadi.” Masau itu pulau buda'au ghadu.
Yesus meghadui mentuau Simun Pitrus ngan jemau lainau
(Mrk. 1:29-34; Luk. 4:38-41)
14Yesus pegi ke ghuma Pitrus. Di situ Diau nginak mentuau tinau Pitrus dang tiduak karnau demam. 15Yesus ngecakka tanganau mangku demamautu ghadu. Tinautu bangun nepi'i Diau.
16Aghi laka malam, banyak jemau diau diarung iblis dibatak guak Yesus. Mangku ngan sepata katau ajau Yesus ngisitka iblis itu ngan meghaduka gegalau jemau buidapan. 17Yesus ngerjauka gegalaunyautu, mangku ditepati setu diau la dikiciakka nabi Yesaya,
“Diaula nanggungka sengsarau kitau
ngan meghaduka idapan kitau.”
Jemau diau endak njadi anak-bua Yesus
(Luk. 9:57-62)
18Banyak nian jemau di guak Yesus. Masau Diau nginak gegalau ughangtu, Diau ngajung anak-buaHau nyembeghangi danau. 19Mangku adau sughang guru agamau datang njenguak Diau ngan bekatau, “Pak guru, aku endak ngikut Dighi, ke manau ajau Dighi pegi.” 20Katau Yesus, “Landak adau lubangau, burung adau saghangau, anyautu Anak Manusiau endiak bediau badaHau.”
21Mangku sughang agi diau la njadi anak-buaHau bekatau, “Pak, ajungla aku baliak kudai endak nguburka bak kami.” 22Yesus nimbal, “Mela ngikut Aku. Nengkela jemau mati nguburka jemau mati.”
Angin nyaghu dighedamka
(Mrk. 4:35-41; Luk. 8:22-25)
23Udim itu Yesus nayiak perawu ngan anak-buaHau ngikut pulau. 24Mangku adau angin nyaghu di danau itu. Adau pulau umbak besak ngan ayiak masuak dalam perawu. Anyautu Yesus dang tiduak. 25Mangku anak-buaHau pegi mbangunkaNyau ngan bekatau, “Pak, tulung, kitau celakau!” 26Yesus ngiciak ngan ughangtu, “Ngapau kamu takut? Ngapau kamu nidau percayau?” Diau bangun mbentak angin ngan danau, mangku danautu tenang.
27Ughangtu kemangan ngan bekiciak, “Sapau sebenaghau jemau ini? Diau merintaka angin ngan danau, mangku diau ta'at.”
Yesus meghaduka duau ughang diau diarung iblis
(Mrk. 5:1-20; Luk. 8:26-39)
28Mangku Yesus sampai di beghang danau di daira Gadara. Adau duau ughang datang diau diarung iblis. Ughang duautu buas nian, mangku nidau sughang kia beghani lalu di situ. Ughangtu ngeluagh jak di perantuan 29ngan tegauk-gauk, kataunyau, “Ka Kaba apauka kami, ui Anak Allah? Apu Kaba endak nyaraui kami, empuak lum masaunyau?”
30Nidau jawua jak di situ banyak kaput ingunan dang ndalak makanan. 31Mangku iblistu mintak ngan Yesus, kataunyau, “Amun Kaba endak ngisitka kami, ajungla kami ngarung kaput itu.” 32“Pegila!” katau Yesus. Mangku iblis itu ngeluagh jak di ughangtu ngarung kaput. Kaput diau banyak itu belaghi tumban ke badas masuak danau mangku mati tebenak.
33Tukang-tukang sayia kaput itu belaghi ke kuta nceritauka gegalaunyau diau la tejaditu, pulau ceritau ughang duau diau diarung iblis tadi. 34Mangku gegalau jemau di kuta itu pegi nemui Yesus. La betemu ngan Yesus, ughangtu mintak nian, supayau Diau pegi jak di bada itu.
المحددات الحالية:
MATIUS 8: PSE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
