MATIUS 18
18
”Ta nde nggulok lombok ma-o?” yiga wene
18:1-5
(Mk 9:33-37; Lk 9:46-48)
1Iri tarem-et at owosirak-nen Yesus eram lobok yigarik, at kin wok obogolar-e: ”Mbal Pem Nagawan-nen tenagaidnak wi iri me-nen-e ta nde nggulok lombok wolma-o?” luk kin wok ibiga-o. 2Alama-ge, Yesus-nen la marik mbi yonggo paga la iri na-ge it ennggendumu mendak uburuk, 3at-nen yosolar-e: ”Wene yu yak kendeyeg-o: Kit kenpage nden yaga la marik yu abage nggal kwat yigit lak yugup ala-ge, Mbal Pem Nagawan-nen tenagaidnak wi-ge mondok nggugup pug-o. 4Nde, at ambik indi teberak puruk, la marik yu abage nggal yuwa nap iri-nen perak nde, Mbal Pem Nagawan-nen tenagaidnak wi iri me-nen nggulok lombok wolmar-o. 5Nde, an nunu bem ala la marik yu nggal wok ibili nab-e, an-et wok nibili-o.”
Meya makluk ap enarem worakwi wene
18:6-11
(Mk 9:42-48; Lk 17:1-2)
6”Nde, an nebem indi angin tubu yidnak li marik ennggendumu-nen misik yu nggal kabak tak ubuwa nab-e, kerep nggulok mbi at urusuwak pem kere para tiyong tak puruk, yi koma ennggendumu mbo bil nggurak perak ob-o. 7Nggweyak ma yu me-nen ap meya makluk enarem woraga pil nggoso mende nin tak nan tak worasu me, enabuwa-o. Iri mende-ge mondok wolma-t nde, enarem woraga pil ngguwa nab-e abuwa-o.
8Nde, kat kinggi ala-nen na, kat kijok ala-nen na, kat meya rak kobosola-ge, mbara mbo bi-o. Kat kinggi min kat kijok min mbarag-et nde, kebe kuruk wolmomtag-e ob-o. Nde, kat kinggi mberen min kat kijok mberen min kundugu-t nde, nigi yoso buk kan mare arem kibil nggurag-e meya-o. 9Nde, kat kerengen-nen kat meya rak kobosola-ge, kela mbo bi-o. Kat kerengen misiget nag-et nde, kuruk wolmomtag-e ob-o. Nde, kat kerengen mberen parugu-t nde, kan mare arem kibil nggurag-e meya-o.
10Nde, li marik yu misik na mondok kinsili kudtak pug-o. An-nen yak kendeyeg-o: Aid arem-nen it-nen idnak aid nap iri-ge pempa pempa an Neid aid arem woraso na erare yik karok worali-o. [11Iri bem-e, Ap Ambara na-ge pul yidnak nap inmiri yekluk lobok yij-o.]”
Lomba wam pul yidnak pem nden karuk yidnak wene
18:12-24
(Lk 15:3-7)
12”Kir-e ngge nde perali-o? Ap misik olomba wam-e seratus (100) worasoma, olomba misik nde pul yuwama-ge, ap iri na-ge olomba sembilan puluh sembilan (99) ereba na-ge ndobo bem keya buruk, misiget pul yidnak iri na ogore yil mburuwa-ge lag-a? 13An-e ndemeret yak kendeyeg-o: Ap iri na-ge olomba iri na kasolug-e, olomba misiget nak iri na bem alen-e mondok kwarat kujwa-t nde, pul yigit lak olomba sembilan puluh sembilan (99) ereba na bem-e alen-e marik nggal kujwa irir-o. 14Iri nggal-et kit Kineid aid arem woraso na li marik yu ennggendumu-nen la misiger-o luk tet pul momtak iri-ge ar-e perasu bug-o.”
Anggam-net anggam nggomo wururak wene
18:15-20
15”Kat kanggam-nen meya rak kobosola-ge, at eram mburugundik, kit kenmberek kenarikmu woragolat-nen at meya yidnak na nam-et kene amawi min nggomo wiri-o. Nde, at-nen nde kat kene kolosolar-e, kat kanggam-et wolma-o. 16Alat nde, at-nen nde kat kene kuligit lak ala-ge, ap misiget ala, ap mberen ala, kimin tak unpuruk, eram mbururag-o. ’Ap enpem pidnak wene-ge kenggel undugwi nap mberen ala na, kenan ala na, enemendam-nen mbiridnak wene mag-o’ luk Mbal Pem Nagawan engga pem yidnak wene na ndak ndag-et kwarurag-o. 17Alat nde, at-nen nde it iri na enne na kuligit lak ala-ge, wene iri-ge lambuk tak inpidnak nap inmbiri bem-net yurag-o. Yukmu nde, at-nen-e lambuk tak inpidnak nap na enne na kuligit lag-et ala-ge, at iri na-ge Mbal Pem Nagawan aru buk nap nggal, pemerinta enmanggim tol ndok woroso nap nggal irit yik kagolat wolmomtag-o.
18An-nen yak kendeyeg-o: Kit-nen nggweyak ma yu me kamarak pugup mende iri-ge, aid arem-nen na kamarak irit wolma-o. Nde, kit-nen nggweyak ma yu me wisirik pugup mende iri-ge, aid arem-nen na wisirik irit wolma-o.
19Nde, an-nen tuguruk yak kendeyeg-o: Nggweyak ma yu me kit mberen nap-nen kinndi misiget luk, tepan yogolat nggi yugup mende-ge, an Neid aid arem woraso-nen-e wog-et kunduwa-o. 20Nde, ap mberen ala na, ap kenan ala na, an nunu bem ndok worogola-ge, an-e it ennggendumu-t woramin-o” luk yij-o.
Ap meya yidnak amberam tak poso buk ndegel poso nap ebem nden karuk yidnak wene
18:21-35
21Iri yosoloma-ge, Peterus-nen Yesus eram lobok yarik, at yak tosolar-e: ”Nagawan Indo wa-e. An nanggam-nen an meya rak nobosola-ge, at meya yidnak iri na nunggwirik pem nemberam tak pimin-o? Tuju bem nde nemberam tak pimin, lak?” luk yij-o. 22Yosoloma-ge, Yesus-nen yosolar-e: ”Lag-o. Tuju bem nag-e lag-o. Are, tuju pulu kali tuju bem-er-o (490 pem).
23Iri bem-e, Mbal Pem Nagawan-nen tenagaidnak wi iri-ge yu nggal-nen yusu-o: Nagawan misig-e at ndegel pugwi nap-nen at arengge namat waniga ereba na uwi yagurak peragaij-o. 24Namat wanidnak ereba na uwi yaguwakluk, mbenaridnggal-e, it-nen pil lobok yogolar-e, nagawan na arengge namat wanosolar-e, tol mondok wonarurak puk nggal (berjuta juta rupiah) wanidnak nap mbi pil lobok yiga-o. 25Alat nde, ap iri na-nen uwi yagurag-e mondok meya ala karuk, nagawan iri na-nen ene amawi min yosolar-e: ’At namat iri uwi yagurak pem ap yu na nde at ogwe la nde at arengge oboksa wene werer-o’ luk yij-o. 26Iri yosoloma-ge, ndegel poso nap iri na-ge at nagawan eralu mbud yarik, at emengen mbarosolar-e: ’Nab-o. Pug-o. Namat wanigi iri-ge oboksa uwi-t yagimin-o’ luk yij-o. 27Iri yosoloma-ge, at nagawan iri na-ge at abuwa karuk, namat wanidnak iri-ge yemenda keya buruk, we wirik pij-o.
28Iri luk, ndegel poso nap yu na mbiridnggal-e, at anggam yabu misiget erep wanoso nap misik iri na imin lid pid lug-e, at anggam na-ge at arengge namat wanidnag-e mariget nggal (seribu rupiah) wanidnak me, ap yu na-nen anggam iri na lombok tarik, urusu magosolat-nen yak tosolar-e: ’An narengge namat wanigen iri na-ge ndag-et nak uwi yagi-o’ luk yak tij-o. 29Yak tosoloma-ge, at anggam iri na-ge at yu eralu mbud luk, at emengen mbarosolar-e: ’Nab-o. Pug-o. Karengge namat wanigi iri-ge uwi-t yagimin-o’ luk yij-o. 30Iri yij-et nde, at anggam iri na-ge at ene kuligit lak luk, namat iri na uwi yagosola-net weserak puwakluk, o kubu me pil nggwij-o. 31Iri kwat obosola karuk, ndegel pugwi nap erep iri na it inndi puru kwarat luk, it nagawan na eram mbirigarik, wene iri na wesera yak tiga-o. 32Yak togolikma-ge, nagawan iri na-ge ndegel poso nap na wene mbo uburuk-nen yak tosolar-e: ’Ndegel noboso nap meya yu-ge wa-e. Kat-nen an nemengen mbarosola-ge, an-nen-e an narengge namat wanigen oboksa iri-ge yemnda keya kibigi-o. 33Nde, an-nen kat kabuwa kagi iri na nggal-et kat-nen na kat kanggam yabu misiget erep wanoso nap na abuwa kudtag-e meya?’ luk yak tij-o. 34Yak turuk, nagawan iri na isilepma kwarat luk, namat iri na pik paksa uwi yagosola-net keya buwakluk, mbut undugwi nap ininggem pij-o.
35Nde, kit-nen-e kinndi min-et kit kennggamtak-nen meya yidnak na kenmberam tak pigit lak ala-ge, an Neid aid arem woraso-nen na iri nggal-et kwat kunpuwa-o” luk yij-o.
المحددات الحالية:
MATIUS 18: inondx
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
@LAI 1992, 1994
