Emiighom 1
1
Ịdi Ẹnaan ẹlem aḅirini phọ
1Emiighom mọ, Ẹnaan ịlhem ni kẹ phọ rꞌade phọ. 2Ade phọ ịrol li bịn ịyaar ị́tol. Ọphiiny ạbazi phọ ratuḅuḍian ghan bọ kụ aakpereghiom bọ oomo ạraraar phọ, ạrol rꞌufiri kụ Uwaloor phọ Ẹnaan arelhe aaghironom sịphe ạnyu ạmuum mọ. 3#2 Kọr 4.6Kụ Ẹnaan ẹḅem mọ, “Mị ạto mọ ạḍiḅaal emite,” bịn ạḍiḅaal emite. 4Kụ ẹḅeeraan Ẹnaan ịpe ọdi ạmiin bọ, kụ ọdi ạgbatan ḍịḅaal phọ esi ufiri phọ. 5Ẹnaan ighol li ḍịḅaal phọ mọ Ootaany, kụ eghol ufiri phọ mọ Aḍughul. Adulhe phọ rꞌạḍiroor phọ kụ iḍighi ḍịḅel aḍio.
6-7 #
2 Pit 3.5
Kụ Ẹnaan ẹḅem mọ, “Mị ạto mọ ọku ạrol adiemi rụmuum mọ ịyal ariisi.” Kụ ẹtuugh ịdipho eḍighi. Kụ Ẹnaan ẹgbarion rụmuum mọ, mụen ude phọ rꞌạmuphe ạnyu phọ. 8Ẹnaan ighol li ọku phọ mọ Okuaḍio. Adulhe phọ rꞌạḍiroor phọ kụ iḍighi ḍio dị emuneniom ịyal.
9Kụ Ẹnaan ẹḅem mọ, “Mị ạto mọ ạmuum mọ odi bọ ẹphen ude okuaḍio phọ aakpomoghan eniin esi pịdi ạḍigharaghar ade amite,” kụ ẹtuugh ịdipho eḍighi. 10Ẹnaan eghol ọgharaghar ude phọ mọ Ade; ẹḅile eghol rụmuum mọ aakpomoghan bọ mọ Ọphiiny. Kụ ẹḅeeraan Ẹnaan ịpe ọdi ạmiin bọ.
11Kụ Ẹnaan ẹḅem mọ, “Mị ạto mọ ade phọ emiteghom ịdo kịrokiro ạroogho, rꞌịizupha dị kemuum rughuuny, rꞌireeny dị kemuum iimuma,” kụ ẹtuugh ịdipho phọ eḍighi. 12Kụ ade phọ imiteghom ni ịdo kịrokiro ạroogho rꞌịizupha rꞌarughuuny. Kụ ẹḅeeraan Ẹnaan ịpe ọdi ạmiin bọ. 13Adulhe phọ rꞌạḍiroor phọ kụ iḍighi ḍio dị emuneniom ịraar.
14Kụ Ẹnaan ẹḅem mọ, “Mị ạto mọ ịtozi emite ẹpe kꞌạke phọ ẹgbatan ootaany phọ esi aḍughul phọ ẹḅile eḍeenaan ghan mem lọ asiḍughul-otu, rꞌạsia rꞌạrayaal kemiigh ghan; 15bịdi kẹmu ghan ẹpe okuaḍio phọ kụ ẹngo ghan ḍịḅaal ẹphen ade phọ.” Kụ ẹtuugh ịdipho phọ eḍighi. 16Ẹnaan ẹlhem ịyal igbogh ịtozi, erumuḍio phọ ẹda ootaany ḅịle ụnwanyu phọ ạda ḍughul. Ọdi ạḅile kẹn ni ạlhem rạanaan. 17Ọdi asereghi ḍịḅaal ẹpe okuaḍio phọ mọ ẹmu ghan esoorom de phọ; 18ẹmu ghan ootaany phọ rꞌaḍughul phọ, ẹḅile ẹgbatan ḍịḅaal phọ esi ufiri phọ. Kụ ẹḅeeraan Ẹnaan ịpe ọdi ạmiin bọ. 19Adulhe phọ rꞌạḍiroor phọ kụ iḍighi ḍio dị emuneniom inya.
20Kụ Ẹnaan ẹḅem mọ, “Mị ạto mọ ịdo kịrokiro ạraraar dị ẹmoogh ḍiphooghu emuza erugh sịen ạmuum mọ, ḅịle mọ ịnun emuza ẹphepheghuan ghan ẹpe okuaḍio phọ.” 21Kụ Ẹnaan ẹlhem igbogh ina phọ edi bọ ọphiiny, rꞌoomo ịdo kịrokiro ạraraar phọ ịpe erugh bọ emuza ụmuum; rꞌịdo kịrokiro ịnun. Kụ ẹḅeeraan Ẹnaan ịpe ọdi ạmiin bọ. 22Ẹnaan ịseph ni oomo phọ ạbidi kụ ẹḅeni ịpe erugh bọ ụmuum mọ mꞌịmaraghian emuzeḍi ọphiiny phọ; ẹḅile ẹḅeni ịnun phọ mọ ịmaraghian emuzeḍi aḅirini phọ. 23Adulhe phọ rꞌạḍiroor phọ kụ iḍighi ḍio dị emuneniom oogh.
24Kụ Ẹnaan ẹḅem mọ, “Mị ạto mọ ade phọ emiteghom ịdo kịrokiro ạraraar dị ẹmoogh ghuḍum: ịnam kịrokiro, ịlo elegheḍum rꞌologhi otu, rꞌịlo rekuura, ịbam rꞌigbogh.” Kụ ẹtuugh ịdipho phọ eḍighi. 25Kụ Ẹnaan ẹlhem oomo phọ ạbidi kụ ẹḅeeraan nyọdi ịpe ọdi ạmiin bọ.
26 #
1 Kọr 11.7
Kụ Ẹnaan ẹḅem mọ, “Nyịidipho yira kọlem weye ọkighima loor ayira. Bịdi kọtooghi ghan rạraar ọto ọngo ina phọ rꞌịnun phọ rꞌịnam mọ, ịlo elegheḍum rꞌologhi otu, rꞌịlo ẹmoogh ḍiphooghu, ịbam rꞌigbogh.” 27#Emi 5.1, 2#Mat 19.4; Mạk 10.6Kụ Ẹnaan ẹlhem weye ẹghighima loor phọ ọdi. Ịdipho Ẹnaan edi bọ kụ ịdi ẹtuugh bọ ẹlhem oye. Ẹnaan ịlhem bịdi elephiri rꞌẹya. 28Ẹnaan ịseph ni bịdi ẹḅeni mọ, “Ịmaraghian emuzeḍi pịdi ẹemara ẹemara anyina orugh oleeny oomo ade phọ kụ ọmoogh ịto. Mị rịngo inyina ịnyaam ọto ọngo ina ọphiiny phọ rꞌịnun okuaḍio phọ rꞌoomo ịnam mọ edi bọ sịen aḅirini phọ.” 29Kụ Ẹnaan ẹḅem mọ, “Mị mạsighe ịizupha ịpe ẹmoogh bọ ikpo phọ rꞌoomo ireeny phọ ịpe remuum bọ rughuuny ịngo inyina mọ eḍighi eḍien olhe, 30ạḅile kẹn ạsighe rọogho rꞌạrinya ireeny ạngo oomo ịnam rꞌịnun rꞌịpe ẹmoogh bọ ḍiphooghu sịen aḅirini phọ mọ eḍighi eḍien olhe ạbidi.” Kụ ẹtuugh ịdipho phọ eḍighi. 31Ẹnaan iphogh ni oomo ạraraar phọ ịpe ọdi ạlhem bọ kụ ẹḅeeraan nyọdi iboom. Adulhe phọ rꞌạḍiroor phọ kụ iḍighi ḍio dị emuneniom odiiny.
المحددات الحالية:
Emiighom 1: ẠḌI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
