MATIUS 4
4
Yesus indi ngarid wene
4:1-11
(Mk 1:12-13; Lk 4:1-13)
1Iri luk, Sere-nen at indi ngaruwakluk Konak Indi-nen Yesus ndemil uburuk karu me mbirij-o. 2Nde, Yesus na-ge mburu ninggit lak, lengge-nen kubu-nen empat pulu worarug-e, mburu nere ebem wok yij-o. 3Wok yarik worasoma-ge, Sere na at eram wok yarik-nen yak tosolar-e: ”Kar-e Mbal Pem Nagawan Ambara nde ala-ge, kerep yeba-ge mburu kwat min-o luk yak ti-o” luk yij-o.
4Nde, iri yosoloma, Yesus-nen wene erep nggarosolar-e: ”Mbal Pem Nagawan Engga mbarak pem-nen yosolar-e: ’Ab-e mburu bem nak unluk woragwi bug-o. Are, Mbal Pem Nagawan emndam-nen mbiridnak wene oboksa bem-net unluk woragwi-o’ ” luk yij-o.
5Iri luk, Sere iri na-nen Yesus na imin luk, o siri marak Yerusalem iri na me imin mberarik, Mbal Pem Nagawan uwi kirin pem koreyak uburuk-nen 6at yak tosolar-e: ”Kar-e Mbal Pem Nagawan Ambara nde ala-ge, kud mboksa nggweyak ma mbi-o. Nde, Mbal Pem Nagawan Engga mbarak pem-nen yosolar-e:
’Mbal Pem Nagawan-nen-e at-nen idnak nap inpil lobok yuwama, kimiri yogolar-e, kat kijog-e kerep pem pijaksa mbugun naru, it ininggi mok pem tak kubuwa-o’ luk yij-o”.
7Iri yosoloma-ge, Yesus at yak tosolar-e: ”Alat nde, Mbal Pem Nagawan Engga mbarak pem-nen yosolar-e: ’Kat-nen-e Nagawan Indo Kembal Pem Nagawan na indi ngarusu-ge meyog-o’ yij-o” luk yid.
8Iri rak puruk, Sere na-nen tuguruk Yesus na imin luk ndobo nggulok pem teram imin lagarik, at mirik obosolar-e, nggweyak ma yu me ap-nen tenagaidnak wi oboksa min nggweyak ma woraso mende min iri na mirik ibij-o. 9Nde, iri luk, Sere-nen yosolar-e: ”Kat nde an neralu tud luk, an nerembel wanosola-ge, kat-nen kasu mende yu oboksa kat wok kirimin-o” luk yij-o.
10Yosoloma-ge, Yesus-nen at yak tosolar-e: ”Kat Sere yu-ge mbiri-o! Mbal Pem Nagawan Engga mbarak pem-nen yosolar-e: ’Kat-nen-e Nagawan Indo Kembal Pem Nagawan nak kek tak uburuk, at arig-et nak ndegel obosolat wolmin-o’ luk yij-o” luk Yesus-nen yak tij-o.
[11Nde, iri yak turuk worasoma-ge, Sere na-ge at keya buruk mborosola-ge, aid nap lobok yogolar-e, at yongga wiriga-o.]
Yesus-e o Nggalilea-nen at eyabu wanoso tel kwirid wene
4:12-17
(Mk 1:14-15; Lk 4:14-15)
12Nde, Yoanes na-ge o kubu me pil nggwiga-o yosola kuluruk yarik, Yesus na-ge tuguruk o Nggalilea mbirij-o. 13Nde, Nasaret na keya buruk yarik, it ap enlem Sebulon min Naptali min woragwi sa Nggalilea koma eyak pem o siri Kaperenaum mberarik, iri me woragaij-o. 14Iri me woragaid iri-ge Mbal Pem Nagawan ene lomboksa yoso nap Yesaya-nen yidnak wene yu ndak tak posolat-nen yij-o. Nde, wene iri-nen yosolar-e:
15”Sebulon min Naptali min onggweyak iri-ge,
yi koma ambigit nggwe mburugwi sa, Yorodan eyak ele bem-o enlem nin nap onggweyak Nggalilea wa-e!
16Ndamuk pem woragwi nap-nen-e yaya nggulok mbi kaigo-o!
Nde, wat momtak elem ugumak-nen yemendak unpuruk woragwi nap enmanggim-e mo pil wagaij-o!” luk yij-o.
17Nde, iri tarem-e Yesus-nen mul ondoso tel korosolat-nen yosolar-e: ”Mbal Pem Nagawan-nen tenagaidnak wi panggo yusu me, kit meya yidnak keya buruk, kondok yer-o!” luk yosolat woragaij-o.
Yesus-nen keyane wanugwi nap empat wene mbo inpid wene
4:18-22
(Mk 1:16-20; Lk 5:1-11)
18Nde, Yesus na Nggalilea koma eyak nggwe waring kasoma-ge, ap mbi owot min eneyagaij-o. Nde, iri na-ge Simon unu misig-e Peterus nde, at owot Andereas nde, it enmbereg-e keyane wanugwi nap me, yi koma arem keyane wanugwi sum ya mberak kwarukmu, eneyagaij-o. 19Yesus-nen it yak ondosolar-e: ”An langgal nuburuk nak mer-o. Iri ala-ge, keyane wanugwi nggal ap wanugwi nap tak kinpimin-o” luk yak indij-o. 20Yak ondosoloma, ereya na-net keyane wanugwi sum na keya buruk, at imin mbiriga-o.
21Nde, ereba-t mborosoma-ge, owe owot mbi Sebendeus irirak Yakobus min owot Yoanes min eneyagaij-o. It iri na-ge ineid Sebendeus na imin e koma arem-nen keyane wanugwi sum panggarukmu eneyarug-e, Yesus-nen mberen nap na wene mbo onposoloma, 22ereya na-net e koma na min ineid na min keya buruk, Yesus imin mbiriga-o.
Yesus-nen ap mul ondosolat, ap kwarat ki rak onposolat yid wene
4:23-25
(Lk 6:17-19)
23Yesus na-ge o Nggalilea uwi iri me oboksa waring kasolar-e, Mbal Pem Nagawan uwi worak ma-nen ap mul ondosolat, Mbal Pem Nagawan-nen tenagaidnak wi wene na ap yak ondosolat, ap kugi worak min kugi nin tak nan tak enpem mbidnak nap min ki rak inpil waring kagaij-o. 24At obog-e o Siria uwi oboksa wigak yil mborosola-ge, ap-nen at eram wok unpuruk lobok yogolar-e, kugi nin tak nan tak enpem mbidnak nap oboksa min, kugi andi-nen yane wurugwi nap min kugi enarem nggwidnak nap min ininggi nggonggo onowak nggonggo entagup kila kilasa wat yugwi kugi enpem mbidnak nap min kambung puk tak woragwi nap min wok unpuruk lobok yogola, Yesus-nen it oboksa ki rak onposolat woragaij-o. 25Ab-e mondok kwarat, Nggalilea woragwi nap min Ndekapolis woragwi nap min Yerusalem woragwi nap min Yurea woragwi nap min Yorodan eyak ele bem woragwi nap min-e nggwid nggwid at imbirik niga-o.
المحددات الحالية:
MATIUS 4: inondx
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
@LAI 1992, 1994
