Lûqa 20

Hukmê Îsay

(Matta 21:23-27; Marqos 11:27-33)

1Rojê, wexto ki Îsay Keyedê Ellay di wahzî dayê ew mijdîyana Hukumdareyda Ellay milet rê vatê, tayn serê kahînan, Alîmê Kitaban ew Pîlê Yawudîyan amey uja 2ew înan Îsay rê va: “Ma rê vaj, kamcî hukma tî yê nê girwan kenê? No hukum kamî dayo to?”

3Îsay zî înan rê wuna va: “Ezo şima ra pers kena, vajê mi rê, 4Yehyay îzindê kamîya waftîz kerdê, êdê Ellaya yazî êdê merdimana?”

5Înan xo mîyabeyn di qisey kerdî, va: “Eki ma vajim, ‘Êdê Ellaya’, O do vajo, ‘Winî yo se, şima çi emelê Yehyay nêkerdê?’ 6Naqor ma vajim, ‘Êdê merdimana’, wexta na milet pêro do ma sî kero, çiki heminan emel kerdê ki Yehya jew pêxember bi.”

7Soyin di înan va: “Ma nêzanim kamcî hukma Yehyay waftîz kerdê.”

8Wexta Îsay va: “Winî yo se, ez zî şima rê nêvana ezo kamcî hukma nê girwan kena.”

Mesela Reşberandê Xiraban

(Matta 21:33-46; Marqos 12:1-12)

9Bahdo Îsa ageyra milet ew înan rê na mesel va: “Wextê di jew mêrdekî xo rê rez ronayê, bahdo rezê xo nîme dayê reşberan ew xeylê mihal şîyê raywaney. 10Bahdê şîrîya o jew koleyê xo rişeno reşberan hetek ki şîredê rezî ra nîmeyê ci bidê ey. Hima reşberî danê ey ro ew ey destveng peyser rişenê. 11Wexta no mêrdek jewna kolî rişeno, hima ê danê ey ro zî, ci huwenê ew ey zî destveng peyser qewirnenê. 12O fina hîrin, jewnay rişeno. Ê ey zî kotegî kenê, gûnî di verdanê ew rez ra erzenê teber.

13“Wihêrê rezî vano: ‘Ez se kera? Ez do lajê xo yê qedrî û qîmetî birişa, ê do ey bihesibnê.’

14“Senî ki reşberî vînenê lajê wihêrdê rezî yo yeno, ê pêjewbînan rê vanê: ‘No wihêrê mêrasî yo, bêrê, ma ey bikişim, wexta no mêras ma rê maneno!’ 15Ê ey rezî mîyan ra erzenê teber û kişenê.

“Bahdê neya, no wihêrê rezî do se kero înan? 16O do bîro, înan bikişo ew bahdo rezê xo bido jewnay.”

Mileta ki nê qisey aşnawitî, înan va: “Ella nêkero!”

17Îsa weyna înan ra ew wuna va: “Nê qiseyê ki Qisandê Mibarekan mîyan di estê, vajê mahneyê nînan çiçî yo:

‘Sîya ki wustayan va, na sî tebay rê nêbena,

A sî bî sîya koşî.’#20:17 Bewnîrê kitabdê Mezmurlar'î di 118:22.

18“Kamo ki na sîyer sero guno, o do lete letey bo, ew na sî kamî sero guno se, a do ey zeydê wela werdî kero.”

19Nê Alîmanê Kitaban û serê kahînan zanayê ki Ey a mesela reşberan înan deyne vatê. Ay ra ê qayilî bî a çeq di Îsay tepêşê, hima milet ra tersayê.

Persê Vêrgîdê Qeyzerî

(Matta 22:15-22; Marqos 12:13-17)

20Nay sera ê qayilî nêbî ki Îsay çimandê xo vera abirnê, qandê coy înan çend merdimê fesadî riştî Ey hetek ki Ey tim xeyal kerê ki hetanî Ey fek ra qiseyênda çewt biaşnawê. Winî ki Ey walî çim di neheq kerê, ew walî Ey tepişten do. 21Qandê coy nê merdiman Îsay rê va: “Mehlîmê ma, ma zanê qiseyê ki tî yê kenê ew misnenê ma, ê pêro raştî yê. Wexto ki ti misnenê kes do senî rayda Ellay ra şiro, wexta bol merdimêndo ercîyaye bo zî, ti nêtersenê ew ti raşta ci vanê. 22Ma rê vaj: Ma vêrgî bidim Qeyzerdê Romay, yazî nêdim?”

23Hima Îsay dûzana înan fahm kerd. 24Ay ra Ey înan rê va: “Jew perreyo sêmin#20:24 Nameyê ê perredê sêminî Dinar bi, ey sero resm û nameyê hukumdardê Romay bî. mi misnê!” Bahdo va: “Perrî sero, resm û yaziyê kamî esto?”

Înan va: “Êdê Qeyzerî.”

25Wexta Îsay înan rê va: “Ey ma winî yo se, ê heqê Qeyzerî bidê Qeyzerî, ew heqê Ellay zî bidê Ellay!”

26Înan nêşa ki milet ver di Îsay fek ra qiseyênda çewt vejê. Naqor ciwabo ki Îsay da, ê hendik ecêb mendî ki winî înan nêzana se vajê.

Merg-Ra-Weriştiş Esto, Çinî yo?

(Matta 22:23-33; Marqos 12:18-27)

27Bahdo tayn Sadûqî#20:27 Sadûqî: Jû gruba Yawudîyana ki Qanûnê Tewratî serbest dîyê. amey Îsay hetek. Înan emel nêkerdê ki merg-ra-weriştiş esto, qandê coy înan Îsay ra pers kerd va: 28“Mehlîmê ma, Mûsay Kitab di ma rê emir kerdo, vato ki: ‘Eki jew camêrdo jewjîyaye ocaxkor mireno se, birayê nê merdimî do cenîyera ey bigîro ki ezbeta birardê ci vinî nêbo.’ 29Hima wextê di hewt biray bî. Sifteyênê ci xo rê jewjîya ew ocaxkor merd. 30Uja di, bahdoyênê ci cenîya birardê xo vîya girot, hima o zî ocaxkor merd. 31Bahdê eya, birayê bînî fina hîrin a girot ew o zî winî bi. Hewt heme zî bê qeçek merdî. 32Soyin di, na cenîyek zî merd. 33No hesaba Rojda Merg-ra-weriştişî di, na cenî do cenîya kamcînî bo? Çiki nê hewt heme zî aya jewjîyaybî.”

34Îsay înan rê wuna va: “Merdimê nê dinyay jewjîyenê ew jewjnenê. 35Hima êyê ki Ellay layiq dîyê, merg ra werzê ew dinyado newe di fina weşî bê, ê hinî nêjewjîyenê. 36Ew ê do nêmirê zî, çiki ê zeydê melekana yê. Ew êyê ki merg ra weriştê, ê qeçê Ellay ê. 37Mûsay zî na mesela merg-ra-weriştiş kerd eşkera. Çiki meselda birikdê telî di#20:37 Ellay birikdê telî dê veşnayî ra veyndayo Mûsay, bewnîrê kitabdê Mısır'dan Çıkış'î di 3:1-6. , Mûsa Rebbî rê vano ‘Ellayê Îbrahîmî, Ellayê Îshaqî ew Ellayê Yaqûbî!’ 38Ella xora Ellayê merdan nîyo, herunda ney di O Ellayê weşan o, çiki Ey rê ê heme weşî yê.”

39Tayn Alîmanê Kitaban va: “Mehlîm, to raşt qisey kerdî.” 40Hinda kesî nêwetard ki Ey ra jûna qisa pers kero.

Mesîh Lajê Dawidî yo, Yazî Rebbîyê Dawidî yo?

(Matta 22:41-46; Marqos 12:35-37)

41Îsay înan hemin ra pers kerd: “Senî beno ki, Mesîh lajê Dawidî yo#20:41 Mesîh, Lajê Dawidî yo, yanê Mesîh ezbeta Dawidî ra yo.? 42Çiki Qiral Dawid#20:42 Qiral Dawidî zî pêxember bi. bixo kitabdo Mezmûran#20:42 Kitabdê Mezmurlar mîyan di 150 duay û beytî estê. mîyan di wuna vano:

‘Rebbî, Mesîhdê mi rê va ki

43Ti kiştda mina raşta roş

Hetanî ez dişmenanê to lingandê to bin di kera.’#20:43 Bewnîrê Kitabdê Mezmurlar'î di 110:1.

44“Eki Dawid o, Mesîhî rê vano Rebbî se, O senî lajê Dawidî beno?#20:44 Îsa qayil bi ki wa milet bizano ki Mesîh hem ezbetda Qiral Dawidî ra yo, hem zî Rebbî Dawidî yo. Yanê O hem Ella yo, hem zî merdim o.”

Alîmandê Kitaban Ra Xo Bipawê

(Marqos 12:37-40; Matta 23:1-7, 23:14)

45Wexto ki milet pêroy goştarey kerdê, Îsay telebandê xo rê wuna va: 46“Xo Alîmandê Kitaban ra bipawê! Ê qayilî yê fîstanandê dergana şirê tîya uja, ew ê wazenê ki merdimî înan bol bihesibnê ew kuçan di silam bidê înan. Sînagogan di ê vernîda heminan di roşenê ew dahwetan di zî tim cayê rindî gênê. 47Nê milkê cenîyandê vîyayan wenê ew duayê dergî kenê ki milet bivîno ew înan bol bihesibno. Qandê coy ezabê nê winayinan do bol giran bo.”

المحددات الحالية:

Lûqa 20: diq

تمييز النص

نسخ