Lûqa 24

Îsa Merg Ra Werzeno

(Matta 28:1-10; Marqos 16:1-8; Yûhanna 20:1-10)

1Şabatî dima, roja siftî di, nê cenî şefaqe rew weriştîbî. Înan ruwenê boyda weşo ki kerdbi hadre, o zî girot û şî mezelî ser. 2Hima înan dî ki sî mezelî fek ra leyrî bîya. 3Ew ê şî mezelî mîyan ew dî ki meyitê Reb Îsay uja di çinî yo, 4ê winî ecêb ew şaş mendîbî. A çeq di, çinadê berqîyayî mîyan di, di teney camêrdî finê ra înan ver di vijyay. 5Nê cenî tersay û sereyê xo na xo ver. Wexta ê di camêrdan înan rê va: “Oyo ki weş o, çiçî rê şima yê merdan mîyan di geyrenê Ey? 6O tîya di nîyo, O merg ra werişt. Bîyarê xo vîrî ki Ey şima rê se vatbi, wexto ki O hewna Celîle di bi. 7Ey vatbi ki ‘Gerek Lajê Însanî do gunakaran dest deyo, O do xaça dardi bo ew roja hîrin do merg ra werzo.’ ”

8Cenikan wexta qiseyê Îsay ardî xo vîrî. 9Ew ê mezel ra peyser ageyray sûk û nê girweyê ecêbî jewndes wekîlan rê ew ê bînan rê vatî. 10Cenîyê ki wekîlan rê nê girwey vatîbî, ê Meyrema Mecdelij bî, Yohanna bî, maya Yaqûbî Meyrem bî ew ê cenîyê bînê ki nînana pîya bî. 11Hima nê qisey wekîlan rê zey istanik amey ew înan emel nêkerd. 12Naqor Petrûs werişt û vazda şi mezelî ser, xo namit ew weyna mezelî mîyan ki bê kefenî teba çinî yo. O uja ra abirya û şi, nê girwî rê ecêb mendbi.

Di Telebey ê Rayda Emmaûsî Di

(Marqos 16:12-13)

13Roja ki nê girwey bîbî, di telebeyê Îsay kewtî ray û şîyê hetê jû dewa. Na dew, nezdî di sehata Yeruşalîm ra dûrî bî ew nameyê na dew Emmaûs bî. 14Ray ra, girweyê ki a roj bîbî, înan mîyabeyndê xo di qalê înan kerdê. 15Ew çeqa ki înan nê qisey wuna vatê, Îsa bixo ame înan hetek û înana pîya ray ra şi. 16Hima çimê înan girêdeyay bî ki ê Îsay nêsilasnê.

17Îsay înan rê va: “Şima yê wuna xo mîyabeyn di ray ra qalê çiçî kenê?”

Ê qahrîyay û herunda xo di vinderdî. 18Ew nînan ra, oyo ki nameyê ci Kileopas o, ey Îsay rê va: “Yeruşalîmî mîyan di, girweyê ki nê rojan di bîyê, pêro pey hesîyay, ti tenya pey nêhesîyayê.”

19Îsay va: “Çi girwey bîyê?”

Înan zî va: “Girweyê ki amey Îsadê Nasirayijî sered'. O Ellay ew milet ver di, hem girwandê xoya hem zî qisandê xoya pêxemberêndo gird bi. 20Serdaranê kahînandê ma ew pîlanê ma mergê ey waşt ew va, Ey xaça dardi kerê. 21Hima ma omid kerdê ki merdimo ki do Îsraîlî bireyno, no O bi! Ew ewro roja hîrin a ki nê girwey heme bîyê. 22Ew mîyabeyndê ma ra tayn cenîyan zî ma vistî teşqele. Ê şefaqe rew werzenê şinê mezeldê Îsay ser ki 23meyitê ey uja di nîyo, peyser yenê ew vanê ‘Tayn melekî ma ra asay û va, Îsa weş o.’ 24Nay sera mîyabeyndê ma ra çend merdimî şinê mezel ki cenîyan senî vato, winî yo, ew Ey uja di nêvînenê.”

25Wexta Îsay wuna va: “Şima hendayê bêfahmî yê! Ew qiseyê ki pêxemberan kerdê, zerrîya şima ê qisan rê çend çetin emel kena! 26Xora winî gerek nêbi ki Mesîhî do no ezîyet biantayê ew bahdo bişîyayê hekmetda Ellay?” 27Ew Îsay, Mûsay ra heta ê pêxemberandê bînan ra ew Mibarek Qisandê Ellay pêrin mîyan di, kotî di qalê Ey bîyo, Ey ê qisey heme înan rê kerdî eşkera.

28No hesaba dewa ki ê şîyê, resay a dew. Îsay winî kerd ki zeki qayil bi hewna tenekna dûrî şiro. 29Hima înan nêverda ew Ey ra reca kerd va: “Maya pîya biman! Xora şan o, roj o zî keno şiro awar.” Wexta Îsa şi keye ki înana pîya bimano.

30Bahdo, senî O înana pîya sifre di ronişt, Ey nan girot, Ellay rê şukur kerd, nan kerd bara ew da înan. 31Wexta çimê înan abîyay, înan O silasna ew jû find' O çimandê înan vera bi vinî. 32Ew înan pêjewbînan rê va: “Wexto ki ma ray ra Eya pîya bî ew Ey Qiseyê Mibarekî ma rê kerdî eşkera, wexta zerrîya ma kêfa ra weş nêbî?”

33Ew a sehat di, ê wirna weriştî pay ew ageyray Yeruşalîm. Uja di înan jewndes wekîlî ew êyê ki înana pîya bî, ê pêro pîya dî 34ew înan rê va: “Reb raşta merg ra werişto ew Sîmon Petrûsî ra zî asayo.” 35Ew nê wirna zî ray ra se bîyo ew wexto ki Îsay nan bara kerdo înan, O senî silasnayo, heme çî înan rê va.

Îsa Telebandê Xo Hemin Ra Aseno

(Matta 28:16-20; Marqos 16:14-18; Yûhanna 20:19-23)

36Hewna înan nê qisey kerdê ki Îsa bixo ame înan mîyan ew va: “Şima rê silametey bo!”

37Naqor ê ters ra bî wişkî, çiki înan va, qay ê yê rihê merdî vînenê. 38Ew Ey înan rê va: “Çiçî rê şima yê hendayê tersenê ew senî wuna şîfe kewno şima zerrî? 39Bewnîrê destandê mi ra ew lingandê mi ra, raşta ez bixo ya! Destê xo mina nê ew bivînê, çiki jew rihî di goşt û estîya nêbenê ew zeki şima yê vînenê, mi di ê estê.”

40Bahdê nê qisana, ey dest û lingê xo misnay înan. 41Naqor înan kêf ra hewna emel nêkerdê ew winî ecêb mendîbî, wexta Ey înan rê va: “Şima di tebayê werdî esto?” 42Înan jew lete maseyo sûrkerde da Ey. 43Ew Ey çimandê înan ver di o girot û werd.

44Bahdo Ey înan rê va: “Wexto ki hewna ez şima hetek di bîya, mi şima rê wuna vatbi, ‘Qanûndê Mûsay di, qisandê pêxemberan û Mezmûran mîyan di, qandê mi çiçî yazi bîyo se, ê qisey pêro gerek bîrê ca.’ ”

45Uja di Ey fahmê înan akerd ki ê Qisanê Mibarekan fahm bikerê, 46înan rê va: “Xora wuna yazikerde yo: Mesîh do ezîyet banco, bimiro ew roja hîrin O do merg ra werzo. 47Namedê Mesîhîya wahzî do bideyê, merdimî do veyndeyê tewbe winî ki gunayê înan ef bê. Nê wahzî do Yeruşalîm ra sifte bikerê ew qewmandê bînan pêrin mîyabeyn di bideyê. 48Şima şahîdê nê girwan hemin ê. 49Ew ez do, zeki Pêrê mi wahd kerdo, şima rê cordê coran ra hukum birişa. Hima şima na sûk di bipawê ki hetanî şima no hukma pirrî bê.”

Îsa Çimandê Pêrinan Ver Di Vijyeno Azmîn

50Îsay telebeyê xo berdî teberdê sûk, hetanî nezdidê Beytanya ew Ey destê xo hewaday û ê mibarek kerdî. 51Senî ki Ey ê mibarek kerdî, înan hetek ra abirya û Ellay O girot azmînî ser. 52Înan Ey rê secde kerd ew kêfêndo girda ageyray Yeruşalîm. 53Ê tim û tim Keyedê Ellay di bî ew înan Ellay rê hemd û şukur kerdê.

المحددات الحالية:

Lûqa 24: diq

تمييز النص

نسخ